Kanan Tamneira...

Details

Written by Taranieta

Created: 20 March 2012

E karekea te kimareirei ae e bati inanora, norakia tarira ao manera ake a tatakaruaea neboakin te Uea ni koaua,  mai wiia, mai buaia, ao mai kabin nanoia,  n  te anene.!

 E kamimi te Atua ba e anganira aron neboana ba te anene,  ae te aro n neboia ae e korakora ao man taboroboro riki iai ara nebonebo. N ara tai n anene, ao ti katikia iai tarira ao manera, aika a marurung ao aika aoraki n aki konabai, nakon te nebonebo ae moan te kakimareirei ao man reke iai te rau ma te raoi ao aabuen ana Tangira Iesu.

 Maitin angin nanora ake ti kanakoi, maitin buburan ao m'aawawan nanora are ti kaukia nakon te Uea, bon maitin are E na anganira te Uea, man kaonrakeira iai. Ma e taku te taeka ba E aki kona n konaki te Atua n ana titituaraoi n te aro are ngke ti onrake n Ana tangira,  ao E aki toki ikanne,  ma ngaia e raanga man b’anaara n anene, nakoia tarira ao manera.

 Ti katituaraoa te Atua n te onimaki irouia kain abara ae Kiribati, ae te onimaki ni koaua n aki mama ao n aki tabe ma tarakiia, ba bon te onimaki ae karika te kimareirei! Arora n anene n ara Tutia, e kaota aron ara tataro ma ara nebonebo ake a bon nako mai kabin nanora,  ao ti bane ni katikaki iai n te korakora ae ti teuana n neboa te Atua!!

 E aki mama Iesu ngke E tine iaon te kaibangaki ba e a b'aka arona n Atua ao  n Uea, E aki toronibai taraana man taian ikoaki aika a kakaiaki iaona ao E ribaki . Ma E kauka wiina, buana ao banibanna, are e raeuaki, n uruaki,  ibukin Ana tangira ibukira. Tera are e takaruaea n te tai anne. Bon aram.

 

“…………, aio aron tangiram Irou, tera aron tangirau iroum?” e titirakiniko Iesu.

 

E weteira nakon Atinibanna ao ngaira ti tou n ara  tataro ma ti kaeka n ara tai n raeuai nanora n anene, ni bota nanora ma Nanona.

Tia tei,  man iangoa Ana karaoiroi te Atua n ara tai n aneneia n neboia. E tabe n ranga  nakoira, ao e tabe naba n ranga  nakoia tarira ao manera nako.

Details

Written by Beneteta

Created: 15 March 2012

Ti a kaeti arora tariu ao maneu imatan te Uea ae karikira ao n tautaeka iaon maeura. E kauringira Ieremia n ana taeka Iawe nakoia natin Iteraera ba ti na kauki taningara ao ti na reireinira n ongo banaana ao n iira are e tuangira ba ti aonga n kamaeuaki.  Ti na kanga ni kina ba te Uea ae e taetae nakoira ao e taetae ni kanga nakoira?

Iai anga aika I taku ba ti kona ni kina ba te Uea ae e taetae iai. Teuana ba n te Baibara. Ti riai n onimaki ba taeka aika n te Baibara bon ana taeka te Atua. E na anganira boon ara kakae ke ara titraki n ana taeka man te Baibara. Imwain ae ko na kauka ana taeka te Uea man te Baibara e raoiroi ba ko na tataroakina moa te bai are ko kan kakaea ana kaeka iai te Uea. Bubutia te Tamnei ae Raoiroi ba E na kairiko nakon te iteraniba are ko na kunea iai ana kaeka te Uea. Imwin am tataro ao kauka te Baibara nakon ane E na kairiko nako iai, warekia ao imwina manga tataro man bubuti kaotakim n te rongorongo are ko a tiba tia n warekia. Kaina baabu ao E na raoiniko te Tamnei ae Raoiroi man kaotako raoi.

Iai riki teuana ae ko na ongo iai banan te Uea. Ongora irouia aomata. Tiba te bai ae ko tangira kaekaana ao kakauongo nakon aia kaeka aomata iai. Iai rongorongo aika a na anganiko te rau, te kukurei ao te mwengaraoi ao iai aika a reita riki taben nanom man kabatia riki ao ko namakina te aki kukurei iai. Ti ataia ba banaan te Uea e angaanga te rau, te kukurei ao aekan nako aikai ma ngaia are ko na bon bae n nora aio ba banaan te Uea.

E taetae naba te Uea ri nanon bai aika ti noori. I uringa ae I rangi n kan reitaki ma te aomata temanna ni waekoa ao I aki ataia ba N na kanga ni karekea te aomata aio ba I aki ata ana tareboon namba ao te tabo ae e maeka iai. I bubutia te Tamnei ae Raoiroi ba E na buokai ni karekea buokau ba I biriakina bain te makuri ae e kawaekoaki n te bong arei ao ngkana e aki reke te aomata aei ao e na aki waki man kariaiakaki te waki are ti na karaoia ibukin nakoraoin waaki n te tabon makuri. I a otinako ba tain te katawanou ao I a nako n nakonako i tinaniku man ira te kawai ae e roko n te tuta nikawai. I tei ao I iango ba N na ira ae e nga te maing ke te atai? I titiraki man wetea te Tamnei ae Raoiroi ba E na tuangai kawaiu. I a nora naba te taeka ma te kai ni koto ae e kangai "This Way ->" nakon te maing. I a iria naba. Ngke I roko n te kona ao I a nora te aomata ae e rianna ni kaitarai, te aomata are I tataro ba N na kanga n kaitibo ma ngaia! E raba te Uea.

