Kanan Tamneira...
- Details
- Written by Beneteta
N te bong aio ao e katikaki Tinara Nei Maria ni makoron Teaoraereke man te makoro ae Teitonete nakon te makoro ae Abaunamou. Iai kakan ongoraan aron te katiki ba a amoa Nei Maria n te tai aio aine ake a bane ni bainiia n te uraura ao te mainaina. I tuangaki ae ainen Ana Taanga Nei Maria ao ainen te Botaki ni Charismatic. E ababaki te rain inanon kawain Teaoraereke ao e karaurau butin te nakonako ba tao ibukina ngke aine taan amoa Tinara ae karineaki.
I taku ba iai rakan aron baroakinan katikan tinara Nei Maria. Iai ataei aika ataein te moan rinan reirei, iai naba ake a ikawai ibukin te kauarinan ao ai bon ikawai ma unaine ao unimane. E bon korakora nanou ni kan ataia ba e aera ngkai a ira te katiki aomata aikai. I ataia ae e aki boou katikan Tinara Nei Maria ba bon te maan ni kawai, aia maan Katorika mai imwaaina n rooro ake a nako.
N rokora n aia maneaba kain Abaunamou ao imwain te Tutia are e kairia ara Tama ae karineaki Tama Ruatamaki ao moan te rauaki nanou ngke e taetae teutana iaon aron karinean Tinara Nei Maria ao arona ae e raka inanon te maneaba aei ike a karaoa te katoka bau kain te makoro aio ba butimwaean Tinara ae karineaki irouia. E butimaeaki n te anene are 'E roko Iesu'. Bon ana kimarimari te Tama n aron te butimai ae akea n aron tikiraoina ao e taekinna ba e rangi nikukurei n noran bitakin nanon te maiti n aomata iaon Teaoraereke ni kan rianna man katika Tinara ae moan te tabu ae Nei Maria te Paretenia. E tuangia aomata te Tama ba bon Nei Maria ae ti riai ni mwiokoia ibukin kairan nanora n tangira natina ao n tangiria raora.
Ti bia bane n ringaki n aron karinean Tinara Nei Maria irouia kain Teaoraereke ao man kabanei ara bubuti nakon Tinara ae tangiraki ba e na bon kakairira inanon ara kekeiaki ni kan kina raoi natina ba ti aonga n anganaki te kona n aki maaku man taua bukini Iesu ao man buoka aron kabutaan rongorongona iaon aaba ni kabuta ba ti aonga n te taina ni kona ni manga nora aron katean taekara irouna n te tai ni motikitaeka imataia ana anera i Karawa.
Ana raoi Tinara Nei Maria , Uean te Rotario nakoira ni kabane inanon ana namakina aei. Amen.
- Details
- Written by Beneteta
"Ti a tia n anganaki tibangara inanon Kristo, ba e a kaman rineira te Atua n oin ana baire."
Aio bon kanoan ana reta Santo Bauro nakoia I Ebeto. E rota nanou te kibu n taeka aio ba ngaia e bon kaman rineira te Atua ibukin nanona ae e riai n iraki. Ti bia bane ni kauki nanora nakon aio ao n kataia ni kabanei nanora n ukera nanon te Atua ni maeura ba e aonga n neboaki n aki toki. N ara kekeiaki ni kakaea nanon te Atua ao ti bia bane n neboia n taai nako ni maeura ba e aonga naba n noraki aron raoiroina rinanon ara makuri nako. Ba e bati ni mimitong te Atua ao e riai n neboaki mimitongina rinanon maeura aikai iaon te aba.
E raoiroi iroura ba ti na ataia ae ti riai ni maka te Atua ba bon ngaia muiokon maeura ma arora nako. E tautaeka ni maeura iaon te aba ba are bon ngaia ae e karikira, e a kaman rineira man kinaira imwain bungiakira. Ibukin aio ao bon ngaia naba are e na bon tautaeka naba ni maeura are imwin te maeu aio. Ti riai ni karinea ao ni makua ba bon ngaia ae e na motiki taekara man baireia ba ti na nakea imwin maeura aio. Ti na bon aki tangiria ba ti na kanakoaki nako moone are bon aban te tamnei ae e buakaka. Ti bia bane ni bubuti ibukin temanna ma temanna ba e na aki kariaia Atuara ae e na kanakoa nakon te ai ni moone. Ma e na kariaia ba ti na bane ni ikotaki ma ngaia n abana are e a tia ni katauraoa abara naba iai.
