Kanan Tamneira...
- Details
- Written by Beneteta
Kam na mauri tariu ao maneu n ana tangira te Uea.
Ai raoiroira te rongorongo n te bong aio ba ti kauringaki ae e kakawaki ba ti na rairi nanora. Ma ti riai n ataia naba ba bukin tera ngkai ti riai n rairi nanora. Bon bukin ae e tangiria Iesu ba ti na rairi nanora ba e tangirira. E tangiria ba ti na kamaeuaki. Bon anne nanona.
Ara bai ba ti na ota n nanon Iesu aio ao ti na kariaia ba ti na butimaea ana taeka ni kauring, e bon riai ba ti na rairi nanora. Ni kaukan nanora ao ti kaotia ba ti kan toma aron ana tangira Iesu nakoira. Ti kariaia ba ti na kamaeuaki ba ti oota n aron tangirara irouna.
E a tia ni katerea nakoira ba ti na riai ni mataiakina kaubai are tiaki n te maeu aio ma bon kaubain te maeu ae e na roko. Ba n te maeu ae e na roko ao ti na bon tiba iai te tangira ae e kan kaokaotia nakoira ngkai n ara tai ni maeu iaon te aba.
Iesu, ai nanora am tangira ibukira! Ba bon nanom ba ti na bane ni kamaeuaki man reke abara irarikim i Karawa. ti kaitauko n am tangira aio, ko a tia ni mate ibukira ni kabane n akea ae e na kaokoroaki ba ni matam ao ti na bon bane ni kamaeuaki iai. Anganira te nano ni kan butimaea am kamaeu nakoira ma am kauring ae ti bon bane n riai n rairi nanora. Ko a tia naba ni kauringira ae ti aki kona n ata am tai ni weteira ngaia are ti riai n tatauraoi imwain rokom ni wewete. Kariaia Iesu ba ti na bane ni botaki irarikim ma Tinam Nei Maria ma kain Karawa ni kabane man reita te nebonebo are bon neboam ma Tamam ao te Tamnei ae Raoiroi. Amen.
- Details
- Written by Beneteta
Bon nanon te Uea ba ti na atai kanikina ake ti na noori ao man namakini ni maeura. E anganira te rabakau ni kinai n aron ae e anganira te rabakau n ata kanoan te bong ma warekana ibukin katautauan te buaka ma te raoi. Taan borau a babairei boborauia inanon marawa man kinnakin kanikina ake a noori ke n namakini. Ai uana naba ma taan akawa ke taan ununiki.
E raoiroi ibukira ba ti na aki ti kinai aikai ma e bon riai naba ibukira ba ti na kinai kanikina ake a na karekea te mweraoi ni maeura ke a na karekea te reitaki raoi ma raora. E kangai Iesu e raoiroi ibukim ba ko na rabakau n raoiakina arom ma raom ba e aonga n te taina ao ko na rabakau naba n kina te tai are ngkana e na kateiko raom n te boowi ao ko na ataia mani kinaa ba e kakawaki ibukim ba ko na karekea te raoiakinaki ma teuare ke neiere e na kan kateiko n te boowi. Kawanawanako ni karekea te kaiokaki ni moantaai ba e rawa n reke ae ko na aki kona n taona nako karinakim n te karabuti.
Bon te kaunganano nakoira ba ti na riai n tataroakina arora ni kona n raraoiakina arora ma raora nako ba ti kaawa n te taina ni motikaki taekara man kabureaki n ua banen tuara n akea n tiku.
Ti a bubutia Tinara Nei Maria n ana namakaina aei ike e kaotaki iai ba bon ngaia Uean te Rotario ba e bia raoraonira n taai nako man reireinira arora n tangira natina ni koaua ba ti aonga ni kona n tangiria raora ni kabane man noria n aki toki ae e kakawaki ba ti na maeu inanon te itangitangiri ni koaua. Ke e neboaki ana tangira ara Uea ae ngaia Atuara ao ara Tia Kamaeu inanon atakini kanikinaean te tai ae ngkai. Amen.
- Details
- Written by Beneteta
E tabe nanou n ana taeka Iesu nakon Betero are e kangai "Te Tabonibai ae e ata nanon ana toka, ma e aki tauraoi ni ira nanona, ao e na bati oreana..."
I ataia ba ngkami ao ngai, tariu ao maneu, iai otara n te evangkerio n te bong aio are e koreia Santo Ruka man kauringira iai ana taeka Iesu ibukin te Tabonibai ae e kakaonimaki. E tangirira Iesu ba ti na tatauraoi n taai nako ba ti aki kona n ata te tai are e na weteira iai Atuara. Ti bane n ota ae n te tai teuana ao ti na bane ni mate ba te tai aio are e a weteira iaiAtuara ba ti nang riai n tei imatana man ongora motikan taekara iai.
A rawata ongoongorara n ana taeka te Uea ba e katoa ririki okiokiran ana taeka ike e kauringira man boaira ba ti na aki tabe akina kaubain te maeu aio ba ti aonga n tabeakina katauraoan arora n te tai are e na weteira iai.
Ibukina ba ti a tia n ongo ao ti a ota iai n te evangkerio n te bong aio ao e kauringira ba e na bon bati oreara ngkana arona ba ti aki tauraoi nakon weteara.
