Kanan Tamneira...
- Details
- Written by Uriam Timiti
A maiti baai aika ti karaoi inanon maiura aio ae ti ataia ba aki anganiira te bai are ti kantaningaia. Ti ununiki aroka ao tao e bon tuai man anganiira uana are ti kantaningaia. Ti kataia n raira nanon tarira ao manera ao e bon tuai man bitaki nanona. Ti tataro ibukin ara kantaninga teuana ao e bon tuai mani kaekaki.
Tera ana kantaninga te Atua inanon baai aika E muikoira iai? Tariu ao maneu bon iai teuana wakan te mamara ae aki toki n reke iroura ba ngkana ti karaoa te bai teuana ao ti kantaninga uana ba e na reke n aron are ti kantaningaia. A bara nanora ngkana e aki reke te bai are ti kantaningaia ao n tabetai ao a kona ni kerikaki ara onimaki. Inanon te rongorongo ae ti anganaki n te bong aio ae taekan te tia ununiki ao ti ongo ba a baka iaon aekan tano aika kakaokoro. Iesu E roko nako aonteaba ba Ana Taeka te Atua ae na kamaiua aonteaba. E roko Iesu ba te Tia Ununiki ao E kantaningaia ba ti na kariki ua.
Tariu ao maneu ti nora aron Iesu ba E aki kona ni kua ke ni botu ni kan raira nanon temanna te tia bure ni karokoa ae toki mauna i aonteaba. Ma tera ae kantaningaia te Uea mairoura n te tai aio? Eng bon ana kanatninga te Uea ba ti na teimatoa ni ununiki ao ti na kataia ni katauraoa te tano ae na baka iai te kora ba e na riki ba te tanobon ae na kona n rikirake iai te kora ao mani kariki ua aika bati.
Ti na aki toki n tataro ibukia tarira ma manera ba a rairi nanoia n okira te Uea ba aonaga naba ni kariki ua aika bati. Inanon taai are ti taku ba e aki reke iai te bai are ti kantaningaia inanon ara ununiki ao ti riai n aki barannano ma ti na teimatoa ni beku. Ti bane ni kakabaiaki ao ni karekea te kaniwanga ae moan baan te tamaroa ngkana E roko te toka ao e norira ba ti aki matu ma ti teimatoa ni beku Ibukina.
- Details
- Written by Uriam Timiti
Tariu ao maneu ko a tia ni karaua n iangoia ba maitira am tarau iroun te Uea? Te titiraki aio kanga bon kairan ara iango n nora aron kakabaiara n te tai aio ngkai ti ataia ba E a tia te Atua ni kataua ba t i na maiu inanon ana tangira. Ao tera ae nanonaki ikai n te tarau?
N te bong are ngkoananoa ao ti nora aron Bauro ni weteaki iroun Iesu ngke e mananga nako Tamateko ba e na kabureia ao ni kamateia ana reirei Iesu. E taku Iesu ngke e kaoti nakon Bauro; "Tauro Tauro e area ngkai ko bainikirinai?" Ngkoananoa naba ao ti ongora aron te aine are te kabekaau are nakon Iesu ngke e amarake ma Timon ao e teboki waen Iesu n rannimatana ao e kabiria n te kabiria ae moan te boiarara ao e aroka waen Iesu. N ana iango n titiraki irouna Timon are kangai; "Ngke arona ba te Metia teuae ao e na ataia ba antai te aine aio", ao E kaeka Timon Iesu ni kangai; "Ngkana iai uoman aomata aika a tarau iroun aia toka n te maiti ae kakaokoro ao te toka e kabarai aia tarau; antai ae na rangi n namakina ba e tangiraki riki iroun te toka? Teuare e uarereke ana tarau ke teuare e maiti riki ana tarau?" E kaeka Timon man taku ba teuare e maiti riki ana tarau.
Tariu ma maneu, I taku ba e bon riai n taai nako ba ti nora aron tangirara iroun te Atua n aron maitin ara tarau are E a tia ni kabarai. Ti bia katotonga Bauro are e kabanea korakorana ma maiuna ni beku ibukin te Uea tao ibukina ngke e a tia nora aron tangirana iroun Iesu ngke e kabarai ana bure, e ngae ngke bon te tia bure ngaia ae a tia ni bainikirina rabatan Iesu ae te Ekaretia. Ti bia katotonga naba te kabekaau are kataia ni karaoa te makuri ae te kabanea n tamaroa ibukina ba e ataia ae bon te tia ni kammaraka Iesu n ana bure.
