Ni kawaran Iesu n te umantabu, ao a maiti man kakaokoro bukin rokora nakoina n tatabemanira nako.
Ma n tainako ngkana ti kawaria, ao ti teuana ana kaeka Iesu nakoira are moan te kamimi man rangi n nano, ba e bon nako mai kabin nanona, mai kabin Atinibanna ae koburake n ana tangira nakoira, ae te taeka ae kangai n te taetae n Imatang, “You have my Heart” ke ‘Iroum Nanou”.
Ni kabane ara taeka ni bubuti, tabeaiangan nanora, tangitangira nakoina ni kabane, ke nanora ni kakatituaraoia man neboneboia, ao e bon kaekai Iesu ma ana taeka anne.
Ti na kona n ataa raoi nanon Ana Taeka Iesu aio ngkana ti karaua n iangoia, ba e bon nangi n nano ao e nangi n korakora aron kabaranakoana, ba e moa man ae e kangai : Nanou iroum, au tangira iroum, au tangira I anganiko, nanou am bai, ngkana am bai nanou, tera ae kona kainnano man rawawata iai, kawakina au tangira ibukim, aio nanou ao kabuako inanon au tangira. E kona naba ni kangai nanona ,’ Tai karawawata nanou, kabebetea nanou, e korakai nanou”……..
Aikai ana Taeka Iesu nakoira n tatabemanira n te wiki aio ae wikin te Toa ae Rab’atan Christo’ ke ‘Corpus Christi’.
Ti kakabaiaki ba e kataua ba e na maeka ibuakora Iesu ae Atuara ao e kataua naba ba E na anganira rabatana ma rarana n te Eukari ae moan te tabu, ni koaua, ti kabaia ba kaekan ara tataro ni kabane Irouna bon akea ba bon Ngaia, ae Atuara.
I karabako Iesu, I neboiko Iesu , I katituaraoiko Iesu. Alleluia, Alleluia, Alleluia.