Kanan Tamneira...
- Details
- Written by Beneteta
"I maini weteam iroun Biribo ao I noriko ian te biku" aei bon ana taeka Iesu nakon Natanaera.
N te bong aio ao I kukurei n ira karaoan ana kabanea ni berita te Tina Terakua are e bukamaruaki i Teaoraereke n te Tutia ao e taorimwiaki n te baka ae koroarona n te maneaba, Santo Ioteba.
Bon aikai naba aekan taeka ake a atongaki ibukin te Tina Terakua. Iai ake a kangai: ba ko a kaman noraki iroun te Uea mai i nanon biriton tinam; iai naba ake a kangai: ngke ko bungiaki ao e a kaman weteiko Iesu ba ko na iriria. A bati riki aekan taeka ni kaunganano nakon te Tina aio. A bon bati kukureia taan ira te baka aio ba te kukurei aio e irianaki ma te kamoamoa ao ai bon te katiutaraoi rinanon nanon te Tina Terakua are e a kaburea maeuna n ua matena ibukin kan irakin te Uea ma karaoan nanona.
Iai ana wewete te Uea nakoira ni kabane ao ti karaba ba e a bon tia ni bane n kaman norira imwain rikira ba bon ngaia ae e bairea karikara. E a kaman kakatannakoira ma ara makuri aika a kakaokoro are ti bon riai n ukera nanona ni moan taai ba tia aonga n aki kabanei ara tai ni karaoi makuri ake tiaki nanona. Bon iai naba kawan te Uea ngkana ti nako ni kaei makuri ake tiaki nanona kioina ngke bon te babaire mai irouna ao ngkana ti a manga bon uota aron ara baire man aki tabeakina are e baireia ibukira ao iai iai kawana.
Ti bia bane n reireinira ba ti na kakaea ae nanon te Uea moa ao tiaki ae nanora. Irarikina naba ti bia bane n ataia ae ngkana ti aki ukera nanona moa ao ti na bon ataia ba a na akea te kukurei inanora. Iai ana tangira te Uea ae e kan kaotia nakoira iai ba tiaki nanona are ti karaoia. Ti an kunea n taai nako ae akea te kukurei iroura ngkana ti karaoa ae tiaki nanon te Uea.
E raoiroi ba ti na tataro moa ibukia raora ba a bia anganaki ae nanon te Uea n maeuia, ti uringa riki te Tina Terakua are e na kainnanoa ara tataro n taai nako ni ikotaki ma raona ake a maeuakina te maeu ae tabu ao ai bon ngaira n tatabemanira nako ba ti bia bane n kaonaki n te kukurei ibukina ba ti karaoa ae e nanon moa Atuara.
Ti a butia ara AkaAnera ake teniman are bon aia bong aio ba a bia ururingia man kakawakinia ara aomata ake amena n te nakoa a e tabu, ara roronrikirake ba a na kawakinaki inanon aia tai ni kakaea nanon te Uea ibukin maeuia, aomata ni kabane ake a ukera maeun tamneia ao ake a aki ao ake a kekeiaki inanon te raoiroi. Ke a kawakinaki ni kabane n aia tataro ao aia kakawakin Santo Mikaere, Santo Kabiriera ao Santo Rabaere, AkaAnera aika a tabu. Amen
- Details
- Written by Beneteta
Ai tikiraoira ana taeka Betero ni kaeka Iesu n ana titiraki nakoia ana reirei ake a roko irouna n ana tai n tataro n ti ngaia. E kangai te titiraki: "Ao ngkami kam taku ba antai ngai?"
Ana kaeka Betero e kangai: "Bon ana Metia te Atua ngkoe". E aera ngke e kangai Iesu: " Tai taekina am kaeka anne nakon temanna?" Tao e rawa ngkana e ataaki ae ngaia bon te Metia? Ke e riba ae a na rawata taan nakoina man bubuti kamaeuakia n aron otaia n rongorongon taekan rokon te Metia?A ataia ngkai ae bon ngaia te metia are a tataningaia mai iroun Betero.