Ke e katauira ni kabane ngaira kain aonteaba aio ba ti na bane ni botaki i Karawa irouna imwin maeura aio. Amen
- Details
- Written by Beneteta
Bon te kabuakaka man kakaniko iroun teuae Iesu ibukia aomata ake a aranaki ba Baritaio!
E kangai " Ai kawara ngakami Baritaio! I norai ae te Baritaio naba ngai, ao ngkoe tariu ao maneu, tera aromi? E taekiniia Baritaio Iesu ba n aia anga kabuian aia bai ao a tikona maitin areTaabati ba are e rawa nanou ngkana I a karenakoa naba te maiti ae moan te bubura. E kukurei riki nanou n anga te maibibi ni mane nakon ae N na anga are te beeba. Ai bon kangangara ke? Ma e taekinaki n te moan wareboki irouia i Karatia ba ngkana raom te Tamnei n taai nako ao moan te aki kangaanga. E bon tuangko arom te Tamnei ae Raoiroi ao E bon karaua raoi ni kaotako ae ko bon riai n angaanga nakon ae ko na ananaia mai irouia tabeman.
"ngkana bon maeura te Tamnei, ao ke e kairira naba te Tamnei'.
Ti riai n uringnga ae a riki mairoun te Tamnei ua aikai: te tangira, te kabaia, te raoi, te taonannano, te akoi, te nimamannei, te kakaonimaki, nanorinano ao te taubang. Bon aikai ae ti riai ni kukurei ao man tangiria ba a na kauaeaki ni maeura.
Ti a bubutia Santo Ignatius mai Antioch are bon ana toa te bong aio ba e bia tataro ibukira ni kabane ba e na maeu nikoaua Tamnein Iesu inanora ba ti aonga ni barua ana kariki ua te Tamnei ae Raoiroi ao man kaoa nako nanora ni katoa bongin maeura ba e na tiku man kabatia ana baintangira nakoira ti aonga ni kona ni kaitara marebun ara marawa ae ti tabe ni borau inanona.
E raba te Uea n ana tangira, alleluia!
- Details
- Written by Beneteta
I kukurei n reitaki ma ngkami tariu ao maneu inanon te bong aio are e kauringaki iai ana Toa Santo Ruka. E rangi ni mataai nanou iroun Santo Ruka are bon temanna mai ibuakoia taan korea te Evangkerio. I taku ba bon te Tia Karaki ao bon te Tia Koroboki naba teuae Santo Ruka. E rangi n rabakau n korea ana karaki are e na kona n kaira iai nanoia aomata man kaotaia n aron te bai are e kan taekinna. Ana karaki ibukin te Nati ae Bakatae bon moan te tikiraoi man kaira nanon te Tia Wareware n nora aron ana te Atua ae bon ngaia te Tama ni koaua. Ngke e nako natina man bakataei ana bai ao e aki tabe iai ma te bai ae e tabe nanona iai aron natina ni manga okiria. Bon te karo ni koaua are e aki toki ni kakantaninga manga okin natina imwin te kariaria ma te aki rau nnano. Ana reirei ri nanon ana karaki a koro aroia. N ana karaki ibukin te ITamaria ae e raoiroi e bon rangi n rabakau n tuangira iai ba te rongorongo ae e kakawaki inanon te karaki bon arora ni kinaia raoraora-ae bon aomata ni kabane. Bon au kaunganano nakoimi ba kam na wareka ana Evangkerio Santo Ruka ao raonai n neboa te Uea n rabakaun Santo Ruka ni karaki ao ni koroboki. E bon taekinaki naba ba ngaia ae e korea Aia Makuri Abotoro. Ai rabara te Uea n tibangan Santo Ruka are ngaia ae e anganira te rongorongo ae Raoiroi ba ti na kamaeuaki iai.
