Wiki 22 Kanimabong.
Warekan ana Reta Bauro nakoia I Korote.1: 15-20
Iesu, boni katotongan te Atua ae aki noraki, ao bon te moa ni bungiaki i buakoia akana karikaki, ba a bane ni karikaki i bukina bai akana i karawa ao i aon te aba, baika noraki ma aika aki noraki, Kaintoka, Toka, Tautaeka ma Maka; a bane ni karikaki irouna ao i bukina. Iai Ngaia i maini bai nako, ao a bane bai n teimatoa irouna. Boni Ngaia naba atun te Rabata ae te Ekaretia. Boni Ngaia moani bai, ao te moa ni bungiaki mai buakoia mate; e riai ba E na rimoa ni bai ni kabane, ngkai E tangiria te Atua ba e na maeka i nanona te kororaoi, ao a na bane bai n raoiakinaki irouna ao nakoina i karawa ao i aon te aba, ngke E karekea te raoi ni matena n te kaibangaki.
Taramo 99: 2-5
Kaekana: Kawara te Uea ma te kimareirei.
Kam na toro iroun te Uea ma te kabaia, nakoina ma te kimareirei.
Uringnga ba te Atua Ngaia ae te Uea, E karikira, ao ana bai ngaira,
ana botanaomata ngaira ao tibun ana nanai. K
Nakoina ma te katituaraoi, rin ni mwengana ma te anene,
katituaraoia, neboa arana. K
Ba E akoi te Uea, akea tokin ana tangira,
E kakaonimaki n roro nako. K
Alleluia, alleluia.
I onimakina te Uea, I kakoaua ana taeka. Alleluia.
Euangkerio
Warekan ana Euangkerio Ruka…5: 33-39
A kangai Baritaio ma tani koroboki nakoni Iesu: “A bati n aki mamatam man n tataro ana reirei Ioane, ao ai aroia naba aia reirei Baritaio; ao a amamarake ma ni momoi am reirei!” E kaekaia Iesu ni kangai: “Kam tangiriia raon te tia iein ba a na aki mamatam ngkana e mena i buakoia te tia iein? E na roko taina: ngkana e uotaki nako te tia iein mairouia, ao ngkanne a na aki mamatam.”
E taetae ni kaikonaki naba nakoia ni kangai: “Akea ae raea te moti man te kunnikai ae bou ba e na itua n te kunnikai ae e mane, ba e raeaki iai te kunnikai ae bou, ao e bobuaka te moti ae bou ma te kunnikai ae mane.
Akea naba ae atoa te uain ae menai i nanoni batoro aika mane, ba a tabwenaua batoro n te uain ae menai, ao e baro te uain ao a bua batoro. Ma e riai n atoaki te uain ae menai ni batoro aika bou. Ao akea ae tangira te uain ae menai ngkana e a tia ni moi n te uain ni ikawai. Ba e kangai te taeka: “Ae raoiroi bon te uain ni ikawai.”
Tibatiba: Ti karikaki iroun ao ibukin Iesu are iai Ngaia ngkai, ngkoa ao n tai nako ba bon te Atua Ngaia
Tariu ao maneu bon aio te koaua ae kakawaki ibukira ba ti na ataia raoi ba tera raoi oun ana kantaninga te Atua ngke E karikira nako aonteaba. Eng te moan kantaninga ae ti riai n ataia ba ti karikaki ibukin te Uea ao nanona ngkanne ba ti riai ni kaburei maiura nakon Iesu ba E na tautaeka iai ao e na riki Ngaia ba ara Uea ao ngaira ti na riki ba ana toro. Ao ngkana ti karikaki ibukin Iesu ao a na riai n riki maiura ba ana bai Iesu ao E na riki Ngaia ba Atuara ao ngaira ba ana botanaomata. Ti bon riai ngkanne ni kabanei maiura aio n neneboa te Atua ao ni kakaraoa ae Nanona. Te bai riki teuana ae ti riai n ataia ba bon antai ngaira, ti nako ma ia ao ia tokin kawaira. Eng n te boki ae karikan baai ao ti ataia ba ngke E moan karikira te Atua ao E buabuaira moa man te tano ni karikira ba katotongana. Ngke E a rau nanon te Atua ba ti a roko raoi ni katotongana ao te kabanea ni bai ae karaoia ba E karina te ikeike inanon bairira ba ti aonga ni maiuna maiun te Atua are nanona ba e a rin inanora te Maiu n Atua. Ti noria ngkanne ikai ba ngkana ti kan karekea te maiu ae akea tokina ao ti riai ni maiuakina te Maiu n Atua are ti anganaki. Inanon te babetito ao ti kabaeaki ba ti riai ni kawakina itiakin te maiu are ti a ti a n anganaki ba ti aonga ni kateimatoa te aro n natinaki are E a tia n anganira Iesu ngke E maraki, E mate ao E mangauti. Bon ana kantaninga te Atua ba n te taina ao tin a roko i Karawa ike ti na reitaki iai ma anera, Nau Maria ao kain karawa ni kabane n neboa te Atua ae moan te maka, moan te mimiting ao moan te kakannato ae te Teniman Temanna ae te Tama te Nati ao te Tamneu ae Raoiroi.