Ma e ienikuri ni kaotia nakoia ae e bon riai ba e na maraki, e na mate ao e na manga uti imwin tenibong. Tao E tangiria Iesu ba a na tauraoi ibukin kamaeuakia are e na karekea ni matena ao manga utina. Ao ngaira tariu ao maneu, ti na tauraoi ni butimaea marakin, mateni Iesu ao mangautina?
A na tera ara kaeka nakoina ngkana e titirakina ni kangai: ' Aa ao ngkami kam taku ba antai ngai?" Ti bia kakatauraoi ara kaeka ba ti kawa n te taina ao e na titirakinira Iesu ao ti na babanga ni kaeka. E kakawaki ba ti na tatauraoi imwain kaotin ara Uea nakoira ao riki imwain manga titirakinara iroun Iesu are ara Metia ao ara Tia Kamaeu.
Ti a boti banara ni karaba ni marakina, matena ao manga utina ba ti ataia ni koaua ba Iesu bon ngaia Atuara ao ara Tia Kamaeu, raoraora ao kanara ao nimara ni koaua ike e na anganira iai te maeu ae akea tokina. Ti a reitaki ma Ngaia man butia a na nanoanga nakoira ao kamaeuara inanon Atinibanna ae moan te Tabu. Amen.
- Details
- Written by Teretia Ioane
Tariu ao maneu, ti na tara aron maiura n te tai aio ao ni manga tiroira n te tai aio ba ti na kanga ni karika Iesu ba ngaia kawaira nako Karawa.
N te rongorongo are ti a tia n reireiaki iai irouia ara Tama ao te bai ae kakawaki ba ti na unika moa te kora inanora are bon te Onimaki ni koaua ba ti na riai ni kakoaua ae Iesu bon Natin te Atua ao Ara Tia Kamaiu ao boni ngaia are e kamaiura man ara bure.
Ngkana ko a tia rinanon te kooti are "Te Maiu ae Onraken te Maiu" ao I taraai iai ngke I karaoa au kooti ma te Uea inanon te boki aio aoI uringa are I tibaia ni moan kainaomataku ba I kaititeboa te reirei inanon te boki aio ba kanga te Kaintamarake nakon Iesu. N te moan wiki ao I taku ba I toka iaon te moan titebu, te ka-uoua ni wiki ao i a manga toka iaon te kauoua n titebu, te katenua ni wiki, I a namakina riki kerakeu riki nakon te Uea, te kaaua ni wiki, I a kan roko riki iroun Iesu ni karokoa te kanimaua are I a bon namakina raoi aron te maiu ae I a tia ni kunea ba Iesu e rangi kaan roaroa ma ngai n te tai anne. I norai n te tai anne ba e rootai te kukurei ae bati ao ti tebo ma e otabaniniai te oota are bon ootan Kristo are I reitia ma te Benetenia nakoina n te tai anne ao I namakina ba ti tebo ma a kounako mairou te amo ae rawawata, ao i namakina te maiu ae kaokoro ba te maiu ni kan tatataro.
Ti na nora raoi Iesu inanon ara Onimaki ae e kororaoi ao ti na bon nakonako inanon te bebete, te kukurei ao ai te kan kakatituaraoi n taai nakoina ni katoa miniti ni kakaraba ibukin kororaoin ana Tangira nakoira.
Ti riai ni kakoaua raoi ba Iesu e Maiu ni koaua n te Eukari ao ti na aki nanououa ni kangai, "Bon te koaua e maiu Iesu n te Eukari". Ti na riai ni kakoaua ba n ara Onimaki ni Katorika Iesu e Maiu ni Koaua inanon te Eukari.
Ti na nakonako ma Iesu n taai nako ba baina are e na kairirira inanon te eeti ao te maiu ae kororaoi n reitaki ma Tinana ae Nei Maria. Ngkana akea Iesu iroura ao ti na riki ba naati ngaira aika ti na tiotio nako man kananoanga. Ti na kekeiaki n taai nako n aki bobotu n tatataro man kakaraba ibukin akean tian ana tangira ibukira ni kabane.
