Wiki 18 Katenibong
Warekan te Boki ae te Otinako. 13: 1-2, 25 – 14: 1, 26-29, 34-35.
E taetae te Uea nakoni Mote ni kangai: “Kanakoia aomata, ba tatabeman mani baronga nako, ba a na nako ni kaninganinga te aba ae Kanaan, ae I angania natini Iteraera.”
I muin abui te bong, ao a oki man aia kaninganinga. Ao a nako ni kawara Mote ma Aaron ao te botaki ni Iteraera ni kabanea, i nanon rereuani Baran, I Kateti. Ao a kaongoraia ma te koraki ni bane, ao a kaoti uan te aba arei nakoia. A kaongoraia ni kangai: “Ti nakon te aba are ko kanakoira nako iai. Bon te koaua ba e ranga iai te rannimamma ma te meri; ao aikai uana. Ma e korakora te botanaomata ae maeka iai, ao ti noriia naba ana kariki Anaka iai. A taua te aba ae Nekebo ana kariki Amareka; a tauaki maunga irouia tibun Eta ma i Iebuti ao Amoraite ao a maeka i Kanaan i rarikin tari ao i etani Ioretan.”
E taetae Kareba nakoia te koraki ake a botaki i rarikini Mote, ao e taku: “Ti riai n nako ba ti na taua te aba arei, ba ti boni kona.” Ma a taku aomata ake raona: “Ti aki kona ni buakana te botanaomata arei, ba a korakora riki nakoira.” Ao a kabuakaka taekan te aba arei, are a tia ni kaninganinga, ao a kangai nakoia natini Iteraera: “Te aba ae ti nako n noria, bon te aba ae kaakaniia kaina. Aomata nako ake ti noriia bon aomata aika ababaki. Ti noriia naba aintoa (ake natin Anaka aika ana kariki aintoa). Ti taku ba taian taake ngaira i rarikia, ao bon taekara naba anne irouia.”
Ngkanne a bane te koraki ni kanenei banaia ma n takarua; ao a tang aomata n te tairiki arei. E taetae te Uea nakoni Mote ma Aaron, ao E kangai:
“E na toki ningai te botanaomata ae buakaka aei ni ngurengure nakoiu? I a tia n ongo tangia natini Iteraera irou. Ko na kangai nakoia: ‘Aikai ana taeka te Uea: Ngkai I maiu, ao N na karaoa nakoimi n ai aron ami taeka aika kam atong i taningau. A na baka ni mate rabatami i nanon te rereua aei, ngkami ni bane aika a tia ni koreaki arami, ngkami ni bane aika kam warekaki aika kakanimabui ni waerake ami ririki, aika kam ngurengure nakoiu. Abui ami bong ni kaninganinga te aba. Ao boon te bongina teuana te ririki; ma ngaia ae kam na uoti rawawatan ami bure i nanon abui te ririki, ao kam na ata muin aromi ngke kam kitanai.’ I a tia n taetae Ngai te Uea: bon anne arou nakon te botanaomata ae buakaka aei, ae botaki ni kauntabaai. Ana ae buakaka aei, ao botaki ni kauntabaai. A na mate i nanon te rereua aei n aki tiku temanna.”
Te Taramo 105: 6-7, 13-14, 21-23
Kaekana: Uringira, te Uea, Ba Ko tangira am botanaomata.
Ti bure n ai aroia ara bakatibu, Ti reke n te kairua ma te buakaka.
A aki mutiakin am kamimi, ara bakatibu i Aikubita. K.
A waetata ni manuokin ana makuri, a aki taninga mauin ana iango.
A bane nanoia ni mataai i nanon te rereua, a kata te Atua iai. K.
A manuokina te Atua ae aia tia kamaiu, are karaoi baika kakanato i Aikubita
ma kakai i abani Kam, ao baika kakamaku i Marawa ae Uraura. K.
E taku ba E na kamaunaia, ma e tei ni matoa ni nnena
Mote are E rineia, n tuka unna man te urubai. K
Alleluia, alleluia.
Te Uea, kauki nanora n ongora n ana taeka Natim. Alleluia.
Euangkerio
Warekan ana Euangkerio Mataio. 15: 21-28.
E mananga Iesu nakon te aba ae i rarikin Turo ma Titon. Ao e roko man te aba arei temanna te aine ae te I Kanaan, ao e takarua nakoina ni kangai: “Te Uea ae natin Tawita, nanoangaai: e rangi n aki karauaki neiere natiu iroun te taimonio.” Ma E bon aki kaeka naba teutana. A kania Iesu ana reirei ao e butia ni kangai: “Ani kanakoa te aine anne ba e aki toki n takarua n rimuira.” E taku Iesu: “I aki kanakoaki i bukin temanna, ma ti i bukia tibu aika bua i buakoia Iteraera.” Ma e roko te aine arei, ao e bobaraki i matana, ao e kangai: “Te Uea, ko na buokai.” E taku Iesu nakoina ngkanne: “A aki riai n anaki kanaia nati n tewenakoaki nakoia kiri.” Ao e kangai neierei: “E koaua, ma a amarake kiri n tamruru aika baka man aia taibora aia toka.” E taku Iesu ngkanne: “Neiko, ngaia e ababaki am onimaki; e na karaoaki nakoim n ai aron nanom.” Ao e maiu natina n te tai naba arei.
Tibatiba: A na bane ni mate akana a rawa n rin n te Abanuea Karawa
Tariu ao maneu n te bong aio ao ti bane kauringaki n te bong aio bat i riai n tai nako n ongotakea iorun te Uea bat i aonga ni kamaiuaki. Ni maiura aio ao ti ongotaeka iorun te Atua ngkana ti kakaraoa ae Nanona. Inanon maiura ioa ao ti riai n ota raoi ba bukin te maiu ae ti naganaki n te aonnaba aio bon te katauraoi ibukin te maiu ae na roko. Bon te borau nakon te tabo teuana ae E a tia ni katauraoia Iesu ibukira n ai aroia te Nati n Iteraera are a managa inanon abui te ririki nakon te Aba ae Kanaan are tanga iai te rannimama ma te meri ke karewerewen te manniberu.
Ti ongora n te maonwareboki n te bong aroia te nati n Iteraera n rawa n rin te aba ae Kanaan ba a kan oki nako Aikubita. E un te Atua nakoia ao man anaga ana Taeka ba a na bane ni mate te koraki ake a rawa n rin teAba ae E a tia ni katauraoia ibukia. Eng, te koraki akea rawa n rin bon te koraki ake a ngurengire n tai nako ao arawa ni ongotaeka iorunte Atua.
Tariu ao maneu te kabaia ae katauraoia te Atua ba kanuangara n te maiu ae na roko bon te maeka ma Ngaia i Karawa ao te kona n nora Ubun te Atua. Ti na babaina te wanawana ni koaua n aki kataua ba e na bua mairoura te maiu ae totoki ti ibukin tangiran te bure ke te bai ae kai mamauna.