E kauringira Iaokobo n ana reta n bong aio aron ana urubai te newe are kabotaua ma aekan te makaro n ai are kona ni kaurarakea te buakonikai ae bubura. Tariu ao maneu I taku ba ngkana ti karaua n tuoa raoi aron ara kekeiaki ni maiura ni kiritian ao ti na kakoaua aron te bai ae taekinna Iakobo ba e bon e kaeineti naba nakoira n tatabemanira. Ti na kakoaua ba bon aio raoi ba oin mamara teuana bon kabonan newera ibukin te riaboro ke te winnanti. A bon bati taai aika ti a tia ni kabonganai iai newera ibukin kabuakakakia raora ke ibukin kamoamoakira. Aio e bon kaeineti naba ma ana taeka Iesu are kangai; "E aki buakaka te bai ae rin inanon te aomata ma bon te bai are otinako mairouna.
E bia reke te reirei aio ba teuana kanoan ara motinnano n tain te karemo. Ti na butia te Uea ana buoka ba ti na kabonganai raoi newera ibukin neboana. Ba ngkana ti ongotaeka Irouna ao ti kakaraoa nanon te Atua ao ti riki ngkanne ba mimitongin te Atua i aonteba. N aron are kataua Iesu ba a nora mimitongina Betero, Ioane ao Iakobo n te maunga are Tabora ao bon nanon naba Iesu ibukira ba ti na uouota n taai nako otana ao raneaneana nakoia ake ti kaitibo ma ngaia. Ti na kawakinira n taai nako ba a na aki reke newera ba ana bai te riaboro ma a na riki ba bon ana bai Iesu n ti ngaia.