Wiki 22 Kauabong
Warekan ana moa n Reta Bauro nakoia I Korinto.. 2: 10-16
E tirotiroi bai ni kabane aika nano te Tamnei, ba taekan naba te Atua aika nano. Ba antai te aomata ae atai baika raba i nanon te aomata? Ao bon ti tamnein te aomata ae mena inanona. Ai arona naba: akea ae atai baika raba inanon te Atua, ba ti Tamnei te Atua. Ao ngaira, ti aki anganaki tamnein aonteaba, ma ti anganaki te Tamnei ae mairoun te Atua, ba ti aonga n atai ana karea te Atua nakoira. Ti aki taetae n ai aron te reirei n te wanawana n aomata, ma ti taetae n ai aron ana reirei te Tamnei, ba ti taekani bain te tamnei n taeka aika taekan te tamnei. E aki butimaea ae mairoun Tamnein te Atua te aomata n arona n aomata, ba bon te iango ni baba irouna, ao e aki kona n ota iai ba e ti reke atakina iroun te Tamnei. Ma e bairei taekani bai ni kabane te aomata ae kairaki iroun te Tamnei , ao e aki baireaki taekana iroun temanna. Ba antai ae ata ana iango te Uea ba e na kaeta arona? Ao ngaira, e reke iroura ana iango Kristo.
Te Taramo 145: 8-14
Kaekana: E eti te Uea n arona nako.
E akoi ma n nanoanga te Uea, E iremwe n un ao e bati n atataiaomata.
E akoi te Uea nakoia aomata nako, E tangiriia ni kabaneia akana E karikiia. K
Ke e neboiko, te Uea, am makuri ni bane, Ke a karaoiroiko am aomata
A na kaota mimitongin ueam, a na taekina makam,
ni kaota am ninikoria nakoia aomatam, ao raneaneani mimitongin ueam. K
Bon akea tokin am tautaeka, e tei ueam i nanon roro nako.
A bane ni koaua ana taeka te Uea, E akoi n ana makuri nako.
E totokoia akana baka te Uea, E kaetia akana baoua. K
Alleluia, alleluia.
Anganai te maiu, te Ua, ao N na ira nanon am tua. Alleluia.
Euangkerio
Warekan ana Euangkerio Mataio…4: 31-37
E ruo Iesu nako Kaberenaum ae kawani Kariraia, ao E reireinia aomata n te bong ao te tabati. A teke nanoia n ana reirei, ba E taetae n aia aron te aomata ae iai makana. Iai i nanon te tinakoka temanna te aomata ae taniaki iroun te tamnei ae kamara, ae korakora banana n takarua ni kangai: “Ai tera am bai irouna, Iesu ae te I Natareta? Ko roko ni kamaunaira. I ataiko ba Teuare Tabu ae ana aomata te Atua.” Ma E boaia Iesu ni Kangai: “Kainababu, ao otinako mairoun Teuanne.” Ao e kabukitaua te aomata arei te taimonio i aontano, ao e otinako mairouna n aki kamarakia. A bane n rotaki n te maku, ao a kangai i bon irouia: “Ai kamimi ra te taeka anne! E tuatua nakoia tamnei aika kamara ma te maka ao te korakora, ao a otinako!” Ao e buti rongorongona n tabo nako n te aba arei.
____________________________________________________________________
Tibatiba: E kanakoa te tamnei ae kamara Iesu ma te maaka ao te korakora
Tariu ao maneu ngkoananoa ao ti ongora n te ewangkerio aron Iesu ni kaota bukin kanakoana iroun Tamana ba tera ae E na karaoia. Ba E kanakoaki ba e na karokoa te kamaiuaki nakon aonnaba ni kainaomataia ake toronaki iroun teaure buakaka; E na katoki aorakia akana taonaki n te aoraki, ao E na kaokia aomata nakon te natinaki iroun te Tama ba ti na riki ba tan baibai irarikin Iesu i Karawa.
Te bai ae ringa nanou inanon oin kanakoan Iesu ba aron te maka ma te tautaeka iroun Iesu ngkai boni Ngaia te Atua ae karaoaki bai nako Irouna ao Ibukina. Bon Ngaia moan bai nako ma tokia ao bon Ngaia ae kanakoaki ba E na karaoa Nanon te Tama ni kamaiura. N te bong aio ao ti ongora n te ewangkerio aron Iesu ni kanakoa te riaboro ma te maka ao te korakora ni kaotia ba boni Ngaia ae tautaeka ao akea tokin Ueana ma maakana.
Tariu ao maneu ti na bane ni karaba te Atua ibukin Natina ae kataua ba e na riki n aomata ao e na maeka ibuakora ba e na anganira te onimaki ao te rau n taai nako ba E kawakinira ao E tararuaira n tai nako ao a na bon akea te bai ae ti na tabeaianga iai.
Bon Nanon Iesu ba ti riai ni manga reitanako te kanakoaki anne ba ti na kaota makan te Atua i buakaora ao ti na kona naba ni karaoi makuri ni kamaiu nakoia tarira ao manera. Ngkai ti bane n kanakoaki iroun Iesu ao e na bon anganira naba te Atua te maka ao te korakora ni karaoia bai nako n aran Iesu ae moan te maaka mani mimitong.Ti na onimakina maakan Iesu aio ao n ataia ba n arana ae moan te maka ao ni mimitong ao ti na kona naba ni karaoi bai nako ibukin kamaeuaia tarina ma manera.