Avenete Wk 4 Moanibong
Warekan ana Boki te Burabeti ae Itaia. 7: 10-14
E taetae te Uea nakon Akati, ni kangai: “Butia te uea am kanikina teuana, mai mone i nano ke mai karawa i eta.” Ao e taku Akati: “N na aki bubuti, N na aki kata te Uea.”
Ao e kangai Itaia:
“Ongora, ngkami ana utu Tawita: A aki toki nanomi ni kakuaia aomata?Kam na kata naba Atuau? Ma ngaia ae bon te uea ae na angani ngkami te kanikina. Ba e na kariki te ataeinaine, ao e na bungia natina te mane ae na aranaki ba Emmanuera, ae nanona “Te Atua-I-buakora.”
Te Taramo 23(24): 1-6
Kaekana: Ke E nakomai te Uea ae mimitong.
Ana bai te Uea aonaba ma kanoana, aon te aba ma kaina nako.
E kateia Ngaia i aoni marawa, E katoroa i aoni karanga. K
Antai ae na ararakea ana maunga te Uea? Antai ae na tei n ana tabo ae tabu?
Ana e aki bure baina, ae e itiaki nanona, Ane aki ri ni baika akea maneia. K
E na reke kabaiana mairoun te Uea, Ao kaniwangana irou te Atua are kamaiua.
Bon anne aroia akana ukeria, Akana ukera matan Atuani Iakoba. K
Alleluia, alleluia
Nakomai, ana king Tawita Ae ko kauka mataroan te Abanuea: Kabaraia taenikai man te ro ao te mate. Alleluia.
Euangkerio
Warekan ana Euangkerio Ruka. 1: 26-38
E kanakoaki te anera ae Kabiriera iroun te Atua nakoni kawani Kariraia ae arana Natareta, ba e na nakon te ataeinaine temanna ae kainrouaki ma te aomata ae arana Ioteba, are kain ana utu Tawita. Ao aran te ataeinaine, Maria. E nakoina te anera, ao e kangai nakoina: “Ko na mauri, ngkoe ae ko onrake n te karatia; E mena te Uea iroum; ko karaoiroaki i buakoia aine; ao e karaoiroaki uani birotom.” Ngke e ongo anne, ao e nako nanona, ao e taku n ana iango ba tera te kamauri anne. Ma e taku te anera nakoina: “Karaua nanom, Maria, ba ko akoaki iroun te Atua. Noria, ko nang kariki, ao ko na bungia natim te mane, ao ko na aranna ba Iesu. E na kakanato, ao E na atongaki ba Natin Teuare Moan te Rietata; ao E na anganna ana kaintokanuera Tawita are tamana te Uea ae te Atua. E na uea i aon te utu ae Iakoba n aki toki, ao e na akea tokin ueana.” Ma e taku Maria nakon te anera: “E na iranaki ni karaoaki anne, ngkai I aki ata te mane?” E kangai te anera nakoina: “Ane e na ruoniko te Tamnei ae Raoiroi, ao e na rabuniko makan Teuare Moan te Rietata. Ai ngaia ae e na moaniban te raoiroi Natim, ao E na atongaki ba Natin te Atua. Ao ae e a karika naba natina te mane neiere am bu are Eritabeta ngkai e a unaine, ao ai ana kaonoua n namakaina aei neiere atongaki ni kanoabo; ba akea te bai ae aki konaki iroun te Atua.” Ao ngkanne e kangai Maria: “Ana toro te Uea ngai: e na karaoaki nakoiu n ai aron am taeka.” Ao e a kitanna te anera.
Tibatiba: Ana toro te Uea ngai: e na karaoaki nakoiu n ai aron am taeka
N te bong aio ao ti moana ongorara ni kanoan te bai ae riki inanon tain te Kiritimati are bon taekan rinean Nei Maria ibuakoia aine ni kabane ba e na riki ba Tinan Iesu ae te Atua ni koaua. Ikai are ti ongora aron moan reken Iesu ba E na roko iaon te aba ao E na maeka ibuakora inanon biroton Tinana Nei Maria. E a moanaki inanon te karaki te bitaki ae moan te bubura n rongonrtongon te aonnaba ba e a roko i aonteaba Iesu ae te Messia ke te tia kamaiua aonnaba. Tariu ao maneu inanon te karaki aio ao ti ataia ba e kanga n roko te kamaiuaki n te aonnaba. Bon man kaekan ana kamauri te Atua iroun Nei Maria are e kangai “Ana toro te Uea ngai E na karaoaki nakoiu n ai aron am Taeka.”
Eng ti ongo inanon te KAEKA ana ENG Nei Maria nakon ana rongorongo te Atua. Ti ongo inanon te kaeka aio ana anganano ao ana tauraoi Nei Maria ni kabonganaki iroun te Atua ibukin ana kanatninga te Atua. Ti ongo ao ti nora inanon ana kaeka Nei Maria aron te ONGOTAEKA ae kororaoi ae boto iaon te nanorinano ao te onimaki ni koaua.
E reireinira Nei Maria ikai ba ngkana ti kan butimaea ao ni kaoa Iesu te Tei nako Nanora ao ti riai ni katotonga Nei Maria n angan Iesu ara ENG ba ti na riki ba tabonibai ngaira aika ti tauraoi ni kabonganaki Irouna ibukin karaoan Nanon te Uea.