Kanan Tamneira...
- Details
- Written by Uriam Timiti
E taetae te Atua inanon Etekiera ni kaotia ba E na botia ni kabane te nati n Iteraeara aika a maenako ni nanga kaokiia nakon abaia ao a na riki ba te botanaomata ae ti teuana ao Ngaia e na riki ba Atuaia. E na riki au tabonibai ae Tawita ba aia uea ao a na maeka iaon au tua. Nna maeka ibuakoia ao a na maiu inanon au Berita n akoi are mairouia aia bakatibu.
N te tai aio ao ti nang manga nora aron kakoroan nanon ana taetae ni burebeti Etekiera aio ngkai e nang mate Iesu ba e aonga ni manga botia natin te Atua ni karikiia ba te botanaoamta ae ti teuana. N te tai aio ae e aki mate Iesu ti ibukia Iteraera ma e mate ibukira ni kabane ba e na kaboira n Rarana ae moan te tabu ba ti aonga ni kamaiuaki iai ao n riki ba nati ni koaua aika taan baibai ma Iesu inanon te mimitong ma te Atua i Karawa. Inanon maten Iesu ao a nang akea te kakaokoroaki imarenaia Iutaia ao Tientaire, ba ti nang riki ba te botanaoamata ae ti teuana ae maeka iaan ana tua te Atua ae moan te maka.
N te tai aio ao ti nang tabe n rin inanon te wiki ae tabu ba ti na ira Iesu inanon marakina, te bainikirinaki ao te mate ao ni katonga te mangauti inanon te Bakate. E weteira Iesu ba ti na raonna n te tai aio ao ti bia riki inanon te wiki ae tabu aio ba taan raonna Iesu ni koaua ao tiaki tani mataku. Ti bia tauraoi ni butimaai taian maraki ma kainnano ba ti aonga ni mate ni koaua nakon rabatara ao ni kaboauaki nakon te maiu ae mimitong inanon mangautin Iesu. Tariu ao maneu akea ba e a roko te buaka ao ti a tauraoi n ira ara Uea ae Iesu inanon te wiki ae tabu. Ti a kairia naba tarira ao manera ake kainnanoa ara ibuouboki n te tai aio ba a aonga naba n reke tibangaia inanon te Bakate.
- Details
- Written by Uriam Timiti
Akea ba ti a kan roko n tokin ara mananga inanon te karemo ba ai ti tabeua riki te bong. Aio te tai are e rangi ni kakawaki iroura ba ti na kataia ni bane n roko n tokin kawaira. Aio naba te tai are e tabe ni kabanea korakorana iai te riaboro ba ti na aki roko iai ibukina ba e rangi rawa nanona ni kataua ba ti na maiu inanon ana kakawakin te Atua.
Tariu ao maneu ti na bon kona n te tai aio n namakin aekan buaka ma totoko aika a bati ake bon ana makuri te riaboro. Ti kona naba n namakina te kaitaraaki mairouia tarira ao manera ke tao taian makuri ni ioawa ake a na kabakaira man aki karokoira n tokin kawaira. A na kona naba n iai taian nanououa ao te aki kakoaua iroura n ara onimaki ao n aron ara itoman ma te Atua. Ma n aron are e taekinna Ieremia n te bong aio ao ti na riai n aki toki ni kamoamoa ba bon raora te Atua n taai nako ao bon Ngaia te tia kawakinira man taian kabuanibai nako ke taian kanganga ke ana kamane nako te riaboro ae bon te tia ioawa. A na bane ni baka mani konaaki aiara ao a na kabakaki nakon te kamamaeaki. Ti na riai naba n tai aio ni kona n onimakina makana te Atua iaon ana makuri nako te riaboro n aron are kaotia Iesu nakoira inanon katakina n rereua inanon abui te bong. Ngkana ti muiokoi arora ma mamarara ni kabane inanon bain te Uea ao ti na bon anganaki te tokanikai ao te teimatoa ao ti na tauraoi ni katonga ma Iesu taian maraki ma rawawata inanon te wiki ae tabu ba ti aonga ni bane n raonna inanon te mangauti n te Bakate. N aiaroia tan kabo n te kabobirimaka ao ti na butia te Atua ana karatia ao ana buoka ba ti na bane ni keiaki ni biri ni karokoa ae ti roko n te toki, ao ba a na akea mai buakora aika a na baka ao man aki roko n te tia.
