E karaba ae e karemo mairouia aomata, ni kakaibibita ana raurau n amarake.
Aio aron maiun te aine ae St Elizabeth mai Hungary are ana toa te bong aio
Bon te natinuea te aine aio are e a tia ni kunea ni maiuna ba bon ngaia raoi te oi n natinuea, tiaki man rikiana n aomata ma man arona ae natin te Uea ae te Atua ae aia Uea uea ao aia King king rinanon Natina ae Iesu.
Ma ngke e uarereke ao e a kaman kunea kaubain nanon Tamara te Atua Nei Eritabeta mai Angkari ao e karaoa nakoana n natiniuea mairoun te Atua inanon te kororaoi. Nakoia aomata, e maiuakina te tituaraoi ma te akoi ba tabena ao tibangana n natiniuea iroun te Atua. N arona n natinuea nakon Tamara i Karawa ao e maiuakina te ongotaeka, te kakeaa imatan te Atua, te taonannano, ao aroaro nako are e kimareirei iai nanon te Atua. Rongorongona ba e teboki naba kinakaia aoraki ma kainnano ake e katea te onaoraki ibukia i rabeen ana baeriti ao man tabeakinia bon ngaia ae te ae te natinuea iaon te aba. E angangabai n tituaraoi ao e teimatoa ni karokoa matena n arona aikai. E kaotia ba te natiniuea ngaia iaon te aba are e ataa akean manenan arona n aomata ao e butimaea ni koaua arona ae te natiniuea iroun Tamara ae te Atua ae Uean bai nako.
Ngaira ataeinaine ao ataeinimane, n tabetai ao ti ukera aron totokan ara bui ma arora ao ti tangiri bai aika a na karikira ba aekaia natiniuea ke taian princess ao princesses ke ti uouotira n aiaroia natinuea.
N tatabemanira nako ao ti bane n uaiakina te maiu n aiaroia natinuea, ma n tabetai ao a tannako ara ukeuke ma ara iango ni kan riki ba natinuea iaon te aba ao ti maninga taekan Tamara ao Atuara are bon ngaia te Toka ao te Uea ma te King iaon bai nako.
.
Ngkai natin te Atua ngaira ni bane ao bon akea ibuakora ae te kaunga ke te b'a nuea ke bon te uea. Ti te bo arora ba ti bane n nati n uea, iroun Iesu.
Aio te koaua are e anganira te nanoraoi ao te kimareirei n tainako ma te tituaraoi inanora, ba ti ataia ba akea kab'akara irarikia raora nako ao ti kaubai ni kaubain te Atua.
Aio te koaua ae e anganira te aki mama ibuakoia raora ba ti toronibai iroun te Atua. Te koaua naba aio are e anganira te ungannano ao te teimatoa inanon ara makuri ma tibangara nako aika a ririeta ke aika a mangori. E anganira kaubaira ae akea te abanuea iaon te aba ae e kona n anganira, are bon te Tangira ae e aki kona n tianaki ke n toki ke n tare.
Ngkana I aki kaum'ane ke ni kaub'ai, ke tao ni wanawana ke n nanobaba, ke n toaraoi ke n toabuaka, ao bon ti te bo arou ma tariu ao maneu ni kabane ba bon au bai te aonnaba ni kabane, au bai te kaub'ai ni kabane, ngkai natin te Atua ngai ao ana bai te Atua bai ni kabane ao are bon au bai ni kabane. E ngae ngke e aki mena te kaub'ai ian au auti, ke inanon baiu, ma bon au kaub'ai ake irouia te koraki ba a tia ni muiokoaki iroun Tamau te Atua ba ana tararuai ibukiu ma tariu nako, ibukira ni kabane. Ngkana iai te bai ae I tangiria, ao e kangai Iesu, butiai ao E anganai ngkana e botau ma nanon Tamara are i Karawa.
Aio are e karika irou te kimareirei ni kamaura te bong teuana ma teuana, ba ti uti, ngaira natiniuea, nakon mimitongin ana karikibai te Atua are e a tia ni katauraoia ibukira n te bong anne, ba tamaroan otin taai, te maiu ae e boou are ti nori ni ueenikai aika a boureirei man boiarara ao n tamaroa, ao ai norakin mataia buura, natira ma ara utu ao raora nako ake ti a kaitibo ma ngaia n te bong anne, ake tia tia ni manga kautaki inanon ana babaire Tamara ae te Atua ba ti na manga tib'a kanoan te bong ae e boou inanon te itangitangiri ma ngaia iroun Iesu Kristo. Ti na manga kaitibo naba ma ara Uea ao Atuara ma kaubaina ni bane, n te Eukari ae moan te Tabu, n te bong anne.
Ti a butia te Atua ba e na anganira te nano n aiaron St Eritabeta mai Angkari, ba ti na kawakina arora n natinuea iroun Tamara ae te Atua ae te Uea iaon bai nako ao iaon maiura, iroun Natina ae Iesu, ma te kimareirei n arora nako ao inanon karaoan tibangara nako iaon te aba n aiaron are e maiuakinna St Eritabeta.