Kanan Tamneira...
- Details
- Written by Uriam Timiti
Ai rabara taian taeka aikai ake a bon kaota aron te Atua nakoira ao ibukira. Ba E kan kaotia nakoira te Atua ba E kona ni karaoi baai aika ti taku ba a aki kona n riki n aron wanawanara ao otara n tuan te aonaba.
E kan kaotia naba ikai te Atua ba ti bon aki kona n rota aron makana ma kakannatona ao wanawanara ma rabakaura bon te akea iroun te Atua. Te bai ae kan tuangira naba te Atua ikai ba ti kannnanoia n taai nako ao ti na riai ni katikui arora ni kabane inanon Baina. Aio bon te wewete nakon te onikmaki ni koaua ao n aki nano uoua ba bon akea tokin korakoran ao makan te Atua. Ngkana ti onimaki ni koaua ao nanona ngkanne ba ti na aki tabe n titiraki ba e na kanga ni riki te bai teuana ke teuana ma ti na ti tauraoi n tai nako ni karaba te Uea n taian kamimi ae karaoi nakoira ao ibukira.
N te bong aio ao inanon nikiran bongin te karemo aio ti a manga kauringaki ba te bai ae kakawaki bon nanora aika a tauraoi ni kaitiakaki n Raran Iesu ae bon te Tibu te Tei ae kamaunai buren aonaba ni kabane. Ba aki kakawaki ara makuri n benetenia ke nebonebo ngkana aki irianaki ma te nano ae itiaki ao n tangira man nanoanga.
Nte ewangkerio ao ti a manga ongora karakin moani kamaiuakira iroun te Atua inanon te Kaotitaeka. E ngae ngke e tare ana iango Nei Maria ba e na kanga ni karaoaki aron are e taekinna te Anera ae Kabiriera ao e tauraoi n anga baai ni kabane nakon te Atua inanon ana kaeka are e kangai, Bon ana toro te Uea ngkai, E na karaoaki nakoiu n aron am Taeka. Bon ti man ana kaeka aio Nei Maria aio ae a roko iai nakon aonaba ana kamaiu te Atua nakoia aomata ni kabane. Ti a kauringaki ikai ba raon te onimaki bon te nanorinano ao te ongotaeka. Ti na tauraoi n taai nako n onimakina te Atua ni baai ni kabane ao ti na butia n tai aio ba E na biti ao ni kaboui nanora inanon Raran Natina ae Iesu ba ti aonga ni kamaiuaki. Ti na onimakina te Atua ba akea te bai ae aki kona ni karaoaki Irouna ao ti bane ni kona n riki ba aomata aika boou n tain te karemo inanon ana nanoanga te Atua ae akea tiana ao tokina.
- Details
- Written by Taranieta
N tai akekei ao te Tabati aio ae te ka-5 n Tabati n Karemo ao a tataneiai n rabunaki iai bain nanon te umantabu n te kara ae te ‘purple’ .
Bukin aio ba ti na katannakoi ara iango ma ara kantaninga man tamnein Iesu ma bain nanon ara umantabu aika a korobanna man karaoaki, ao ni kaineta ara iango ti nakon Iesu ae Atuara. Ti na taraia ni bon oin arona n Atua ae e maiu man maeka ao n ikeike ibuakora ni koaua. E karikira naba ba ti na nora aron rawawatana ao marakina, ngkai bon te rabata Ngaia naba, ao namakinan aron te maraki Irouna, ao riki, ngkai e a bon kaman ataa aron rarawatan ma kakamakun te bai are E nang rinanona.
Tera iroum arom ae ko na karaoia ba ko aonga n iriria ni karaua nanona man kakukureia n tain rawawatana aio man te ingabong ni karokoa ko matu ao ko a manga uti?
Aio kaeka irou, ba e kangai ana taeka “E rangi ni bati n tau Ibukiu ba e na maeka te tangira inanom”.
Ma tera am kaeka ngkoe?
Ti a rabuni naba bai nako inanora ao aika a otabaninira n te kara ae te purple, te kara n nanomaraki. Tia rabuna ara kairirbai, unra, ara aki muti, ara taningaroti, ao baikara riki inanora ao e na tiku ti te TANGIRA n aki rabunaki.
Ti a tara Iesu n te tai aio. Ti a raonna man iriria.
Te tangira ae e uarereke inanora, e na bon kakukureia nanon Iesu n te aro ae e rangi ni korakora.
- Details
- Written by Taranieta
Ana kairi te Tamnei ae Raoiroi
Kariaiakan te Tamnei ae e Raoiroi iroura ma kam’akurana inanora, bon ngaia ni koaua karaoiroan ao kam’aitakin uaara nako, ake kanoan bukin karikara ma muiokoara iroun te Atua, b’a ti na karaoi ibukin nebona ao tiaki neboara.
E nako te miniti ma kanoana, aika ara makuri, ake a kona n tamaroa riki ngke arona ba ti kariaia te Tamnei ae e Raoiroi ba e na makuri inanora. Tera kanoan am miniti aika a nako. T i riai karaiaia ba e na makuri te Tamnei ae e Raoiroi inanora ni katoa miniti, ao tiaki n are bon oin nanora ao ara konabai n aomata.