I taku ngai ba I maku n te kauring aio ao e raraoma nanou man taku ba tera ngke e tuangai Atuau ae e nang weteai ao e kotea te bong ma te tai are e na roko iai te wewete aio. Ma tiaki ngaia aio ba e bon tia n tuangira ae ti aki kona n ata te tai ma te bong. E na roko weteara ba kanga te rongorongo ae e raba.
Tera ngke e tiku inanora ni kabane te tabeaianga aio ke te maaku aio ba ti aonga n tabeakina aron ara katauraoi ni koaua imwain weteara. Ti na boti nanora man butia ara Uea ao ara Tia Kamaeu ae Iesu Kristo ba e na bon aki bobotu iroura man kateimatoaira ba ti na waaki inanon te kekeiaki ni katauraoira raoi ni koaua. Ti na bon onnonia ma te nanorinano ba e na bon nanoangaira ao e na kariai ba ti na bane ni ikotaki irarikina n tain weteara nakon te maeu ae e na roko. Iesu ae ko on n te tangira kateimatoa nanora ni kan riki ni koaua ba Tabonibai ake a kakaonimaki n taia ara tianaki nakoim ba ti aonga ni bane ni kukurei ma ngkoe i abam i Karawa. Amen.
- Details
- Written by Beneteta
N rokon Iesu irarikira ao uotana bon te ai. Ao e taku ba e bon rangi ni korakora nanona ni kan kaurarakea te aonnaba n te ai aio!
Ma tera ae e nanonna Iesu ni kan kaurarakean te aonnaba? E kan kabuekira man urui mwengara ma maeura n ana ai aio? I taku ba ae e tangiria Iesu ba e bia urarake nanora n tangirana ba ti aonga ni kabatiai ara waaki rinanon nako ara baeriti are e na kaota iai kororaoin ara tangira ibukina.
E a tia Iesu ni kaota nakoira aron ana tangira ibukira, bon te tangira ae e aki kona ni kakeweaki, bon te tangira ae moan baan te kororaoi. Ti a tia n tuangaki ba ngkana iai ae e kona n anga maeuna ibukin tangiran te manna ma temanna ao aei are bon karaoan ao kakororaoan te tangira ae moan baan te tikiraoi. Maeuna aio are e bon anga ibukin kamaeuakiia ana botanaomata. Aomata ni kabane mai i tabon te aonnaba nako tabona. Ai bon aki akora!
Te ai ae e taekinna Iesu bon te ai are e na kaurarakea te tangira ae ai aron aio ba ti aonga ni karaoi ara makuri ma tabera ake ti a tia ni muiokoaki iai irouna ma te kukurei, te nanorinano ao te tangira. E bia katauira Iesu ba ti na tangiria ma te aeka n tangira aio. Ngkana e riai aio mai irouna ao ti na bon kaonrakeaki n te tangira are bon mai irouna ngaia Atuara ae te Teniman n Temanna.
Anganira Iesu te tangira ae aekan am tangira ba ti aonga n kona n tangira ni koaua ike ti na kabongana raoi n tangiriko moa boni ngkoe ao imwina ti na kona n tangiria raora n aron ae ti tangirira bon ngaira. Kataurira Iesu ba ti na kaurarakeaki n te ai ae ko roko ma ngaia ba uotam nakon te aonnaba. Amen.
- Details
- Written by Uriam Timiti
Tariu ao maenu aio te titiraki ae kaineiti nakoira n te bong aio. N tabetai ao ti karaua ni iangoia n taku ba arora ao mauira a bane ni boboto iaon kaubain te maiu aio. N te tabetai ao ao ti a bon aki rau man aki mamatu iai ba ti tangiria ba e na tabe n ikoiko kaubaira ba ti taku ba kabaiara ma kororoain kukureira bon man kabubaira aikai. Ma ti a tia ni karaua ni iangoai ba antai raoi ae na baini kaubaira aikai? Eng nakoira ngaira ake ti rangi katabei ara iango i aon kaikoan kaubain te maiu aio ao e bon boaira Iesu n ana taeka nakoira ngkai ae kangai, "Eng ngkoe ae ko baba ni kaikoi kaubain te maiu aio. Ko a ataia ba e nang toki maiun n te tairiki aio?"
Eng tariu ao maneu baai ake ti na bon aki baini baai ake ti kaikoi ni maiura aio a na bon riki ba aia bai tabeman ngkana ti kitana te maiu aio. Ma te bai ae kakawaki riki ba kaubaira aikai, aika a na tiku imuira a na bon akea naba bonganaia ibukin motikan taekara ao karekean te maiu ae na roko. Ti a manga kauringaki ikai ba inanon maiura i aonteba ao ti riai ni kaikoi kaubai aika a na karekea iroura te maiu ae akea tokina. Ti riai karaoi makuri aika botau ma nanon te Atua aika a na anganira te kaubai ngkana ti a tei imatan te Tia Motikitaeka ao a na karekea nakoira te motikitaeka ae moan te kakukurei n riki ba tani baibai irarikin Iesu i Karawa. Ti na kainaomataira mani katabetaben te maiu aio ao mataiankinan baai ae mamauna aio ao ti na kabanei ara tai ni kaikoi kaubain te maiu ae na roko inanon te kabaia akea tokina irarikin Tamara ae te Atua.