Wiki 18 Moanibong
Warekan ana boki te burabeti ae Ieremia. 28: 1-17
Ngke e moa n tei Tetekia ba ueani Iuta, n te kaaua n ririki, n te kanimaua n namakaina, ao e taetae nakoni Ieremia te burabeti ae Anania ae natin Atura, ae kaini Kibeon, ao e kangai nakoina i nanon ana Temboro te Uea ao I mataia berebitero ma te koraki ni bane. “Aikai ana taeka te Uea ae Atuaia Iteraera: I a tia n otea ana amo ueani Baburon. Ai ti uoua riki te ririki, ao N na kabanei ni kaoki nakon te tabo aei bain am Temboro te Uea, ake e anai Nebukaneta ae ueani Baburon ni uoti nako Baburon. Ao ai aron naba Iekonia ae natini Ioakim, ae ueani Iuta, ma taekani ni kabaneia aika kaini Iuta ake a nako Baburon: N na kaokiia nakon te tabo aei. Bon ana taeka te Uea. N na bon otea ana amo ueani Baburon.”
Ao e taku Ieremia nakon te burabeti ae Anania, i mataia berebitero ma te koraki ni bane ake e mena n ana Temboro te Uea: “Ngaia! Ke E karaoa anne te Uea; ke E kakoroi bukin am taeka ni burabeti akanne: ke E kaoki bain ana Temboro te Uea mai Baburon nako iai, ao ai aroia naba taenikai. Ma ongora n te taeka ae N na atongnga i taningam ao i taningaia te koraki ni bane. Burabeti ake i maira, ngai ma ngkoe, a kaman taetaeniburabetia te buaka, te rongo ao te aoraki ae kamamate nakon aba ake a bati ma abanuea ake a ababaki. Ma te burabeti ae taetaeniburabetia te raoi, e kakoauaki ba e kanakoaki ni koaua iroun te Uea, ngkana e koro bukin ana taeka.”
Ngkanne e ana te amo te burabeti ae Anania mai roroan te burabeti ae Ieremia, ao e otouaia. Ao e kangai Anania i mataia te koraki ni bane: “Aikai ana taeka te Uea: Ai arou naba anne i muin uoua te ririki, N na otoua ana amo ueani Baburon ae Nebukaneta, ba N na anaia mai roroaia nako botanaomata.” Ao e nako te burabeti ae Ieremia.
Ngke e a tia n ana te amo te burabeti ae Anania mai roroan te burabeti ae Ieremia ma n otouaia, ao e roko irouni Ieremia ana taeka te Uea ae kangai: “Nako, kangai nakon Anania: Aikai ana taeka te Uea: Ko otootoi amo aika kaai, ao Ngai N na onoi muia n amo aika biiti. Ba E kangai te Uea ae Atuaia Iteraera: N na katoka te amo ae te biti i aon roroaia botanaomata akanne, ba N na taonia i ani makan Nebukaneta ae ueani Baburon. “(A na bane n toronaki irouna, ao I anganna naba manini buakonikai.)”
Ao e kangai te burabeti ae Ieremia nakon te burabeti ae Anania:
“Ongora, Anania, E aki kanakoko te Uea, ao akea ba e onimakina te kewe te botanaomata aei i bukin am taeka. Ma ngaia ae E kangai te Uea: N nang kanakoko mai aon te aba? Ko na mate n te ririki aei, ba ko a tia n reireia aomata te rawa nakon te Uea.”
Ao e mate burabeti ae Anania n te ririki naba arei, n te kaitiua n namakaina.
Te Taramo 119:29,43,79-80,95,102
Kaekana: Te Uea reireiai am tua.
Kawakinai mani kawain te kairua, Ao reireiai am tua.
Tai ana taekan te koaua mai wiu, Ba I onimakin am moti. K
Ke a tanimai akana makuko, Akana ata nanom.
Ke e raoiroi nanou n am baire, Ba I aonga n aki mama. K
A karanai ni kamaruaai akana buakaka, Ma I ata nanom.
I aki tan nako man am moti, Ba boni Ngkoe ae Ko reireiai. K
Alleluia, alleluia.
