N reitan tibangara inanon te karemo ao ti a kauringaki n te bong aio ba ti na riai ni baina te nanoanga. Ngkana ti kan karekea te maiu ao ti na riai n ata raoi nanon ana taeka Iesu aikai ba ti kairoroaki iai. Te nanoanga bon ngaia teuana mai ibuakon taian aro ni maiu aika raoiroi aika ti na riai ni maiuakin ibukin karekean te maiu ae akea tokina. N te tibatiba teuana are I karekea mairoun Akorita Teebanako are e rang teke nanou iai bon te rongorongo ae kangai ba "ti na riai n karemo ke n taubang man te kairiribai ao ni kanuaira n te tangira ma te nanoanga " ao manga teuana riki ae kangai, "ti na riai naba ni karemo ke n taubang man motikan taekaia raora ao ti na barua ke ni kanuaira n te tataro ibukia ara kairiribai".
Tariu ao maneu e koaua ba mai buakon mamarara ae ti ataia ao bon aikai aika a toki n okioki- te kairiribai ao te rawa ni kabarai aia bure raora, ao ai te tauraoi ni kabuakakaia ke ni motikii taekaia raora. Ti na riai ni butia te Atua ba E na kabarai ara bure man ara bure ni kairibai ao ni motikii taekaia raora. N aron te taeka ni moan kaukan te karemo are kangai, " Bon aio te tai (ae ngkai) ae moan te angaraoi, bon ana tai ni kamaiura te Uea", ao ti riai ni motikia ba ngkana iai ae ti ataia ba ti riribaia ao e bia reke te tai aio ba ti na tangiriia ao n nanoangaiia n airon ae tuangira Iesu n te bong aio. Irarikin anne ao ngkana ti karaua ni iangoa aron te bai ae te kairiribai ao ti na kunea ba raona n taai nako bon te motiki taeka. Ma E kauringira naba Iesu n te bong aio ba ti na aki motikii taekaia raora ba ti aonga naba n aki motikaki taekara iroun te Atua. Ba n aron are ti motikii iai taekaia raora ao anne are e na bon motikaki naba iai taekara iroun te Atua. Ba te aomata ae motikitaeka bon te aomata ae taku ba akea ana bure ao te tia kewe. Ba akea ae kororaoi ma bon ti te Atua.
Tariu ao maneu ti na keiakina te motinnano aio inanon ara karemo aio ba ti aonga ni namakina te mate n nanora ao ni kona ni katonga te mangauti ma Iesu inanon Bakate.