Kanan Tamneira...
- Details
- Written by Beneteta
Ai tikiraoira ana tataro Ataria iroun Taniera 3:34-43. N te tataro ni bubuti aio ao e taekinaki aron ana bubuti te tia tataro nakon te Atua ae e on n te tangira. E bubuti ba e na butimai nanora te Uea aika a rawawata man nanokawaki ao man kamaeuira n Ana makuri aika a kamimi ba e aonga ni karekei iai neboan arana ae tabu.
Bon te Atua n tangira Atuara. E taekinaki aron ana nanoanga ma ana tangira ngkana e ongo ara tataro aika a kaota nanora aika a koaua aika a nanona raoi ae ti atonga. E rangi ni kai baka man kamaraaki aton Atuara n tataro n rairannano ni koaua aika a bubuti man onon ibukin kabaran bure. Ti bia bane n ururinga aio.
E kamatoaki n te evangkerio mai iroun Mataio 18:21-35 ba ti riai n rabakau n ikabarabure i marenara. Ti kauringaki ba ti na tatauraoi ni kabarai aia bure akana a bure nakoira. Ti na tauraoi ni butimai kabara bure mai irouia tarira nako ba ti aonga ni kakukureia Atuara are ngaia bon te tangira. E tuangira Mataio ba e kangai Iesu nakon Betero, kabara ana bure tarim are e okioki ni kabara ana bure itibui te tai itua. E motika ana taeka Iesu ni kangai. E na bon rangi n un Tamau irouia ake a aki kan kabarai aia bure taria ngkana a roko ni kabarai aia bure.
Tariu ao maneu, ti a butia Tamara are i Karawa ba E na katauira n ana karatia ba ti na kona n rabakau n ikabarabure i marenara n te maiti ae itibui te tai itua ba ti aonga n karekea iai neboan aran Atuara ae maka man mimitong. Hosanna!
- Details
- Written by Beneteta
Kam na mauri tariu ao maneu n ana tangira ara Uea ao Atuara ae Iesu te INatareta!
Ngkai I taibina atun au tibatiba aio ao kanga e rotai te nanokawaki ma te titiraki ba e aera ngkai a rawa iroun Iesu kain abana? E nako riki au titiraki ma tangin nanou ba ai taonabara aron kakabaiakakia iroun Iesu ngke arona ba a butimaia ma te uki n nano ngkekei naba!
N te evangkerio ao e taku Santo Ruka ba ni kaotan rawaia kain ana kawa Iesu irouna n rabakauna n taetae nakoia inanon te tinakoka ao a titiraki ao a taku: "Tiaki natin Ioteba teuanne?" Aei are e kauka au iango man roko au titiraki ae e kangai: Tao e na aekakira arou ngke arona ba I mena ibuakoia botanaomata aikai? Ngke arona ba ngai naba te INatareta e na kanga arou nakon Iesu? N na kariaia ae ngaia natin te Atua ke N na aki? Tao e na bon bae ni kangai naba au titiraki ba antai Iesu, tiaki are natia te koraki akekei?
Ma e aoria ba e aki kakawaki taai aika a nako, ma ae e kakawaki ae ngkai. Terana arou ngkai - I butimaea Iesu ngkai ke I rawa irouna? /ao ngkami tariu ao maneu kam butimaea Iesu ke kam rawa irouna? Tera am kaeka n te tai aio?
Ti a kaitaua Iesu n karekean te tai ae e a manga titirakinira naba iai n arona aei. ' Ao ngke ko rawa naba irou ke ko aki?'
N te katenua ni wiki ni karemo aio ao ti a kananoa riki iangoan ara kaeka nakon Iesu man butia iroun Tamneina ae Raoiroi ba E bia raonira inanon te wiiki aei man kaungai nanora ba ti na kona n karekea ara kaeka nakon Iesu ae moan baan te raoiroi.
Ti a tataro: Iesu ae Atuara ao ara Tia Kamaeu, ko raba n am titiraki nakoira n te bong aei. Ti ataia te Uea ae ko tangirira ao ko kan koaua n ara tangira ibukim. Iesu anganira te wiki aio ba ara tai n tirobai am makuri n tangira nakoira n maeura ba ti aonga ni kona ni manga tanrikaki man oki nakoim ni karabako ao man tauraoi n anganiko ara bai n tutuaraoi ba kaotan ara karabaraba nakoim n aiaron teuare Naaman are te ITiria, ngke e tia n tebotebo n te Karanga itua te tai ao e kaitiakaki man aorakin kunna ao e oki rikaaki nakon am aomata man karaba. Ti bia katotonga aron teuaei man kona n uringi am makuri n tangira nakoira ao n kataua ba ti na okirikaki man karabako ba bon ngkoe Atuara ao ara Tia Kamaeu ae ko tangirira n te tangira ae e aki tiatianaki. Ko raba Iesu. Hosanna.
- Details
- Written by Uriam Timiti
N ana baebaeti Mika ao e tataro ni kangai, "Te Atua kawakinia am botanaomata n aiarom are ma ngkoa. Ko kamarakeia n uteute aika mawawa, ko tauraoi ni kaitiaki aia bure ao ni kaoti kanikina nakoia ibukin am kamaiu. Ko tauraoi ni kawakina am berita n akoi nakon Aberam ao Iakoba n aron are man te moan tai."
