Kanan Tamneira...

E bae ni kauraki te taura ao e katokaki n te tabo are e na noraki iai otana. Aio kanoan ana taeka te Uea nakoira n te Tutia n te bong aio. Ai bon aron naba ara Uea ae Iesu n aron matena ibukin kamaiuara. E karietaaki n toka ieta iaon te kaibangaki. E kianako m'akan ana nanoanga ma ana kamaiu nakoira ao ti a bane ni baroaki, ma ni kamaiuaki. Iai ara tarena n tatabemanira nako aika e a tia naba te Atua n anganira, ibukin kakororaoan tibangara ni buoka ana kamaiu Iesu aio. N aiaron nanon Tairati are uean Botika, e ongotaeka ngke e karekeaki nanona iroun Iawe ba e na katea ana temboro i Ierutarem. E anga ana katanoata Tairati, 'Ngkami ni bane aika ana botanaomata, ke e mena Atuami iroumi, kam na waerake nako Ierutarem n te aba ae Iuta ba kam na katea ana temboro Iawe iai.' A bane te koraki ake a maeka irarikia ni karekei buokaia aika a rangi ni bati, ba te tirewa ma te koora, aia tianaki ma aia man ao bai n tangira ake a kakawaki ao taian karea naba ibukin te temboro, Ti a bubutia te Atua ba e na karekei naba nanora ao n anganira nakoara ibukin katean ana temboro iaon te aba ao inanora ma nanoia tarira ao manera nako. Ti a bon bubutia naba te nano n tituaraoi n ara kaubai aika iroura, aika ara bai iaon te aba ba buokan ana makuri ao ara kaubai ni maiura n tataro ba ara karea inanon ana temboro.