Kanan Tamneira...

Mauri tariu ao maneu n ana Tangira ara Ara Uea Iesu, E okioki inanou te kibu n taeka ae kangai: Ko kona ni kangai, “I aki noria”, ma ko aki kona ni kangai, “I aki ataia”. E weteira Iesu nakon te maiu ae e botau ma nanona n tainako. E anganira buokara ana Tua ake 10 ao ana Tua te Ekaretia ba kairan maiuna nakon nanona. Ana tua aikai bon ngaia ake a matemate ibukina ana Burabeti n tai aika a nako, e ngae ngke a ribaki ke n kamateaki, ao bon ana aomata naba n tai aikai, aika bon ngaira ni kabane, aika ti kan irira Iesu ibukin ana Tangira, are ti maiu man makuri inanona. E maeka ni koaua ana Tua te Atua, inanoia ana aomata, ba e aki mena i tinanikuia n te aro ae a ti tataekinna ke n tarataraia. A m’akuria ni koaua ana Tua te Atua, ana aomata te Atua, ibukina ba e aki mena i tinanikuia ba e kaira maiuia, mai inanoia. Ibukin anne ao a bon nori bai ni kabane, aika aki botau ma nanon Iesu. A makuria, nakon te kabanea n tamaroa are a kona, ni kairaki n ana Tangira ma ana Tua te Atua ba anganaki te onimakinaki iroun te Atua ao a karaoa nanon te Atua, ma te onimaki ao te aki barannano, ibukon te kaitara ke te kanganga. Ngkana ti kan irira Iesu ni koaua ao n roko irarikina n tokin kawaira, ao ti bon riai n aki kangai, “I aki noria”, ibukina ba ti aki kona naba ni kangai, “I aki ataia” n rokora imatan Iesu, ba e a kaman nori nanora n tainako Iesu. Ti uringia raora aika a babaka ni mataki, ao bon ngaira riki. Ti na butia Iesu ba e na buokira, ba tina aki tannako, ma ti na keiakina te kabanea n tamaroa ae ti kona ni karaoia, nakon baika ti nori ba aki raoiroi imatara n tainako, ni kairaki n ana tangira ma ana Tua te Atua ao te Ekaretia ba tina bane ni kamaiuaki.