Teuana muikoara ae kakawaki inanon maiura aio bon te kakaonimaki inanon baai aika ti muiokoaki iai iroun te Uea. Ba n te koaua ao bon akea te bai ae iai iroura ae bon oin ara bai ma a bane n reke mairoun te Atua.
Ti aki maiu i aonteba ba ti na onea muin te Atua ni karaoa ana makuri ma ti karikaki ba e na kabonganaira te Atua ni karaoa ana makuri rinanora. Ti na riai ngkanne ni kakaonimaki n tauraoi n taaai nako n riki ba ana bai ni kamkuri te Atua ao n onimakina te Atua ba Ngaia muiokon baai nin kabane inanon maiura.
Ti riai ngkanne n ataia raoi ae taian rabakau ma karea aika ti anganaki n te maiu aio a bon reke iroura ibukin karaoan Nanon te Atua ma Ana kantaninga ibukin karokoan Ana Tangia ao Ana Kamaiu nakoia aomata nako. N tabetai ao ti taku ba karea ma rabakau aika reke iroura bon oin ara bai ao ti tauninne iai n rawa n tibaia ke ni kataua ba a na kabaia iai tabeman. N tabetai ao ti a manga ba oin ara bai ni baireia ba antai aika ti na angania ao n te te tai ra ae ti na kabonganai iai. N tabetai ao ti a manga bon taningaroti ni kabonganai.
E kamatata Iesu nakoira n te bong aio ba tera raoi ana kantaninga ibukin karea ma tarena aika E anganira. E tangiria ba ti na karikirakei ke ti na manga karakai maitin karea ake E anganiira. Ao tera raoi nanon ae ti na karakai, ke ti na kanga ni karikirakei? I taku ngai ba ti na kona ni karikikei karea ma tarena aikai ngkana ti kabonganai i bukia kamaiuaia ao karekean te kabaia irouia tarira ma manera. E tuangira naba Iesu ikai ba bairean taekara n te kabanea ni motikitaeka e na bon ti boboto i aon arora ni kakaonikaki ni kabonganai ma ni karirkirakei ana karea ma tarena ake E a tia ni muikoira iai.
Tariu ma maneu ti na tatro ni bubutia te Atua ba E na kawakinira ao ni buokira ba ti na kakaonimaki n taai nako ni kabonganai taian karea aika ti anganaki n aron are E kantaningaia te Atua. Ti na aki tabe n taraia ba maitira te makuri ae ti karaoia ma ti na ti kawakiniira ba ti na tauraoi ao ti na kakaonimaki n taai nako ni karaoi muikoara aika ti anganaki iroun te Uea. Ba ngkana ti kakaonimaki ni baai aika uarereke ao E na kangai te Uea nakoira ngkana E roko, "Te toro ngkoe ae ko a tia ni kakaonimaki ni baai aika uarereke... nakomai katonga te kimarerei ma am Toka."