"Te Uea ae Iesu Kristo, Nanoangaira ba bon taan bure ngaira".
- Details
- Written by Teretia Ioane
Ti ongora n te moan wareboki n te bong aio n te Tutia kanga taekan bain te aonnaba aio.
Ti tabe n tarai bain te aonnaba aio ao ngaira ae ti mena inanona ao ti na kangai tera manenan ara kaubai ma ara makuri ao ti na bon manga kitanii ngkana e a roko weteara, ke ngkana ti a mate.
E kateterea Iesu rinanon ana kabarabara ana Berebitero n te bong aio n te Tutia ba bon akea manen baain te maeu aio. Ma ti na riai n uringa ba te bai ae manena ngkai ti maeu iaon te aba bon te Mangauti. Ti na kukurei ba iai te Mangauti are bon kairara nakon te maeu ae aki toki, are ngaia ae manena inanon maiura n te tai aio are ti tabe ni makuria ngkai ti mena iaon te aba.
Ko raba te Uea ba ngke ko aki okirira ni mangautim ao e na bon akea bonganan ara tataro, ara onimaki ao arora aio are ti kan rereitira ma ngkoe n ara tangira nakoim inanon ara tataro ao kakawarakim n te Eukari ao inanon te komonio. Ko raba Iesu n Am Tangira!
Kukureira ngkoe Iesu ao bon ti ngkoe ara Onimaki. Akean ara Onimaki nakoim ao akea manen baai.
Bon ti te Uea ae Iesu Kristo ae kakukureira ni Mangautina. Akea te Uea Iesu iroura ao bon akea kukureira ao akea manenara iaon te aba.
Ti bia teimatoa ni bubutia te Uea karikirakean ara Onimaki ni katoa tekan, miniti, aoa ao ni katoa bong ba ti aongan kaan roaroa riki ma ngkoe inanon ara Tangira ae Kororaoi nakoim.
Ti nora ikai kororaoin ana Tangira Iesu ibukira ni kabane. E na neboaki arana ae Tabu!
Ti na teimatoa ni kakaraoa ara beku ma te eeti ao te riai man te bai ae uarereke ni karokoa ae bubura ba ti aongan kukurei n taai nako inanon maeura are bon aikai baai aika a manena ni maiura iaon te aba.
- Details
- Written by Beneteta
Iesu, ngke ko tuangaki ae e a teitei Tinam ma tarim tabeman i tinanikun te tabo are ko mena iai ao ko kangai 'Tinau ao tariu, bon akana a ongo au taeka ao man kawakinna'.
Kanga e bon roko irou te nanokawaki man iangoa Tinam ba tera ana iango ngke ko atonga anne? E rawawata iai ke tao e bon oota n aron tabem ibukin kamaeuaia aomata. N tabetai Iesu ao bon au iango a biri ritinanikun are ko iangoia.
M a n tabetai te Uea e uotira nako nanora n aomata ma raroan ara kantaninga man baai ake ko kan kauki nanora nako iai. Katauira te Uea ba ti na oota n tibara ae bon ngaira tarim ao manem are ti natinaki iai iroun Tinam ae moan te karineaki iroura.
Tinara ae Nei Maria ko raba naba n am tangira nakoira ngaira ake bon natin aonteaba ma te ro tongitong. Ko aki bobotu iroura ao ko kariai ba ti na riki ba natim ba ti aonga ni kamaeuaki ni maten Natim ae ko bati n tangiria.
Ti onimakina am tararua Tinara ba ti ataia ae ti na bon kamaeuaki ngkana ko tararuaira. Kairira Tinara nakon natim ba e aonga n roko Ueana iaon te aba aio ao tataro ibukira ba e na tangirira Iesu ngkai ao n aki totoki , Amen.