I araningkami ba raou, ba I kaongoingkami Ana taeka ni bane te Tama nakoiu.Alleluia.
Euangkerio
Warekan ana Euangkerio Mataio…14:22-36
E tuangia ana reirei Iesu ba a na toka n te boti ao a na rimoana n riaon te nama, ao Ngaia E kanakoia te koraki. Ngke E tia ni kanakoia, ao E ararakea te maunga n tataro n ti Ngaia. Ngke e a tairiki, ao akea raona. Ao e roko te boti i nukan te nama, ao e reimaurua, ba e tutuki te ang. Ngke e a kaan te karangaina, ao E kawariia Iesu n nakonako i aon te nama. Ngke a noria n nakonako i aon te nama, ao a nako nanoia, ao a taku: “Te anti!” Ao a maku ma n takarua. Ma E taetae Iesu nakoia ni kangai: “Karau nanomi, boni Ngai, tai maku.” E kangai Betero nakoina: “Te Uea, ngkana boni Ngkoe, ao tua ba N na nakoim i aon te ran.” E taku Iesu: “Nakomai.” Ao e ruo Betero man te boti, ao e nakonako i aon te ran ni kawara Iesu. Ma ngke e nora korakoran te ang, ao e maku, ao e nangi inako, ao e wewete ni kangai: Te Uea, kamaiuai!” E arora baina Iesu n taua, ao E kangai: “Te aomata ae e uarereke am onimaki! E aera ngke ko nanououa?” Ngke a toka n te boti, ao e baka te ang. A bobaraki kain te boti i matana, ao a kangai: “Te koaua, Natin te Atua Ngkoe!” Ngke a tia riaon te nama, ao a koro I kenetareta. Ao kain te tabo arei, ngke a kina, ao a karokoa taekana n te tabo arei ni kabuta, ao a uotaki aoraki ni bane nakoina; ao E butiaki ba E na katauia n ringa buruburun rabunana; ao a bane ni kamaiuaki ake a ringnga.
_________________________________________________________
Tibatiba: Kawakinai mani kawain te kairua ao reireiai am Tua
Tariu ao maneu te Atua ae ti toro Irouna man taromauria bon Atuan te Koaua, ae boni Ngaia Kawaira nakon te Maiu ae akea tokina. Ngkana ti taetaekina te koaua ao ti bon katotonga ao ti irira iai Nanon te Atua ae ti toro Irouna man iriria ni katoa bong. Ngkana ti aki taetaekina ke ni maeuakina te koaua ao ngkanne ti kaotia iai ba ngaira bon natin te roo ao te riaboro ao bon tani karenakoaki i mone ike e boo iai te tang ao te kangengewi. Irarikin anne ao ngakana ti taekina te kewe ao ti kairia iai aomata nakon te kairua ae a kona ni kabuanibai iai are a bon mitikaki iai taekara ibukin kamatean tamneia aomata.
Ti ongora n te moan wareboki n te bong aio aron teuare Anania are e tuea ni kewe ba aongkoa E tuangnga te Uea ba e na tuangia te koraki ana taeka are E a tia n tuangga. N tokin te tai ao e tuangaki te burabeti ae Ieremia iroun te Atua ba te taeka are taekin Anania bon tiaki ana taeka (te Uea) ba taian kewe. Ibukin ana bure Anania aio ao e taetae ni burabeti Ieremia ba e na mate Anania imain tokin te ririki. Bukina ba e a tia n taekina te kewe Anania ao e mate n aron are a tia n taetaeni burabetia Ieremia.
Tariu ao maneu ti kauringaki n te ewangkerio n te bong aio ba inanon maiura aio ao ti na bon kaitara ma kanganaga aika bati ao n tabetai ti taonaki n taian kaririakina aika bati ao ti na
tauraoi ni kakea Iesu ao n taekini taian kairua ba ti aonga ni kamoamoaki ao aki kamamaeaki irouia aomata. Ma ti tuangaki ikai ba ti riai n tai nako n ninikoria n tei ibukin te koaua ao te eti ao ni karimoa makakin te Atua nakon makakin aonteaba.Tu na butia te Atua ba e na kawakinira ba ti taetaekina te koaua ao ti kairaki n tai nako n ana Tua.