Rawawatan ara bure ai bon aron naba maitin ara tarau iroun te Atua. E koaua ba e kabarai ara tarau ni kabane te Atua ngkana ti nakoina ni butia kabaraan ara bure inanon te Takaramentu ni Benetenia. Ma te bai ae kakawaki bon tauraoira ni manga kaboa muin kabaraan ara tarau ni kakukureia nanon te Atua n ara makuri Ibukina. E bia reke ataakin maitin ara tarau are kabarai te Atua ba kakorakorara ni karaoi ara kabanea n tamaroa ni kakukureia te Atua inanon ara makuri ma arora ni maiu ao ni karekea te kaniwanga ae a tia ni katauraoaki ibukira are te maeka ma te Tama i Karawa inanon te kabaia ae aki totoki.
- Details
- Written by Uriam Timiti
Tariu ao maneu ti riai n aki teimatoa n aki muuti nakon ana wewete te Atua nakoira ba ti na rairi nanora. Ti na katoka te aki kan kuba n rawa n ongo nakon ana wewete te Atua ke ni katikua nakon te ingabong. Ba bon ti ngkai te tai ae moan te angaraoi ao bon ti ngkai te tai ae ti riai ni moana iai ara makuri. E taku Bauro ba "aio (ngkai) bon ana bong ni kamaiu te Atua (2 Korinto 6,2). Te tai ae ngkai bon ara tai n rairi nanora ao te ingabong bon ara tai ni kantaninga ao ni karekei kaniwanga; ngkai bon ara tai ni kekeiaki ba e a bon ua kaan ara tai ni karekea te mweraoi. E tauraoi te Atua ni buokira n te bong aio ngkana ti rairi nanora nakoina ao imuina E na motiki taekara man ara taetae, ara iango ao ara makuri. Are nanona ba n te bong aio bon ara tai ni kakabaia man ana ibuobuoki ao ana taotaonannano te Atua ao ngkana e roko ara tai ni manga uti ma Iesu ao ti na nora iai ngkanne aron tamaroan ana motikintaeka te Atua ibukira.
Tariu ao maneu tai kamaana riki arom n rawa n ongo nakon ana wewete te Atua nakon Abanueana. Ba karimuian kaekan ana wewewte te Atua nakon te tai ae na roko bon kanga te aro n aki ongotaeka ao n rawa ni kakukureia te Atua ae Tamara. Ngkana ko ongo banan te Atua n te bong aio ao tai kamatoa nanom ma okirikaaki nakon te Atua ba ko aoanga ni katonga te kimareriei ao te kakabaia ae kororaoi ma Ngaia.Ara kaeka nakon ana wewete te Atua n te bong aio n rairi nanora ao n tauraoi n rinanon te maraki ao te kekeiaki kanga aio bon karaoan nanon te Taramao are kangai, "A nako, a nako man te tangi n ununiki aio kora, A oki, a oki ma te ngarengare ao te kimareirei ma uan aia tai"
- Details
- Written by Uriam Timiti
N tabetai ao ti kona n namakina te totoko ngkana ti keiaki ni karaoa nanon te Uea. N taai ake ti namakina iai aio ti riai n ataia ba aio bon te tai ae ti kona iai ni kaota ara Tangira ni koaua nakon te Uea.
N tabetai ae ti neboa te Uea ba ti unga ao iai te bai ae ti kantaningaia mairoun te Uea ma ngkana ti neboa te Uea n taai ake ti namakina iai te totoko ao anne bon te tai raoi ae ti kona iai ni kaota ara Tangira ae koaua nakon te Uea. Aio te tai are ti neboa iai te Uea tiaki ibukin te bai are ti kantaningaia ba E na anganira n aron te kukurei ke te tang ma i bukina ba ti kan kaota ara Tangira ni koaua nakoina ao n neboia ba Ngaia te Atua . N taai aika aekan aio ao butia te Uea ba e na aki tokanikai te riaboro ma boni Ngaia ae na riai n tokanikai n taai nako. Ngkana ko ataia ba tiaki nanon te Uea ao ko kataua ba e na reke ao ngkanne titebo ma ae ko kangarea wiin te riaboro ba e a tokanikai. Ai tokara boran te riaboro ngkana ko kataua aei ba e na riki! Ngke arona ba iai am kiraati ni mata ae ko kona iai n nora te riaboro ao tao tera n ami iango n te bai ae karaoia? Ko na noria ni mamaie mani keekeke ao ni ngareakiniko.
