Karemo Wiki 2 Kauabong.
Warekan ana Boki te burabeti ae Itaia 1:10, 16 – 20
Ongo ana taeka te Uea, ngkami tani kaira Totoma, Ongora n ana tua Atuara, ngkami aomatani Komora. Tebotebo, kaitiaki ngkami, kanakoa buakakami mai matau. Toki ni karaoa ae buakaka, reireini gkami karaoan ae raoiroi, ukera te eti, buoka ane rawawata, bairea ae eti nakon ane akea ana karo, buoka taekan neiere e mate buna.
E kangai te Uea: Nakomai, ti na kakarabakau. Ngkana tao moan te uraura ami bure, ao a na riki ni mainaina n ai aron te tinoo; ngkana tao a roko naba n te uraro, ao a na riki ba ai aron te buraen tiibu. Ngkana kam tauraoi n ongo, ao kam na kana amaraken te aba. Ma ngkana kam kamatoai ngkami n rawa, ao E na kani ngkami te kabang. E a tia n taetae win te Uea.
Te Taramo 50: 8 – 9, 16 – 17, 21, 23
Kaekana: A na kamaiuaki akana raoiroi.
I aki kaburei ami karea, a aki bua mai matau ami angakarea.
N na aki ana te kao mane mai abam, ke te koti man am nanai. K.
Ko ti atoatonga au tua, ngkoe ae ko riba au moti?
Ko ti mamanewea au berita, ngkai ko tewenakoi au taeka? K.
N na kainababu ngkai ko karaoa anne? Ko taku ba titebo Ngai ma ngkoe?
E neboai te karea ni katituaraoi, N na kaota kamaiuan ane raoiroi. K.
Imain te Euangkerio
N na okira tamau ma ni kangai nakoina: Tamau, I bure nako karawa ao nakoim.
Euangkerio. Warekan ana Euangkerio Mataio. 23: 1 – 2
E taetae Iesu nakoia aomata ao nakoia ana reirei ni kangai: “A tekateaka tani koroboki ma Baritaio n ana kaintoka Mote. Ma ngaia ae kam na karaoi ma ni kawakini bai ni kabane aika a tuangi ngkami, ma tai kakairi n aia makuri, ba a tuatua, ma aki makuri. A kabaei uota aika rawawata ni katokai i aon angaia aomata, ao ngaia a rawa ni kamakura tabonibaia. A karaababai aia burakitere, ao a kamarairai buruburun aia kunikai. A tatangiri moa ni nne n rarikiriki n amarake ma moa ni kaintoka inanon aia tinakoka. A kakani kamauraki n tabo ni botaki ma n aranaki ba rabi irouia aomata. Ma, ngkami kam na tai aranaki ba rabi, ba ti temanna ami tia reirei, ao tari ngkami ni bane. Ao tai atonga temanna i aon te aba ba tamami, ba ti temanna Tamami are i karawa. Kam na tai atongaki naba ba tan reirei, ba ti temanna ami Tia Reirei, ba te Kristo. Ane kakanato riki i buakomi, ao ke e riki ba ami tabonibai. Ane karieta ao e na karinanoaki; ao ane karinanoa, ao e na karietataki.
Tibatiba: Katoka karaoan ae buakaka, kakaraoa ae raoiroi, ukera te eti ao buoka ane rawawata
Tariu ao maneu ti reita ongorara n te bong aio n ana rongorongo te Uea inanon tain te karemo. Ti kauringaki n te bong aio ba ti na aki tarai buburan ma arawawatan ara bure imatan te Uea n tai aika a tia n nako. Ba bon akea ara kairua ma ara bure ae kona n riaon rietatan ma nanon ana nanoanga te Atua ibukira. E ngae ngke tao ti tia n riki ba te tia kairiri ae onimakinaki i Totom ke aomatan ngaira Komora are nanona ba ti a tia ni maiu inanon te bure man tannako mairoun te Atua ao e na bon tauraoi ni butimaira te Uea ngkana ti ongo banana n te bong aio ao ti tanrikai nakoina. Ti weteaki nte bong aio ba ti na tebokira man ara bure ni kabane ao ti na kaitiakira ba ti aonga ni manga riki ba aomata aika bou man itiaki. N te moan wareboki ao ti tuangaki ba ti na toki man karaoai te buakaka ao te bure, ti na reireinira karaoan te raoiroi, ti na ukeukera te eti , ao ti na buokia akana rawawata mani kainnano.
N te ewangkerio ao ti kauringaki ba ti na aki ti taekina te raoiroi ma ti na karaoia naba. Ao ti riai n aki katotongia baritaio ae a waekoa ni katoka te rawawata iaoia tabeman ma a rawa n tabeka te rawawata ngaiia. Ti na aki naba ni katotongia baritaio ae a kan taraaki ba aongkoa a karaoa te raoiroi ao a kani kamoamoaki n aia makuri. Ti riai ni maiuakina te tangira ma te akoi nakoia aomata nako ba aonga ni kabebeteaki. Ti na karaoi ara makuri aika a raraoi ae na ti ataia te Uea ba aonga n reke kaniwangara n te tai ae na roko i Karawa.