Warekan ana moa n Reta Bauro nakoia I Tetaronike. 3: 7-13
Tari, e kabebetei nanora ami onimaki i buakon tabeaiangara ma rawawatara. Ti a manga maiu ngkai kam teimatoa i nanon te Uea. Ti na kanga ni katituaraoa te Atua n te aro ae riai n aromi, i bukin te kabaia ae ababaki ae kam karekea nakoira i matan Atuara? Ti butia ni bong ao ni ngaina ma te onnon, ba ti na mang nori matami, ba ti aonga ni kakoroa raoi ane tuai ni kororaoi n ami onimaki. Ke E buoka kawaira n roko iroumi te Atua naba ae Tamara ma ara Uea ae Iesu Kristo. Ke E karikirakea ma ni kabatia ami itangitangiri te Uea, ao ami tangira nakoia aomata nako, n ai aron naba ara tangira nakoimi. Ke E kamatoai nanomi iai i nanon te raoiroi ae akea waeana i matan te Atua ae Tamara, ngkana E nakomai ara Ue ae Iesu Kristo ma ana aomata ni bane aika raoiroi.
Te Taramo 89: 3-4, 12-14, 17
Kaekana: N na aki toki n neboa aran te Uea.
Ko kaoka te aomata nakon te tano, ni kangai: “Oki, natin Atam.”
Ba te nga n ririki i matam, Ai aroni ngkoananoa, ae a nako,
Bon ti teuana te tei ni bong. K.
Reireinira ni wareki ara bong, ba ti na nano wanawana.
Te Uea, oki! Ningai tokina? Nanoangaia am toro. K.
Kaonrakeira n am akoi n te ingabong, ba ti na kimareirei n ua matera.
Ke e mena i aora ana akoi te Uea; Karekea uan ara makuri. K.
Alleluia, alleluia.
Kaurei matau, te Uea, ao N na nori kamimi aika muin am tua. Alleluia.
Euangkerio
Warekan ana Euangkerio Mataio..24: 42-51
E kangai Iesu nakoia ana reirei: “Tantani, ba kam aki ata te bong ae E na roko iai ami Uea. Kam na ataia: Ngke arona ba e ata ana tai te tia ira n roko mataniwin te auti, ao e na tantani ao e na aki kariaia b e na ewaraki on ana auti. Ai aromi naba, ngkami: kam na tauraoi, ba E na roko Natin te aomata n te tai ae kam aki iangoia. Ba antai te tabonibai ae kakaonimaki ma ni iangoraoi are e a kateia te toka ba mataniwia kain ana auti, ao na angania kanaia n te tai ae riai? E kabaia te tabonibai anne ngkana e noria ana toka n rokona ba e tabe n ana makuri. I tuangingkami te koaua: e na kateia ba mataniwin ana bai ni kabane. Ma ngkana e buakaka te tabonibai anne ma ni kangai i nanona: ‘E baenikai au toka n roko’ ao ngkana e oroia raona ma e amarake ma ni moi ma tani manging, ao e na roko ana toka te tabonibai anne n te bong ae e aki kantaningaia iai ao n te tai ae aki ataia; e na kanakoa, ao e na karekea tibangana ae tibangaia tani kewea te aba i buakon te tang ma te kangenge wi.”`
Tibatiba: Tantani, ba kam aki ata te bong ae E na roko iai ami Uea
Tariu ao maneu n te bong aio ao ti kan kauaea kakawakin karekean te wanwana ni koaua ba ngaia ae na kairia inanon maiura ni kekeiaki inanon te bong teuana ma teuana. Ao ti na kanga n ataia ba e reke iroura te wanwana ni kaoaua ae mairoun te Atua? Eng te wanawana ae anga aonteaba e bon aki kona n anganira te kabaia ni koaua ae ti aki kona ni kabuanibai iai. N te bong aio ao E anganira Iesu n te ewangkerio te taeka ni wanwana ba ti na riai n tantani n tai nako ba ti aonga n tauraoi ngkana e a roko ara tai ni weteaki iroun te Uea. Ao tera raoi ae nanonaki n te tantani? Tao nanona ae ti kona ni waekoa ota iai bon bon aekan are a kakaraoia taian uatiman n aia makuri ba a kantaningaki ba a na taratara n tai nako ba ngkana e roko te tia kamarua ke te tia ira n te tairiki ao ngkana ti taratara ao ti na bon tauraoi ni kaitara ba e na aki urubai ke n anaibai aika kakawaki man ara auti. Inanon te ewangkerio n te bong aio ao ti tuangaki ba tera nanon te tantani ni maiura ni Kiritian. Inanon maiura aio ao iai te bai ae ti na riai n tauraoi nako iai ba bon te mate are ti na tauraoi iai n tei i imatan te tia motikitaeka. Ngkana ti mate inanon te maiu n itiaki ke te karatia ao ngkanne ti na bon tauraoi ni butimaea te kaniwanga ae te rinnako n te Abanuea i Karawa ike ti na nora iai matan te Atua man neneboia n aki toki. Ngkana ti teimatoa ni maiu inanon te raoiroi ao e roko weteara ao ti anganaki te kabaia ae aki totoki i Karawa ao ngkana to mate inanon te bure ao ti na nako mone inanon te maraki ae aki totoki.
Te wanawana iroura n te bong aio bon te tauraoi n tai nako ni butimaea te tia iein ao ni reita te bakanamarake ibukin te tia mare ao ti riki ba irua aika rine aika a tauraoi ma kunikaia ni party n riki ba tan tia kukurei ma Iesu. Eng ti riai n aki katotongia aine ake niman ake nanobaba ake a aikoa tauraoi ni butimaea te tia mare ao e aki kaukaki te mataroa nakoia ba a rimui.