Mauri tariu ao maneu n ana tangira ara Uea ae Iesu,
Inanon te wareboki n te Baibara, n te boki ae Etita, ao ti kona ni wareka taekan wanawanan te aine ae Etita.
Ni makorona ae “E roko Etita imatan te Uea,” ao ti nora iai aron tauraoin ma ninikorian Etita ni waki nako matan te Uea ae Atueruti ba e nang iangoa kamaiuiaia ana botanaomata ake a nang bane ni kamateaki n ana waki ni kairibai Aman ae temanna ana tabonibai Atueruti. E taekinaki ba e kanako taeka Etita nakoia ana botanaomata ba ana reitaki inanon tenibong n tataro ma ni kamangoria ao n aki mamatam imatan te Atua, ma te nano ni koaua. Ngke e a koro tenibong ao e a mananga ma te ninikoria ao te onimaki.
E taekinaki imain te makoro aio aron ana tataro Etita nakon te Atua ao ibuakon ana taeka ao e kangai nakon te Atua, “Anganai te ninikoria ngkoe aia Uea atua ao mataniwia tan tautaeka. Wiwinai taeka aika a tangiraoi ngkana I kaitaraa te Uea ae Aatueruti. Bita nanona nakon ribaakin aiara ae Aman ba e aonga ni kabuanibai ngaia (Aman) ma raona ni bane.”
Tariu ao maneu iai te iango ae moan te nano man kakawaki man te taeka ae wiwinai taeka aika a tangiraoi ba ti kona nora iai bannan te WANAWANA are e reke iroun Etita, ae bon mai iroun te Atua. Ngke e a tia ni katauraoia Etita ao e nang mananga nakon te Uea ao e taekinaki ba “ E koro tamaroana, ao e raneanea matana n te kukurei ma te tangira ma e koro te maku inanona.”
N rokona imatan te uea are Atueruti ao e bitaki nanon te Uea nakon te nimamannei ao te tangira ae koro ao e ongo ana bubuti Etita ao a maiu ana botanaomata Etita ae Iteraera.
Tariu ao maneu, aio teuana te wareboki ae aki toki n okioki inanon te nebonebo ao tao iai nanon ara Uea ae Iesu iai nakoira ni kabane. Bannan Etita aio bon te banna ae tangiria Iesu ibukia ana tabonibai ake e a tia n rineia ba taan kairiiri, aika a na kamaiuia ana botanaomata te Atua. Aio naba te wewete nakoira ni kabane ngkai ti bane n kairiiri ni kabane, man te utu, n te botaki, te kaawa ao te tautaeka. E anganiira arora n tataro, te kamangorira ao te aki mamatam ma te nano ae koaua. Ao ti na waki ma te onimaki ba e na wiwinira te Atua ara taeka ma arora ao ti na tokanikai iaon aiara ma kanganga aika a na kaitaraira, tiaki man korakorara ma ni korakoran ao m'akan ara Uea ae Iesu.
Ti na bubutia te Atua ana karatia ba ti na kona n uringnga n tainako n okirikaaki nakoina n aron Etita ao n aron ana rongorongo Tinara Nei Maria ae e teimatoa ni bubutira, te maiu n tataro ao te aki mamatam, ba ti aonga ni karaoa ara makuri ni kairiiri ni koaua (n aki manikangare) ao ma te korakora, te ninikoria ao te wanawana mairoun te Atua n tainako.