Wiki 32 Kaabong
Warekan ana Reta Bauro nakon Biremon: 1, 7 – 20
I bati ni kabaia ao e maiu nanou ngke I ongo taekan am tangira, ba ko kabebetei nanoia kiritian. I bon ninikoria i nanoni Kristo n tuatua nakoim te bai ae ko riai ni karaoia; ma e raoiroi riki ba N na butiko n aran te tangira. I taetae nakoim, ngai Bauro ae te kara, ae I kabaeaki ngkai i bukini Kristo. I butiko i bukin natiu are I karikia n au tai ni kabaeaki, ae Onetimo, are aki bongana iroum ngkoa, ma e na bongana iroum ngkai, n ai aron ae e bongana irou. I kaokia nakoim, ngaia ae mamaten nanou. I kan taua i rarikiu ba e na buokai n aram, ngkai I kabaeaki i bukin te Euangkerio. Ma I aki kani karaoa te bai teuana ngkana ko aki kataua moa, ao I aki kan teboniko n akoai, ma ko na karaoia n oin nanom. Tao e a tia n anaki Onetimo mairoum tabeua te tai, ba e aonga n okiriko n aki manga kitaniko. Ma ai tiaki te toro ngkai: e bon rine riki nakon te toro, ba bon tarira ae tatangiraki. E bati n tangirki irou, ma e na bati n tangiriaki riki iroum, n te aro n rabata ao i nanon te Uea. Ma ngaia aei, ngkai raou ngkoe, ao ko na butimaia n ai aroni butimaeau. Ngkana iai ana bure ke baena iroum, ao ai boni baeu. I kaotia, ngai Bauro, n oin au koroboki boni ngai ae N na kabara baena. I aki kani kauringa baem ae ko bae iai irou, ae boni ngkoe. Tariu, I onimakina akoau anne iroum, i nanon te Uea: kamaiua nanou i nanoni Kristo.
Te Taramo 145: 7 – 10
Kaekana: E kabaia ane E buokia te Uea.
E kakaonimaki te Uea n aki toki, E eti nakoia akana karawawataki.
E kaamarakeia akana baki, E kabaraia akana kabaeaki. K.
E kaurei mataia mataki, E kaetiia akana baoua.
E tangiria akana raoiroi, E kawakina te irua. K.
E buoka ane akea ana karo ma neiere e mate buna,
ma E kaminoi kawaia akana buakaka.
E na tautaeka te Uea n aki toki, ba Atuan Tion n roro nako. K.
Alleluia, alleluia
E kamauna te mate ara Tia Kamaiu ae Iesu Kristo ao E anganira te maiu n ana Euangkerio. Alleluia.
Euangkerio
Warekan ana Euangkerio Ruka. 17: 20 – 25
Ngke E titirakinaki Iesu irouia Baritaio te tai ae e na roko iai Uean te Atua, ao E kaekaia ni kangai: “E aki kona n noraki rokon uean te Atua, ao e aki kona n taekinaki ni kangai: ‘Aei’ ke: ‘Arei!’ ma kam riai n ataia ba bon ane i buakomi uean te Atua.” E kangai naba nakoia ana reirei: “E na roko ami tai ni kan nora ana bong Natin te aomata ae ti te bongina, ao kam na aki noria. Kam na tuangaki ae kangai: ‘Aei! Arei!’ Tai nako iai, tai mananga. Ba aron te iti, ae kia man iterani karawa nakon iteran, ao ai aron naba Natin te aomata n ana bong. Ma e riai moa ba E na bati ni maraki ma ni kakiaki irouia kain te roro aei.”
___________________________________________________________________
Tibatiba: E na kanga aron rokon Uean te Atua?
Tariu ao maneu n te ewangkerio n te bong aio ao e titirakinaki Iesu irouia Baritario te titiraki aio ba e na kanga aron rokon Abanuean te Atua. Tariu ao maneu irou ao I iai uouoa iteran te titiraki ae kakawaki nakoira. Ba teuana ba aekakira abanuean te Atua are ti na kona n ota raoi iai ba bat i aonga n ataia ba tera raoi bonganan ao materaoin ara kekeaiki. Ao te kauoaua ba e kanga aron raoi te abanuea aio e moanaki n te tai aio ke n te tai ae na roko? Iaon te moan itera ao ao I ataia ao I onimaki ba Abauean te Atua bon te kona ni maeka ma te Atua n aki totoki. Ba ti bane ni karikaki ibukin aio ba ti na maeka ma te Atua inanon kororaoin te kukurei ao te mimitong ae akea tokina. Boni ngaira ana bai te Atua ao bon ana kantaninga te Atua ba ti na bane n mwemwerake nako Karawa ba ti karekea te kabaia ao te kimareirei ae akea tokina. Maiura iaon te aba bon ti te rubenimata ae bon aki ona ni kabotauaki ma abanuean te Atua. Te maiu aio bon te bai ae toki norana i tabon bairira ao te maiu are are iroun te Atua bon te bai ae ti aki kona n nora tokina ba bon akea tokina.
Te kauoua n iterana n te titiraki aio ba bon ana kaeka Iesu are kangai, Abanuean te Atua bon tiaki te bai are ti kona ni kangai “ ‘Aei’ ke ‘Arei!’ ma kam riai n ataia ba bon ane i buakomi uean te Atua.” E kamatataira ikai Iesu ba abanuiean te Atua e bon mena ibuakora ao inanora are nanona ba e moanaki ma ngkai. Abanuean te Atua e maeka inanora ao iroura iroun te Tamanei ae Raoiroi are ,a,aeka inanora ao Iesu are maiu ni koaua n te Eukari. Ti riai ni kakoaua ngkanne ba ngkana ti kan katonga Karawa ikai iaon te aba ao ti riai kakaraoa ae raoiroi ao ni katotonga maiun Iesu ae Natin te Atua ae mamaeka ibuakora. Ti riai naba n nora Iesu inanoia aomata nako ao n tabo nako.