Wiki 19 Katenibong
Warekan ana Boki te Burabeti ae Etekiera. 9: 1-7; 10: 18-22
Ngke I ongora, ngai ae Etekiera, ao E takarua te Atua ni kangai: “Nakomai ma ami kai n oro, ngkami kain te kawa aika kam tiritiri.” Ao a nakomai aomata ake onoman, man te Kaman are i eta n tannakoiang, ao a toa baia n te kai n oro. E tei i nukaia temanna ae kunnikaia n te mainaina, ao e teke ana kai te tia koroboki n ron nukana. A rin, ao a tei i matan te baonikarea ae te burati. Ao e waerake mimitongin Atuaia Iteraera mai aon te kerubim ike e mena iai nakoni mataroan te Temboro. E wetea te aomata are kunnikaia n te mainaina, are iai ana kai te tia koroboki n ron nukana, ao E kangai nakoina: “Kabutaa te kawa, kabutaa Ierutarem, ao korea te kaibangaki n ramaia aomata aika nanokawaki ma n tang i bukini baika buakaka ni kabane aika karaoaki inanon te kawa.” Ao I ongo ba E taetae nakoia ake raona ni kangai: “Kabutaa te kawa n rimuina, ao oro. Tai nanoanga ao tai tangira, tiringia kamateia ni kabaneia, kara rorobuaka, ataeinaine, ataei ao aine. Ma ane iai te kaibangaki n ramana, ao tai ringnga. Kam na moanna man umau ae tabu.” Ao a moanna mai irouia unimane ake i matan te Temboro; ao E taku nakoia: “Kabareka te Temboro, kaon tabo nako n rabataia mate, ao otinako.” Ao a otinako, ao a ororo rinanon te kawa.
E nako mimitongin te Uea mai etani mataroan te Temboro n tiku i aoia kerubim. A takini baia kerubim, ao a mwemwerake mai aontano, i matau ao a nako ma uiraia; ao a toki ni mataroan te Kaman are i mainikun ana Temboro te Uea, ao e mena mimitongin Atuaia Iteraera i aoia, i eta. Boni ngaia te man are I noria ngkoa i an Atuaia Iteraera, i rarikin te karanga ae keba, ao iai ae kanga bain te aomata i ani baia ni kiba. Moaia, bon aekani moaia ake I nori i rarikin te karanga ae Keba. A bon toua nako kawaia n aki rarairaki.
Te Taramo Ieremia 113: 1-6
Kaekana: E mimitong te Uea i eta i karawa
Ana toro te Uea, neboia, Neboan aran te Uea.
E na karaoiroaki aran te Uea, Ma ngkai n aki toki. K
E na neboaki aran te Uea, man otin taai n ua bungina.
E tei te Uea i eta i aoia botanaomata, ao mimitongina i etani karawa. K
Antai ae ai aron te Uea ae Atuara, ae waerake n tekateka i eta,
ae baraki mai karawa. n tara karawa ma aonaba? K
Alleluia, alleluia
E weteira te Atua n te Euangkerio, Ba ana botanaomata are E karekea ara Uea ae Iesu Kristo. Alleluia.
Euangkerio
Warekan ana Euangkerio Mataio…18: 15-20
E kangai Iesu nakoia ana reirei: “Ngkana e bure tarim nakoim, ao ko na kawaria n tuangnga, n ti ngkoe ma ngaia. Ngkana e ongo, ao e reke tarim iroum. Ma ngkana e aki ongo, ao kaira raom temanna ke uoman, ba a aonga ni baireaki bai ni kabane n aia taeka tani kakoaua aika uoman ke teniman. Ma ngkana e rawa n ongo irouia, ao kaongoa te botaki. Ngkana e rawa n ongo iroun te botaki, ao ko na aranna ba te bekan ao te bubirikano. I bon tuangingkami te koaua: ane kam kabaea i aon te aba, ao e na bae naba i karawa; ao ane kam kabara i aon te aba, ao e na bara naba i karawa. I tuangingkami naba, ba ngkana a botaki uoman iroumi ni bubuti te bai teuana, ao a na anganaki iroun Tamau are i karawa. Ba ngkana a botaki uoman ke teniman n arau, ao I mena i buakoia.”
Tibatiba: Ngkana a botaki uoman ke teniman ni bubuti n arau ao a na anganaki iroun Tamau