E nako te miniti ao e anaanai man ab'akin maiura are e a tia n anganira te Atua. E aki nako ao ni katuka karakaan ara bong ni maiu ma e uotanako teuana mai iai, n ikotaki ma ara tai ni kona ni karaoiroa riki ara makuri nakon te Atua n te tai arei.
Ti na butia Tinara Nei Maria, M’engan te Tamnei ae e Raoiroi , ba E na tataro ibukira ba E na buokira n tainako te Tamnei ae e Raoiroi.
Ngaira ti na reita ana tataro Tinara, n karioi ao taekin ara tataro ae e uarereke nakon te Tamnei ae e Raoiroi, n tainako, imain karaoan ara waki ni kabane ao riki, bon im’ain tabekan ara taeka nakoia raora ma ara kairiribai nako, tao n aron aio ”Te Tamnei ae e Raoiroi anganai au iango ma au taeka I a butiko.”
Ti na bon aki uringaaba, ngkana ti tarai miniti aika a nako ba ‘bon Ana m'akuri te Tamnei ae Raoiroi baike a riki. Ti na rangi ni kakatituaraoi, ngkana ti noria ba ti rangi ni bonganga iroun te Atua ian ana kairi te Tamnei ae e Raoiroi, are ti karekea iai katongan Ana kimareirei te Atua iaon te aba!
- Details
- Written by Taranieta
“Ane e kakoauiai ao a na raanga nako mai nanona karanga n ran ni kamaiu, ” ...are bon taekan te Tamnei are ana anganaki ake a kakoaua Iesu.
Te wareboki n te bong aio ao e kaotaki aki butimaean Iesu imuin taekinakin taeka aikai Irouna ao a kangai aomata, “Kai e taku te koroboki ba e na bungiaki te Tia Kamaiu man ana utu Tawita n te kawa ae Betereem ike e maeka iai Tawita ma ngkoa.”
E raba mairouia te koraki arei te koaua are e taekin Iesu nakoia ao te koaua naba are bon Ngaia te Metia are e bungiaki I Beterem.
Ngkana ti iangoa aron rawawatan nanon Iesu n te tai arei, n aia aki kakoaua, ao ngaira n te tai aio, ti na ongo Ana taeka Iesu man kakoaua ke tina kairia naba nakon te kammarakaki ao te kamateaki?.
E aki kona Betero ni kaania Iesu ao n tei ibukina. E tau raroa man katanga nanona ba e kakeaa Iesu.
Ngaira, bon akea tukara ba ti naki rimuin Iesu ao man tau raroa mairouna, ba E taningaira man takin baina nakoira n tainako, man te Eukari ae moan te Tabu nte Umantabu.
Ti na kataua ba tina ira Bakate n te ririki aio, ao inanon maiura, ma ara kantaninga ba tina tei ibukin Iesu ni kakukureia n ara tangira, man aia karawawata uake a nang manga tauria ngkai iaon te kaibangaki .
Ti muiokoira ni kabane iroun Tinara Nei Maria ba e na kakairira nako man te bure, ian ninirana, ba tina kaaina ana tanga, ake taani kabebetea Natina, ba e na ranga mai inanora ni kabane, te karanga n ran ni kamaiu are e na katikia aika a rangi ni maiti.
- Details
- Written by Taranieta
E taku Iesu nakoia ana reirei: “Ao te bai nako ane kam na bubuti n Arau, ao N na karaoia, ba e aong an neboaki te Tama inanon te nati. Ngkana kam butiai te bai teuana n arau ao N na karaoia.” (Ioane 14:13-14.)
Te bai ae ti rangi ni kainnanoia n tainako, bon ana nanoanga te Atua ao ana taeka Iesu anne nakoia ana abotoro bon te bai ae ti riai n iangoia raoi, ba ngaia angan reken ana nanoanga te Atua nakoira.
Ti bon aki ataa aran te Atua ba tiaki kona n weteia, ma ti anganaki te Ara ae Iesu.
Are nanona ba e mena bai ni kabane inanona aika a moan baan te tabu man mimitong ba bon te Atua inanon te Ara aio, ba rab’atan ana Tangira te Atua nakoira, ao maekan te Atua ibuakora ao inanora ni katoa tai ae ti taekina aran Iesu..
Ti ongora aron taian makuri aika a kamimi ake a karaoi abotoro ngkoa, ao aomata naba n tai aikai, n aran Iesu ae moan te tabu ao man m’aka.
Ngkai a kona ni karaoaki kakai ma kamaiu n aran Iesu n tainako, ao ti kakoaua maekan te Atua inanon te Ara aio. Maitira ngkanne taian bure nakon te Atua, aika a tia ni karaoaki man kamatauningaana inanon kabonangaan te Ara ae Iesu n aki Akaka, ara aki muti ao anuara ni karaoi baika e tuangira Iesu ba tin a aki karaoi?
Are nanona ba ti riai n wetea aran Iesu ni katoa ikeikera man bubuti ana nanoanga, ao E na anganira Ana nanoanga man kanimuira ma Ngaia ba E kakaonimaki nakon ana taeka.
Aio arona ba ko na nanona iai am taeka:
“Iesu Kristo te Uea, (Ikerake n taekinna ni karaurau) - Natin te Atua, (ngkana ko ikerikaki), nanoangai (ko ikerake), - ba te tia bure ngai (ikerikaki).”
Karikia ba taetaen ikeikem ba E taku, “ N Arau ao N na karaoia’.