- Details
- Written by Uriam Timiti
Bon Tamnein te koaua ae na kairira nakon te kamaiuaki iroun te Uea. Ba bon te Tamnei ae Raoiroi ae na anganira te korakora ao te ninikoria ni karaoi makuri aika ti na kaota iai onimakinan te Atua ao karaoakin ae Nanona. Ti noria n te moan wareboki n te bong aio aroia aomata ake a tauraoi ni kabuekaki ibukin te koaua are akea ae riki ae na riai n taromariaki ba bon ti te Atua n ti Ngaia. A bon rawa ni karaoa te makuri ae kaitaraa Nanon te Atua e ngae ngke a ataia ba a na kamateaki iai.
E kamatata Iesu nakoira n te Ewangkerio ba ngkana ti aki kairaki iroun Tamnein te koaua ao ti na bon aki kona ni kina raoi ba antai Iesu ao ti na bon aki naba kona ni kinaki ba ana reirei Iesu ngaira aika tan kakaraoa Nanon te Atua inanon maiura. Inanon ara waki ni kabane ao ti na riai ni kairaki iroun Tamnein te Koaua ao ti riai naba n aki kataua ba ti na kewe. Inanon ara waki inanon n nebonebo n ara charismatic ao ti riai n nebonebo iroun Tamnein te koaua. Ngkana ti aki ao nanona ngkanne ba ti na riki ba taan kewe aika a kairia aomata nakon te kanganga ma te mate.
Ti riai n taai nako ni ukera nanon te Uea inanon bai aika ti karoai ao ti na aki kataui ara namakin ma rabatara ba a na kairi ara makuri ao maiura. Bon te Tamnei ae Raoiroi bon te Tia buokira ao te tia kawakinira ngkana ti teimatoa ni kairaki n te koaua are mairoun te Atua.Ti na bubutia te Tamnei ae Raoiroi ba ti na anganaki te wanawana n ata te koaua ao ni karaoa nanon te Uea n taai nako ao ni bai ni kabane.
- Details
- Written by Uriam Timiti
E kakoauaki ba te rongorongo teuana ae ti kona n noria inanon ana Taeka te Atua ae te Baibara bon taekan ana Berita n Akoi te Atua ma te aomata. Ti nora te moan Berita ba bon imarenan te Atua ma Atam ao Nei Ewa ba a na maeka n te baretaiti are Eden. Ma tera ae riki? A bure ara moani karo ao a kakionakoaki man te baretaiti. Imuina ao e manga berita te Atua ma Noa ao ana utu ao e tuangnga ba e na manga roko te ieka. Imuina ti a manga nora ana berita n akoi te Atua ma Aberam ma ana baronga. Imuina ao ti a manga nora ana Berita n akoi te Atua ma te botanoamata ae Iteraera rinanon Mote. Ao te kabanea ngkanne ai bon ana Berita n akoi te Atua ma te aonaba ae banin rinanon natina ae Iesu.
Ao kanga tera aron taraan ana Berita n Akoi te Atua iroum? I taku ngai ba te moani bai ae kakawaki bon aron te Atua n tauaninne iroura ba E na riki ba Atuara ao ngaira ba ana botanaomata. Aio are bon kaota aron kabaraban te Atua n taai nako ae bon te kororaoi, te tamaroa, te tangira ao a bati riki. Bon nanon te Atua ma imoana ba ti na riki n ti teuiana ma Ngaia inanon te tangira ae kororaoi. Te kauoua ni bai ae kakawaki inanon teBberita n akoi aio bon ana berita te Atua ba E kakawakinira n taai nako ao E na anganira te aba ae ti na kakabaia iai. Ma a na ti reke baai aikai iroura ngkana ti tiku ni maeka inanon ana kakawakin ao ti teimatoa n riki ba ana botanaomata te Atua. Inanon te Berita n akoi ao ti a nora iai aron kaibibitan te maiu ao te tangira imarenan te Atua ao ngaira aomata. Inanon te Berita n akoi aio ao bon nanon te Atua ba ti na riki ngira ba kain ana utu are ti kona n aranna ba te Atua Tamara ni koaua ao bon ngaira ngkanne taan baibai irarikina i Karawa.
