Wiki 19 Kaabong
Warekan ana Boki te Burabeti ae Etekiera 12: 1-12
E roko irou ana taeka te Uea ae kangai: “Te nati n aomata, ko maeka I buakoia te koraki n rarawa, aika iai mataia ao a aki noraba, aika iai taningaia, ao a aki ongo; ba bon te koraki n rarawa. Ao ngkoe te nati n aomata, ko na katauraoa am bai ni mananga ae uotan taenikai, ao ko na mananga n te ngaina i mataia. Ko na mananga man te tabo ae ko mena iai nakon te tabo teuana i mataia. Tao a na ataia ngkanne ba te koraki n rarawa. Ko na katauraoa uotam n ai aroni uotan te taenikai, n te ngaina, i mataia. Ao ko na otinako n te tairiki, i matai aba am tabo n otinako. Ko na katoka uotam i aon angam, i mataia, ba ko na otinako i nanon te ro; ko na rabuna matam ba ko na aki nora te aba; ba I a tia ni karaoiko ba te kanikina Ibukin te utu ae Iteraera.” I karaoa are I tuangaki. I katauraoa uotau ae aroni uotan te taenikai n te ngaina; ao n te tairiki I kabangabanga te o ni baiu. I otinako i nanon te ro, ao I katoka uotau i aon angau, I mataia. Ngke e a ingabong, ao e roko irou ana taeka te Uea ae kangai: “ Te nati n aomata, tiaki a titirakiniko ni kangai te utu ae Iteraera ni kangai: Ko aera? Ko na kangai nakoia te koraki n rarawa akanne: Aikai ana taeka te Uea: bon te taeka nakoni Ierutarem ma te utu ae Iteraera ni bane ike a mena iai. Kangai: Bon te kanikina ngai ibukimi; ae i karaoia, ao e na karaoaki nakoia: a na uotaki nako ba taenikai. Ao e na katoka uotana i aon angana te mataniwi ae i buakoia, ao e na otinako i nanon te ro, ni bangabangan te o ae na karaoaki i bukina; ao e na rabuna matana ba e aonga n aki nora te aba.
Te Taramo 78:56-59, 61-62
Kaekana: Tai manuokin ana makuri te Uea.
A kata te Atua ao a katei nakoina, A rawa n ongo iroun Teuare moan te Rietata;
A tanrikaki n ai aroia aia bakatibu, A tibanako n ai aron te kainikatebe ae bure. K
A kaunna ma aia tabo n taromauri i eta, A kamaraka nanona ma aia bouan anti.
E ongo te Uea, ao e bue nanona, Ao E kaki taekaia Iteraera. K
E kataua mimitongina ba e na taenikai, E anga korakorana nakoia kairiribai.
E katuka ana botanaomata ba konan te kabang, E bononnanoia ana aomata. K
Alleluia, alleluia.
E kamauna te mate ara Tia kamaiu ae Iesu Kristo, Ao E anganira te maiu n ana Euangkerio. Alleluia.
Euangkerio
Warekan ana Euangkerio Mataio..18: 21—19: 1
E kawara Iesu Betero, ao e taku: “Te Uea, iraua au tai ni kabara ana bure tariu ngkana e kairua nakoiu? Tao itiua te tai?” E kangai Iesu nakoina: “Tiaki itiua, ma itibui ma itiua te tai.
Ai arona naba, titebo te Abanuea ae karawa ma te uea are kan tuoi muin ana bai ma ana tabonibai. Ngke e moana ana tutuo, ao e kairaki nakoina temanna are tebuina tenga te tarena baena (60 te mirion te tenario.) Ma e aki reke kabarani baena, ao e tuatua te toka ba e na kaboaki nako, ngaia ma buna ao natina ao ana bai ni kabana, ba kabarani baena? Ma e baka ni bobaraki te tabonibai i matana, ao e butia ni kangai: “Taona nanom, ao N na kaoki am bai ni kabane.’ Ao e nanoangaia te toka, ao e kanakoa, ao e kaakeaa baena. Ngke e nako te tabonibai arei, ao e kaitibo ma raona temanna are tebubua te tenario baena irouna; ao e taua roroana ni koonna, ao e taku nakoina: ‘Kamai baem.’ Ao e baka ni bobaraki teuarei i matana ao e butia ni kangai: ‘Taona nanom, ao N na kaoki am bai ni kabane.’ Ma e rawa te tabonibai arei ao e tua ba e na kainaki raona n ua barani baena. A maraki iai nanoia raona ake a noria, ao a nako ni kaongoraea te toka. Ao e kaoa teuarei te toka, ao e kangai nakoina: ‘Te tabonibai ae ko buakaka ngkoe! I a tia ni kaakea baem kioina ba ko butiai. E aera ngke ko aki nanoangaea raom n ai arou ae I nanoangaiko?’ Ao e un te toka, ao e angania tani bainikirinia bure n ua barani baena ni kabanea. Ao ai aron naba Tamau are i karawa, ngkana kam aki kabarai aia bure tarimi ma nanomi ae koaua.”
