Wiki 22 Moanibong
Warekan ana moa n Reta Bauro nakoia I Korinto. 2: 1-5
Tari, ngke I roko iroumi ba N na taekina ana kaotioti te Atua, ao I aki kaota te rabakau n taetae ma te wanawana. Ba ngke I mena i buakomi, ao I aki kan ata te bai teuana, ma ti Iesu Kristo, ao Iesu Kristo ae tauraki n te kaibangaki. I kaoti ibuakomi ma te mamara ao te maku ma te rurubenebene; ao au taeka ma au reirei, bon tiaki taeka n anai nano ma n rabakau, ma boni kaotiotani makan te Tamnei, ba e aonga n tei ami onimaki i aoni makan te Atua, ao tiaki i aon te wanawana n aomata.
Te Taramo 119: 97-102
Kaekana: Te Uea, I tangiri am tua
Ai bati ra tangiran am tua irou! I iaiangoia ni kabongana.
I wanawana riki iai nakoia aiau., ba bon raou n aki toki. K
I wanawana riki nakoia tan reireiai, Ba I iaiangoi am moti.
I ataibai riki nakoia unimane, ba I kawakin am baire. K
I rairaki man te kawai nako ae buakaka, ba N na ira nanon am taeka.
I aki kararoaai ma am moti:, boni Ngkoe ae Ko reireiai. K
Alleluia, Alleluia.
Te Atua, raira nanou nakoim, ao reireiai am tua. Alleluia.
Euangkerio
Warekan ana Euangkerio Ruka. 4: 16-30
E roko Iesu i Natareta ike E kaikawaka iai, ao E rin te tinakoka, n ai aroni katein te tabati, ao E teirake ni wareboki. E anganaki ana boki te burabeti ae Itaia; ngke E kauka te boki ao e bo ma te koroboki aei:
“E mena i aou Tamnein te Uea, ba E kabirai ni katabuai. E kanakoai ba N na uota
Te rongorongo ae raoiroi nakoia kainnano, ao E na kaota te bara nakoia ake a kainaki,
te manga noraba nakoia mataki, ao N na kainaomataia ake a karawawataki
ao N na kaota te ririki n akoi mairoun te Uea.”
Ao E kaina te boki, ao E kaokia nakon te tabo aikai, ao E tekateka. A bane mataia kain te tinakoka irouna. Ao E taetae nakoia ni kangai: E kakoroaki bukin taekan te koroboki anne i taningami n te bong aei.” Ao a bane ni butimaea ana rongorongo, ao a mimi n taeka n akoi ake E atong. A kangai: “Tiaki natini Ioteba Teuanne?” E kaekaia ni kangai: “I ataingkami ba kam nang kaekaai n te taeka ae kangai: ‘Te tia katoki aoraki, ani kamaiuko i bon iroum. Te baere ti ongo ba Ko karaoia i kaberenaum, ao karaoia naba i abam ikai.” Ao E manga taku naba: “I tuangi ngkami te koaua: akea te burabeti ae butimaeaki raoi i abana. I tuangi ngkami: a maiti aine ake a mate buia i buakoia Iteraera n ana tai Eria, ngke e in karawa i nanon tenua te ririki ao onoua namakina, ao e kabuta te rongo; ma e aki kanakoaki Eria nakon temanna i buakoia ba ti nakon neiere te I Tarebata n te aba are Titon. A maiti naba rebera i buakoia Iteraera n ana tai Eritai, ma e aki kamaiuaki temanna i buakoia, ba ti Naaman ae te I Turia.” Ngke e ongo baikanne kain te tinakoka, ao a bane ni maraki nanoia, ao a teirake, ao a katikia nako tinanikun te kawa. Ao a kairia nakon te tabo teuana are winikatatin te maunga are e kateaki aia kawa i aona, ba a na notuia nako mai aona. Ao Ngaia, E ri buakoia n toua nako kawaina.
Tibatiba: E mena i aou Tamnein te Uea, ba E kabirai ni katabuai