Ngakana ti kaeti arora man irira banan te Uea ao n ongotaeka nako iai ao ti na bon kukurei man kamaeuaki.  Ba E kangai Iesu riroun Ruka 11:23 Akana a aki irai ao a bon kaitarai, ane a aki rikoriko ma ngai ao a na bon maenako.

Ngkana raora Te Uea n taai nako ao ti na bon kabaia, Amen.

 

 

 

Details

Written by Taranieta

Created: 19 March 2012

 

Ti ongongora man te baibara, aron ana kabeabea te Atua nakoia ana anera,  ao ae moan te kakawaki  riki ibuakon taian rongorongo bon Ana kaotitaeka  Ana Anera te Atua nakon Nei Maria,  ao Ana rikinaomata te Atua, iroun te anera are Kabiriera. Tiaki ti te tibanga ae e kakawaki are e roko iroun Nei Maria iroun te anera. E reke naba irouna te korakora are e uotia te Anera nakoina. Te korakora aio are e rereke naba iroura.

E matata man te Baibara ao tuangakira inanon ara Ekaretia ba e otabaniniaki te Atua irouia ana anera aika a kakaokoro araia ma tibangaia, ake bon ana metintia ao taan neboneboia n aron neboana ae e bon eti ao e bon riai.

Ngkana ti kakauongo raoi nakon manewen ana taeka te Tama inanon te Tutia ao ti kona n ongo aron taekan tibangaia Ana anera te Atua inanon te anga karea ae te kabanea n Tabu man mimitong aio.

Mai ikanne ao ti ataia iai ba ni katoa Tutia n tainako, ao a bobaraki anera aika nneia rarikin te Atua, ni karinea ara Uea ae Iesu iaon te baonikarea   n tain te onikaki,  ma aia karinerine ae moan te mimitong.

Ngkana ti a wakirake nakon te komunio, ao tina kaitibo ma Ana anera te Atua.  A na bon irira ni karinea te Atua inanora are ti a tia ni kauka nanora nakoina ao E a roko inanora.

N tainako ngkana ti kaoa ke ni wetea Iesu nako nanora, i tinanikun naba are ara tai ni komunio,  ao a na bon roko naba anera ni karinea Iesu are e a roko inanora.

E na reke naba iroura te korakora are ti kona n aranna ba te ‘korakora n anera’. Baike ti maroroakini ma Iesu, bon anera aika ana kakoroi bukia ni korakoraia are  e na bon reke naba iroura,  n aron are e kona iai Tinara Nei Maria, ni karaoa te tibanga ae moan baan te kakawaki..

 

 

Details

Written by Beneteta

Created: 13 March 2012

E kaokiokaki taekan kakawakin ana Tua te Atua ake e anganaki Mote iaon te maunga ae Tinai . N te Tua Kaua4:1-9 ao e taetae Mote nakoia natin Iteraera ba a riai n ongotaeka nakon Tua aikai ao man iri nanoia. Iai aia kantaninga natin Iteraera n te tai are a ira Mote ba a na kaea te aba are e a tia ni katauraoia Atuaia ibukia. E tuangia Mote ae a riai n kakaonimaki nakon Tua aikai ba aonga n karokoaki n te aba aei.

Ngaira bon iai naba te aba ae ti bane n uaiakinna ae e katauraoia ibukira Iesu n aron ana taeka. E arana te aba aio ba te Abanuea. E kauringira Santo Mataio n te evangkerio ana taeka Iesu ae e roko ba e na aki urua te Tua ake e taekinaki iroun Mote ma e roko ba e na kakoroi bukia. E tangirira ao e kamatoa ae ti riai naba n ongotaeka nakon Tua aikai ba ti aonga n kaina ao man kakannato n te Abanuea aio.

Ti bia bane n matennanoa te Abanuea aio man bane n ingainga ni kan roko iai. Anganira Atuara te ongotaeka nakon am Tua ao te kona ni maeuakinna inanon ara tai ni maeu. Katauira ba ti na kona ni kairia raora inanon te ongotaeka ae bon am bai n tangira ba ti aonga ni bane ni kamaeuaki. Tai kariai te Uea ba a na iai aika a na rawa n rin n te Abanuea aio ma anganiira ni kabane te kona ni ikarekebai ma raora ni kabane ba ti aonga ni kona n rin n Abanueam i Karawa ba ti tenanaina n akea te kakaokoroaki.

Ti a butiko aikai Atuara n aran natim ae Iesu Kristo ae ngaia ara Uea ao ara Tia Kamaeu, Amen.