Wiki 33 Moanibong
Warekan ana Kaotioti Ioane. 1: 1 – 4, 2: 1 – 5
Aei te Kaotioti are anganaki Iesu Kristo iroun te Atua, ba E na kaoti baika nangi roko nakoia ana tabonibai. E kanakoa ana anera nakon ana tabonibai ae Ioane. Ao e kaotiota ana taeka te Atua Ioane, ma ana kaotioti Iesu Kristo, ao bai nako ake e nori. E kabaia te aomata ane wareki, ma n ongora n taeka ni burabeti akanne, ngkana e kawakini kanoaia; ba e a kaan te tai. Aikai ana taeka Ioane nakoia Ekaretia kana itiua, akana i Atia. Te akoaki ma te raoi nakoimi mairoun Teuare iai ngkai, iai ngkoa, ao ae nakomai, ao mairouia tamnei aika itiman aika tei i matan ana kaitokanuea. I ongo ana teaka te Ue ae kangai nakoiu: “Korea ae kangai nakon aneran te Ekaretia are Ebeto: Aei ana rongorongo Teuare tau itoi aika itiua ni baina ae ataina, ae nakonako n otabaniniaki n taura koora aika itiua: I atai am makuri, am kekeiaki ma nanomakam. I ataiko ba ko aki kona n taona nanom irouia akana buakaka. Ko a tia ni kataia uake a kan arania ba Abotoro, ao ko noria ba bon tani kewe. I ataiko naba ba ko nanomaka, ba ko maraki i bukin arau n aki barannnao. Ma i nanokawaki iroum ngkai e a riki ni mamara am tangira nakon are mai maina. Ma ngaia ae iringa nnem ae ko baka mai iai: raira nanom, ao okira moan arom?”
Te Taramo 1: 1 – 4, 6
Kaekana: Ane tokanikai, ao e na amarake ni kain te maiu.
E kabaia te aomata ae aki irarang irouia akana buakaka,
ae aki toua kawaia tani bure, ae aki raonia tani kakaniko,
ma e kukurei n ana tua te Uea, ae mamanewea ana tua ni ngaina ao ni bong. K.
E katotonga te kai ae unikaki i etani karanga, ae anga uana n taina;
a aki rarai bana, a mate raoi ana makuri nako. K.
Tiaki aroia akana buakaka, tiaki aroia! ba a kakatonga te mange ae ubara nako n te ang.
Ba E kawakini kawaia akana raoiroi te Uea. ma a bua kawaia akana buakaka. K.
Alleluia, alleluia.
Butiamaea ma te nanoraoi te taeka ae unikaki i nanomi, ba e kona ni kamaiu tamneimi. Alleluia.
Euangkerio
Warekan ana Euangkerio Ruka.18: 35 – 43
Ngke E a kani Ieriko Iesu, ao e tekateka temanna te mataki i rarikin te kawai, ni bubuti kanana. E ongo nakonakon te koraki, ao e titiraki ba tera. Ao e kaongoaki ba boni Iesu are te I Natareta are toua te kawai. Ao e takarua ni kangai: “ Iesu ae natin Tawita, nanoangaai.” A tiringnga uake a rimoa ba e na aki karongoa. Ma e a tiba takarua riki ni kangai: “ Natin Tawita, nanoangaai.” E tei Iesu, ao E tua ba e na kairaki nakoina. Ngke e roko,ao E titirakinna ni kangai: “ Tera ae ko tangiria ba N na karaoia nakoim?” E taku teuarei: “ Te Uea, I bia noraba.” E taku iesu nakoina: “Ko na noraba, e a kamaiuko am onimaki.” Ao e noraba naba. Ao e ira nako Iesu ma n neboa te Atua. Ao a bane ni kamoamoa te Atua aomata ake a nora anne.
__________________________________________________________
Tibatiba: Ti na katotonga te kai ae e tei i etan te karanga
N te taramo n te bong aio ao e maneweaki iai aron te kai ai e tei ke e unikaki ietan te karanga;ae maiu reirei ibukina ba a ruo wakana ni katika ranin te karanga are e tei iaona. Ngai e tei iaon te maitoro ma te maiu te kai aio ao e na bon anga uana aila raraoi aika a bati;e na nateraoi bukini maiuna ngkai e bon kariki ua ao e anga te maiu nakoia aomara aika a bati.
N te moani warebonki ao e tuangaki Ioane te rongorongo ae na riai n taekinna nakoi kain te Ekaretia ae Ebete ba e ngae ngke a tia ni kaota te kekeiaki ae moan te tamaroa ao e kaota aki kukureina te Atua n te bai ae a riki ngkai ba ai tiaki aron are mai maina.E kauringaki te tia kiriri n te Ekaretia i Ebeto ba e riai n nora te bai are a tia ni kabaka ao man raira nanona ba ngkana e aki ao e na anai mairouna te muioko ae kakawaki aio te Atua ao E na motikaki taekana nakon te kabuakakaki ao te mate ae akea tokina.Ao e na kanga n reke te kanganga aio? Eng e na bon reke te baka man nnera ae ti mena iai ngkai ngkana ti a manga bita te tabo ae ti tei iai. Ngkana ti tei n te tabo ae mauteretere ao ti na bon aki kairiki ua ao ti rai ao ti na ao tui na rai mani mate. Ngkana akea te Uea iroura ao ti na katotonga te mataki are taekinaki n te ewangkerio. Ti na namakina te rootongtong ngkana ti aki nim ma te Uea. Ti na karekea te kukurei ao materaoin maiura aio ao ngkana ti ngkana ti noraba ao ti taratara n ana ota Iesu are e anganira. Eng ti na bubutia te Atua ana nanoanga nakoira ba ti na taka ni kan nakoina ba e na manga anganira te maiu ni koaua are ti na kona iai ni manga kona n anga nakoia tarira ao manera ni kabane.