Warekan ana Reta Bauro nakoia I Korote..1: 1-8
Bauro, ae rineaki iroun te Atua ba ana Abotoro Kristo Iesu, ao tarira ae Timoteo, nakoia akana raoiroi akana i Korote, aika tarira aika kakaonimaki i nanoni Kristo. Te akoaki ma te raoi nakoimi mairoun te Atua ae Tamara.
Ti aki toki ni katituaraoa te Atua ae Taman ara Uea ae Iesu Kristo, ngkai ti uringi ngkami n ara tataro, ba ti ongo taekan ami onimaki i nanoni Kristo, ao ami tangira nakoia akana raoiroi ni kabaneia, i bukin te kantaninga are katauraoaki i maimi i karawa. Kam a tia n ongo taekan te onimaki anne ngkoa ngke kam anganaki taekan te koaua ae te Rongorongo ae Raoiroi. E roko te rongorongo anne iroumi, ao e roko naba i aonaba ni kabuta, ao e rikirake ma ni kariki ua? Bon arona naba iroumi man te tai are kam ongo iai ma n ota ni koaua n ana akoi te Atua. E reirei ngkami iai Ebabera, ae raora ni makuri ae tangiraki, ae kakaonimaki ni makuri i bukira ba ana minita Kristo; boni ngaia are kaongoraaira taekan ami tangira i nanon te Tamnei.
Te Taramo 51: 10-11
Kaekana: I onimakina ana akoi te Atua.
Ai aron te kai ae te oriwa ngai, ae rikirake i nanon uman te Atua.
I onimakina ana akoi te Atua, n tai nako n aki toki. K.
N na neboiko n aki toki, i bukin am makuri.
N na kaota aram ba e raoiroi, i mataia am aomata ni bane. K.
Alleluia, alleluia.
Am taeka bon au taura n nakonako, ao bon otani kawaiu. Alleluia.
Euangkerio
Warekan ana Euangkerio Ruka. 4: 38-44
E kitana te tinakoka Iesu, ao E rin n ana auti Timon. E ituaki tinani bun Timon n te kabuebue ae korakora, ao a butia Iesu i bukina. Ao E baraki i aona, ao E tua nakon te kabuebue. Ao e a kitanna naba te kabuebue, ao e teirake neierei ni kakaai aroia. Ngke e a bungi taai, ao a bane aomata ake iai aia aoraki ni uotiia nakoina. Ao E katokai baina i aoia ni kabaneia n tatabemania, ao E kamaiuia. Ao a otinako taimonio mairouia ake a maiti, n takarua ni kangai: “Bon Natin te Atua Ngkoe.” Ma E kamatoa banana nakoia ba a na aki taetae, ba a ataia ba te Kristo ngaia. Ngke e a ingabong, ao E nakon te tabo ae aki kakaai. A a tabe te koraki ni kakaaea, ao ngke e a reke, ao a kan taua ba E na aki kitania. Ma E taku nakoia: “I riai n taekina naba te rongorongo ae raoiroi nakoni kawa nako, ae taekan Uean te Atua, ba boni ngaia bukini kanakoau.” Ao E wakina ana reirei i nanon tinakokani Kariraia.
Tibatiba: Te kakaonimaki ni makuri ibukin te Uea n ana akoi ae kororaoi