Tariu ao maneu ao aio aron ana tangira te Atua nakoira ae moan te kororaoi n taai nako. Ao bon aio arora ni kakawakinaki ao ni kimareirei ngkana ti maeka inanon ana kakawakin te Atua. Bon aio maten nanon ao kimareirein te Atua iroura ba kaotan ana nanoanga nakoira n tai nako.
N te ewangkerio ao ti a manga ongora te karaki ae ti bon bane n taneiai iai are taekan te nati ae bakatae. Ba e aera ngkai e bakatae? Ibukina ba e kabanea tibangana mairoun tamana n aki akaka ni karokoa ae bane ao e a rotaki n kainnano ma te baki. Ibukina ba e kitana ana tangira ma ana kakawakin Tamana are E katauraoi baai ni kabane ao e ira nanona ni kakukureia rabatana. E a tia n reneia ba e na ira ana kairiri te iriko (te riaboro) ao ti aki te Atua.
Ma tera ae riki ngke e taonnako te nati aio mairoun tamana? E tiku tamana n aki rau, n tabeaianga ao n nanokawaki ngkai e a kitanna natina ao e tiku ni kakantaninga ba ningai te tai ae nang oki iai natina. Ai kawara te Tama aio n ana tangira ni baba ibukin natina. Ai kawara te Atua n ana tangira ae bakataeaki man aki mutiakinaki? Ma e aki bara nanon te tama aio ni kariariaa okin natina. Ao ai babakainera te nati aio nakon tamana are a bon katikua ma te uruaki n nano ni kakantaninga karairakina.
Tariu ao maneu ti na ongo banan te Atua nakoira n te bong aio ao ti na tauraoi n oki Nakoina ao n aki urua nanon te Uea n tataningaira. Ti a bia aki katotonga te nati ae babakaine aio nakon ana tangira tamara are E kimareirei nanona ngkana ti maeka inanon ana tangira ma ana kakawakin.
- Details
- Written by Uriam Timiti
E anganira ana tua te Atua ba kairara nakon te kamaiuaki ao te kabaia. E kaotia naba te Atua nakoira n ana tua ba E tauaninne iroura ao E aki tangiria ba ti na raure nako ma ngaia. E kauringira naba te Atua aron kakawakin irakin ao karaoan nanon ana tua ao te rekenikai nakoira ngkana ti aki kawakin ana tua. Ba e na ruonira te rekenikai nakoira ao nakoia naba aua te roro are imuina. Ao irouia ake a ira nanon te Uea a na karaoiroaki ma kanoaia ake imuina n aki toki.
Tariu ao maneu ti riai ni ongo banan te Atua nakoira n te bong aio ao n ira nanon ana tua ake bon kairara nakon te maiu ae aki toki. Ti karekea ana kakabaia te Atua ao nakoia ara utu n te roro are imuina man maiuakinan ana tua ao karaoan ae raoiroi.
Ti na kawakinira man unin te Atua riki ngkana ti bainikirina umana ae tabu. Ba ti kakoaua man te ewangkerio ba bon ti aio te tai ni maiun Iesu ae E urarake iai n un nakoia te koraki ake a karekea Uman Tamana ba te tabo ni bobai. Ti na kawakina tabun taian umantabu are kawakinaki iai Rabatan Iesu n te Eukari. Ti aki naba manrerea Nei Maria ae tinan te Atua ngkai e na bon tauraoi n irantanga Iesu.
Ti na butia te Atua ana buoka ao ana karatia ba ti na kawakin ana tua te Atua ao ni barua te wanawana are mairouna ba ti aonga ni karekea te kakabaiaki nakoira ma ara utu ake imuira. Ti na tauraoi naba ni bubuti ana kamaiu te Uea ibukin aia kairua ara bakatibu ake ti a kona n rotaki iai ngaira te kanoa.
- Details
- Written by Uriam Timiti
Inanon tain te karemo aio ao ti riai ni bubutia te Uea ba ti na kawakinaki man te bure. Ti kakoaua ba inanon maiura aio ao bon uoua aron taraan ara kekeiaki iroun te Uea ae ti kona n noria. Ba ngkana ti kekeiaki ni karaoa ae raoiroi ao ti a manga karaoa ae buakaka imuina ao ngkanne a na bane mauna ara raoiroi ake ti a tia ni karaoi mai maina ao a na motikaki taekara iaon ara makuri ae ti karaoia ngkai. Ma ngkana ti a tia ni karaoa te bure n taai aika nako ao ti a manga rairi nanora ni karaoa ae raoiroi ngkai ao ngkanne a na bane ni mauna ara makuri aikai a bubuaka ake ti a tia ni karaoi ao na motikaki taekara iaon ara makuiri ae raoroi ae ti a tia ni karaoia.
Ai ngaia are I taku ba te bai ae kakawaki n tai nako bon karaoan te makuri ae raoiroi n te tai ae ngkai ba boni ngaia aio aron motikan taekara. E bon nori aron mamarara Iesu ao ti na bon onimakinna ba Ngaia ae na buokira inanon te kanganga ma te rawatwata. Inanon ana kaibangaki Iesu ao ti a bane n anganaki iai te kona n tokanikai iaon taian kataki ma kariri nako.