Ti bia bane n reitaki n te tataro nakon Uean te Tai ba e bia anganira te kona n reita te makuri n taia ana Tai. Ti na bon butia te Uea aio ba e na anganira te kona ni kina ae iai tibangara n ana Tai are nanona bon ngaira ni kabane taan tai ao ke e akoira te Uea man anganira te kona ni kabongana raoi tibangara are E anganira man makuria ana Tai ba e aonga n taona nako aonnaba ni kabuta taekana ao rongorongona ae bon Ngaia ni koaua te Atua ae Mimitong man Tabu ao akea riki.
Ke e neboaki man kamoamoaki Atuara ae Teniman n Temanna ao ke e raonira ni kabane te Tamnei ae Raoiroi ba ti aonga ni kona n reita nako kabutan ao tataekinakin te rongorongo ae raoiroi are bon taekana n ti Ngaia ao akea riki. E raba te Uea ao E na neboaki ni maeura ngkai ao n aki totoki, Amen.
Santo Ruka, tataro ibukira.
- Details
- Written by Beneteta
E rangi n ringa nanou atun te evangkerio n te bong aio ae 'Kabonganakin Arani Iesu'. I nonora aron butin te rongorongo iaoia kain te Charismatic ma kabonganan arani Iesu ibukin aia katoka bai iaon te aoraki ke te taniaki. Ti tabo ma kinakia kain te botaki n tataro aio n aroia aei ao e bon rangi n rekreke ma kabonganakin aran Iesu.
N tabetai ao e ongo te aba ba iai te katokabai iaon te aoraki ao ngkekei naba e kangai te koraki, ah kain te Charismatic! N te taina ao e a manga taekinaki naba ba iai te katoka bai n uakan ma te tabo are I makuri iai ao e kangai ngkanne te karaki, kai tiaki kain te Charismatic ba kain te Tanga. E a manga reitaki nako man kangai, ah a na bon bae ni kabongana ngkanne aran Nei Maria. I taku ikai ba ai iai te kaokoroaki. Kain te Tanga a na kabongana aran Nei Maria ao kain te Charismatic a na kabongana arani Iesu!
E bon rangi n rota nanou ba aio raoi bukina ngaira ti bon kai kakatei tua ake ti na bon manga totokoi aron kabutan ana tangira te Uea iai. Ti ongora n te evangkerio ba e kangai Iesu tai tukia ngkana a kabongana arau ba e kaotia ba raou ngkanne. E boaia ana reirei Iesu man kauringia ae tiaki ti ngaia ae a riai ni kabongana aran Iesu. Ane e onimakina Iesu n ana makuri ao e na bon rangi nikukjrei irouna Iesu.
Ti bia aki babaire i bon iroura man baireia ba antai aika a riai ni kabongana aran Iesu. N ara Ekaretia ao a bon rangi ni bati botaki aika a kakaokoro bon aio nanon te Atua ba e kan kabatia te botaki ibukina ba aonga n bane n tibaaki tibangara ake e kaonrakeira iai te Atua ngkana ti kakaea nanona moa. Ti bia bane n anai tibangara man ara botaki aika a kakaokoro ao man aki maku ni kabongana arani iesu ba e na bon makuri inanon ana bubuti temanna ma temanna tiaki ti irouia tabeman ke ti kain te Charismatic.
Ti karabako Atuara ibukin tibangara mai iroum aika a kakaokoro ao ko aki rawa iroura ngkana tiaki ti te arona ara konabai. Ti neboiko rinanon kaubaira ake ko kataui ibukira ao ti butiko reireinira ni kabonganai raoi kaubaira ake ti ataia ni koaua ba a bon bane n reke mai iroum. Kauringira n angin ara tai ae iai raora aika a kainnano ao ti riai ni ibuoka ni bai ma ngaia ba e aonga ni kamoamoaki am bain tangira ae te kukurei ao te marurung inanon kaubaira aika a kakaokoro. Amen.