Kam na mauri tariu ao maneu n ana tangira te Uea,
N te Tutia i Teaoraereke n te bakantaai aei ao e karaoaki te Toa ae Waeraken Iesu nako Karawa. E karaoa te Tutia Tamara ae karineaki Fr. Koru. A bon bati ake a roko ni kaea te Tutia ba e bon rokoroko i buki te koraki man kan bane n toki te koraki irarikin te aubunga n ran tabu. Ti karaba te Uea n maeun ma kakamamakurin Tamneina n ana tangira inanoia aomata ao riki inanoia kain te charismatic mai Betio nako Bikenibeu.
Ti karaba naba te Uea n ana tangira ibukin ungan nanoia taan makuria umana ae te Cathedral i Teaoraereke ba e a kan bane n nim aia taira (tiles) ni karokoa ae e buta nanon te umantabu. E a kebo ni karokoa n nen te ran tabu aio ba e moanaki mai i moa. Ti a taia ba ngkana e tia ae te make aio ao e na manga nakon are iteran te umantabu ake uoua ake a memena iai kaara ao are e kaitara.E raba te Uea!
N tain ana kaotioti te Tama Koru ao e katereterea kakawakin taian kaubaira ibukin te maeu ae e na roko. Oin waeraken Iesu ba e na katauraoa ara tabo i Karawa ao e na kanakoa te Tia Buobuoki. E rangi n teke nanou n ana taeka ae e kangai tai tabe ni katikiraoa mwengam iaon te aba aei ba bon akea manena ae ti na bon bane ni mate...tabeakina riki mwengam are i Karawa ba abara ni koaua bon Karawa.
Iai kukurein nanou n ongo ae bon abara ni koaua Karawa. I uringi au wareware n ana koroboki Santa Teretia n Iesu te teei ma Santo Padre Pio are a ingainga nanoia ni kan kaea te aba are Karawa. A kaota mataiakinan te kan roko ikekei ma te aki maaka te mate. I a tia n iaiangoa te mate ma makun nanou ni kan reita nako au iango ibukina ba are I bon makua man rawa ni mate.
E raba te Uea n ana kaotioti te Tama ba e amanga kaunga nanou ni kan kekeiaki man katikiraoa mwengau are i Karawa ao riki man katauraoai ni butimaea te mate ba ngaia e bon aki kakamaku. Ti a tataro inanon te wiiki ae e boou aio ba ti aonga n anganaki te tauraoi ni butimaea ana wewete te Atua ba bon weteara nakon abara are i Karawa. Irarikin ara tataro ibukin aei ao ti a bubuti riki ibukin katauraoara imwain rokon te Tamnei ae Raoiroi. A bia raoiroi nanora ni kabane imwain butimwaean te Tamnei ae Raoiroi ba e aonga ni maeka ni koaua inanora.
Kam na tekeraoi ibukin ami katauraoi imwain te Pentekota n te Tabati ae imwaira.