Wiki 25 Kanimabong
Warekan ana Boki te burabeti ae Akai..1: 15; 2: 9
N ana kauoua n ririki n uea Taraiati, n te bong are te kauabui ma teuana, n te kaitiua n namakaina, ao e uotaki ana taeka te Atua iroun te buraeti ae Akai, ni kangai: Taetae nakon Terubabera ae tautaeka i aoni Iuta, ao nakoni Iotua ae te mataniwi ni berebitero, ao nakon te koraki ni kabanea. Ko na kangai:
“Antai te nikira n aomata i buakomi ae a tia n nora te Uma aei ni moan tamaroana? Ao e kanga taraana iroumi ngkai? Ma ngaia ae kamarurungko, Terubabera; kamarurungko, ngkoe botanaomatan te aba ni kabanea. Kam na makuri, ao bon raomi Ngai. Bon ana taeka te Atua. Bon anne au berita ma ngkami ngke kam otinako mai Aikubita. E mena tamneiu i bukoami, tai maku. Ai ti teutana riki, ao N na keieiea karawa ma aonaba, ao marawa ma aon te aba. N na kamakuria botanaomata, ao N na kaona te Uma aei n te mimitong. Au bai te tirewa, au bai te koora. Bon ana taeka Uean aonaba. A na bati riki mimitongin te Uma aei rimui nakoni mimitongina are rimoa; Ao N na karekea te raoi n te tabo aei.’
Te Taramo 42: 1-4
Kaekana: N na neboa te Atua ae au Tia Kamaiu.
Te Atua, kaeta taekau, Ira tangau ni kaitara te botanaomata ae buakaka.
Kamaiuai mairoun te aomata, Ae kewe ma ni kamane. K.
Boni Ngkoe au nono, te Atua, E aera ngkai Ko kitanai?
E aera ngkai I a tiku n rawawata, ma ni kamarakaki iroun te kairiribai? K.
Kanakomaia am ota ma am koaua, Ba a na kairai ma ni karokoai
n am maunga ae tabu ao n umam. K.
Ao N na kawara baonikarean te Atua, Ae boni Ngaia kabaiau ma kukurein nanou.
N na neboiko n te anene. K.
Alleluia, alleluia.
Te Uea, kauki nanora n ongora n ana taeka Natim. Alleluia.
Euangkerio
Warekan ana Euangkerio Ruka..9: 18-22
N te bongina, ao E tataro Iesu n te tabo ae raroa, ao raona ana reirei. E titirakinia ni kangai: “A taku te koraki ba antai Ngai?” A kaeka ni kangai: “Ioane te tia Babetito; ao a taku temangina ba Eria, ao temangina ba temanna te burabeti ni ikawai ae a mangauti.” E kangai nakoia: “Ao ngkami, kam taku ba antai Ngai?” E taetae Betero, ao e kaeka ni kangai: “Ana Kristo te Atua.” Ao E kamatoa ana taeka nakoia ba a na aki kaongoa temanna taekana. E manga taku: “E riai ba E na bati ni maraki Natin te aomata, ma ni kakiaki irouia unimane ma mataniwi ni berebitero ao tani koroboki, ao E na kamateaki, ao E na mangauti i muin tenibong.”
Tibatiba: Kam na makuri, ao bon raomi Ngai. Tai maku ba E mena tamneiu i bukoami.