Ao ngkai tera arora ni kawakina kanoan ana Berita n akoi te Atua nakoira? Tariu ao maneu ti ataia ba mai imoana ao te bai ae aki toki n urua te Berita n akoia aio bon te bure- mairoun Atam ni karokoa Aberam ni karokoa natin Iteraera. Ti noria ba inanon uruan te berita n akoi ao te Atua E a manga kataia ni karekea te anga ae na manga kabouaki iai ni karokoa ae E a bon kanakoa natina ae Iesu. Eng a bane ni kakoroaki baai ni kabane iroun Iesu. Me tera ae na riki ngkana ti a manga bon urua aron reitakira ma te Atua n te tai aio? Tariu ao maneu E anganira te Atua te Takaramentu ni Bentenia ba te kawai ae ti kona ni manga kaboua iai reitakira ma te Atua. Ba ngkana ti maiu n taai inanon te Berita n akoi ao ngkanne ti na bane n nora kakoroan nanon te Berita n akoi are bon te roko i Canaan ae ngkai naba are e ranga mai te miriki ao karewerewen te manibeeru ke te maiu inanon kororaoin te mimitong i Karawa.
- Details
- Written by Uriam Timiti
N te wiki are nako ao I wareka ana kabarara te Bobe iaon aron kamaiuaia natin Itaeraera n rereura ngke a tenaruaki irouia naeta ba rekenikaia iroun te Atua imuin aia ngurengure aika bati. N ana kamatata te Bobe ao e kabotaua aron kamaiuakia Iteraera ma kamaiuakira n te tai aio iroun Iesu are tabekakirake iaon te kaibangaki ba ti na taraia ba ti aonga ni kamaiuaki.
Tariu ao maneu, ko a tia ni karaua ni iangoia ba tera te bai ae reitaki iai tamnein te naeta are tabekaki ba e na kamaiuia Iteraera ao Iesu are tauraki man tabekaki iaon te kaibangaki ba ti na taraia ba ti aonga ni kamauiaki? Ngke I a karaua n iangoia ao I a namakina te ota teuana ae a reke irou ae kaota nanou ba tera raoi te bai ae reita tamnein te naeta ma Iesu n te kaibangaki. Inanon namakinan te ota aio ao bon iai te bana inanou ba N na riai ni kaongoia tariu ma maneu ba bon aio nanon taian wareboki aikai n aron ana kairiri te Tamnei ae Raoiroi.
Ngkana ti tara aroia natin Iteraera n rereua ao man titiraki ba tera te bai are e tiringiia, ao ti na bane n ti teuana ara kaeka ba bon naeta. Ao bon man taran te naeta (ae na tiringiia) ae te kora ae tabekakirake ae a na kamaiuaki iai. N te tai aio ao ngaira ni kabane ti bane n tiringaki n te bure ao ti na bane ni kamaiuaki ngkana ti bane n tara Iesu ae tauraki man tabekairake iaon te kaibangaki. Tariu ao maneu, ao aio te bai ae I taku ba moan te kakawaki. Ba mai iaon ana kaibangaki ao ti a nora iai rawawatan ara bure are e a bane ni katokai iaona Iesu ba kanga aiaron ae bon te tia bure Ngaia. Kananoangana, ikoakina, bainikirinakina, kamamaeana bon ngaia uaan ara bure are E a katokai iaona Iesu ba ti aonga ni kamaiuaki iai ngkana ti tara te kaibangaki. Tariu ao maneu ti kauki nanora nakon ana kawai ni kamaiu te Atua nakoira iroun Natia ae te Rikitemanna are tabekaki iaon te kaibangaki ba e na uoti rawawatan ara bure ba ti aonga ni kamaiuaki. Ti na bane n tara Iesu iaon te kaibangaki ao ni bubuti ba ti na nora aron kororaoin ana tangira te Atua nakoira ao n tauraoi n te tai aio ni kabebetea marakin Iesu inanon ara rairannano ao ara tauraoi ni butimaii taian maraki ma ikoaki ao man karaoan makuri aika raraoi.