Ngke a bane ana taeka Iesu, ao E kitana Kariraia nakon abani Iutaia are i mainikuni Ioretan.
_______________________________________________________________
Tibatiba: Te Kaua ni miterio ni Mimitong Uotakirakean Nei Maria nako Karawa; uana tangiran Tinara Nei Maria ao te mate ae raoiroi
Ni kaitara ma ana te toa ae ‘Uotakirakean Nei Maria nako Karawa’ ao ti reitira ma tarira ao manera ni Kiritian i aonnaba ni karaba ao ni kamoamoa te Atua ibukin kororaoin te kamaiuaki ae anganira rinanon Nei Maria ae a tia n rineia ibuakoia aine nako ba e na riki ba Tinan Natina ae Iesu are e bungiaki, e maraki, iaon te kaibangaki ibukin kabaran ara bure ao ni manga karikira ba nati ngaira imuin te karaurenakoaki n aia aki ongotakea ao ai bure ara moan karo.
Ti kakoaua ba rinean ao nnen Nei Maria inanon te Babaire ni Kamaiu aio bon te bai ae a kaman iai mai moana ao tiaki te bai ae manenanti n reke. Nei Maria inanon ana kaeka ae mangori are “ana toro te Uea ae mangori ngai; E na karaoaki nakoiu n ai aron Am Taeka” ao imuin ruonakina ni maakan Teuare moan te Rietata inanon te Tamnei ae Raoiroi, e a riki ni koaua Nei Maria ba tinan te Atua ngke e riki n iriko inanona Iesu ao E a maeka te Atua ibuakora. Bon Nei Maria ae a tia n angan Iesu arona n aomata inanon birotona ao bon mairoun Nei Maria are a reke iai kinakin Iesu ba kanoan Tawita are a kaman taekinna burabeti ba e na otinako mai roun Tawita te Messia ae te tia kamaiua aonnaba.
Ibukin katauraoan Nei Maria n riki ba tinan Iesu ae te Atua ao e anganaki te kaonrakeaki n te karatia n aron are taekinna te akanera are Kabiriera ngke e nikira ana kamauri te Atua nakon Nei Maria are kangai: ‘Ko na mauri Maria ae ko onrake n te karatia”. Ngkai e onrake Nei Maria n te karatia ao nanona ngkanne ba e bon onrake Nei Maria n te raoiroi, te tamaroa, te itiaki ao te kororaoi. N te 1854 ao Pope Pio IX e kamatoa ao e katanoata kanoan te onimaki ba Nei Maria ae te Baretenia ae moan te Tabu e a tia n anganaki n ana karatia te Atua ae kaonoti nakoina ao n uan te kamaiuaki are na uotia Iesu Kristo, te katanaki man barekan nako te bure ae orikinare ke te bure n riki. Boni man te koaua are te Riki n Immakurata are a kabarabaraki iai Nei ba e Imakurata ke e itiaki.
N te toa ae uotakirakean Nei Maria n te 15 Aokati ao ti a kakoaua iai kamimitongan ao baunuenakin Nei Maria irarikin Iesu i Karawa ni kaotaki ao ni kamatoaki iai ba boni ngaia Tinan te Atua. E kamatoaki kanoan ana koaua ao ana reirei te Ekaretia aio iroun Pope Pio XII n 1 November 1950 ba Nei Maria ae Tinan te Atua ae e Imakurata ao e aki boo n te bure e anganaki te kamoamoaki ae okoro ngke e uotakirakeaki rabatana ao tamneina nakon kororaoin te mimitong i Karawa