Inanon taai aika aekan aio uringa are bon iai tarim ao manem ake kain am kurubu. Ba bon tarira ma manera aika ngaia taani buokira inanon ara tai ni baka mani maamara ao boni ngaia naba taan tabekiira inanon ara tai ni baka. Ti aki kona n taku ba ti kona ni waaki ni maeura ni kiritian ti ibon iroura ma bon tarira ma manera aika taani buokiira. I uringa ana tibatiba te Tama temanna imuin ara katiki ma te Eukari ikai i Suva n te kawai ae ababaki ao e taku ba e rang n ringaki nanona n noran aia kekeiaki taan katiki. Kanga e roko naba irouna te kua ma e kakorakora noraia unaine ao unimane ake a bon keiaki naba n nakonako. I uringa n te aio ba ngai I nora Nei Meeri n tain te kaitiki aio ba e tei n rara te kai teuana ao man tautaua nukana. Imuina ao I manga noria n nakonako ma iai uoman aomata aika a totokoia mai bukina ni buokia n nakonako. Bon aio ngkanne te karea ae aki toki n reke iroura ri inanon ara kurubu n tataro ke irouia tarira ma manera.
- Details
- Written by Uriam Timiti
N aiaron te Atua ae te Teniman n te Temanna, ke te Atua ae ti Temanna ma iai teniman te Beretona inanona ao aio naba ana kantaninga te Atua ba ti na riki ba bain te rabata aika kakaokoro inanon te rabata ae ti teuana ae Rabatan Kristo. Bon aio te miterio ae moan te kakawaki ibukira ni kabane are na anganira te kimarerei ae kororaoi inanon maiura aio ao te koaua ae na kairira nakon Onraken te maiu ae aki totoki.
Tariu ao maneu ko a tia ni karaua ni iangoia ba tera teuana te karea ae moan te kamimi inanon ara Ekaretia Katorika? Inanon te wiki ae nako ao I tabe ni mataku n ana tibatiba temanna te tia reirei ae rangi ni kinaki inanon teuana te Ekaretia ni boretetanti are e a tia ngkai n rairaki nakon te Katorika ao teuana mai buakon ae noria inanon te Katorika bon te koaua are Botakia akana a tabu (communion of saints) are ti riki iai ngaira aika i aonteaba, ao tamnei ake n te burikatorio ao tamnei ake i Karawa ba kain te rabata ke te utu ae ti teuana. Iai teuana te katei ae rangi ni kakawaki n te Katorika ba karaoan aia toa kain Karawa, ao uringakiia naba kain te Burikatorio inanon November. I karaua n iangoia ao I kakoaua ba bon aio naba te katei ae ti kakaraoia inanon ara utu ba ti kauringa aia rekenibong natira ke kain ara utu. Bon aio ngkanne teuana te bai ae ti kaokoro iai ma Ekaretia ake tabeua ba ti ataia ba kain ara utu n ara onimaki tiaki ti ngaira aika ti maiu iaon te aba ma bon tarira ao manera naba ake i Karawa ao ake n te burikatorio.
Inanon te rabata ae ti teuana ae I taku ba e kakawaki iroura ba ti na riai karaoa muiokoara ae ti teuana are bon kateimaotoan te maiu nakon te rabata ae ti teuana are Rabatan Kristo. Tinara ae te Ekaretia e bon rangi n rawawata ao n nanokawaki ngkana iai bain te rabata ae mamara ao bon ti ana kamaiu Iesu ae kona ni manga kaoka te marurung nakon te rabata ae ti teuana.
E bon riai ngkanne ni moanibai inanon ara waaki ni kabane makurian ao karokoan ana kamaiu Iesu nakoia tarira ma manera ni kabane ake bon kain te rabata ae ti teuana. Ti na butia te Tamnei ae Raoiroi ba E na anganira ana karea aika ti kainnanoi ibukin karokoan te maiu ae kororaoi inanon Rabatan Iesu ae te Ekaretia. Ngkana ti aki nora te koaua aio ae bon ti teuana ngaira inanon te Rabata ae ti teuana, ao ngkanne ti na bon aki kona ni kakoroa bukin muiokoara iroun te Uea inanon maiura aio ao e na bon aki kona naba n reke iroura kororaoin te kukurei irarikin Iesu i Karawa n te maiu ae na roko.