Kanan Tamneira...
- Details
- Written by Uriam Timiti
Inanon karakinan maiun St Baraniko n Assisi ao e taekinaki ba teuana ana anganano St Baraniko bon kammarakan rabatana. Ao e aki toki n taku te Santo aio ba te aomata are kataia ni kawakina te kimareirei inanona ao i tinanikuna inanon te itiaki ao e na bon akea te ioawa ae a na kona ni karaoia nakoina taian riaboro. A na kangai; "Ngkai e kaota n taai nako te kimareirei ana toro te Uea aio ao ti bon aki kona n nora kawaira n rinnako irouna ao ni kaikoakia."
Tariu ao maneu I taku ba teimatoan te kimareirei n taai nako iroura bon kaotan te teimatoa ni maiu inanon ana tangira te Uea. Ngkana ti maeka n ana Tangira te Uea ao nanona ba ti onimakina te Uea n taai nako inanon te kukurei ao inanon naba te kanganga, te aoraki ao te rawawata. Ba ngkana ti maeka inanon ana tangira te Uea ao nanona ba ti maiu n ti teuana ma te Atua- ngaira inanon te Atua ao te Atua inanora. Are nanona ba bon raora n taai nako te Atua ao e koro raoi ana tangira nakoira. Ngkana ti kakoua man onimakina aio ao eana riai n akea te tai ae ti na kona n nanokawaki iai ao ngkanne e na bon aki kona n reke kawain te riaboro n rinnako iroura mani kakiriweira. Ngkana ti taonaki n te rawawata ao ti riai ni waekoa ni butia te Atua ba E na anganira ana karatia ni kona ni kateimatoa kimareirein te kamiauaki are ti anganaki iroun Iesu ni marakina ao matena ibukira ao mangautina n te mimitong.
- Details
- Written by Uriam Timiti
I uringa ana tibatiba te Tama n te rereua teuana are e kabarabara iai aron te bai ae na riki ngkana ti kataua ba ti na urarake n te Tamnei ae Raoi. E kabotaua ma aron te kai (aekan te kai-ni-maeao) ae bubura are kabakaki n te ai ae urarake. Ao tera te bai ae na riki? Te moani bai ba ko na nora te ran ae barekareka mani moanmona n otinako man te kai anne. Imuina ngke e nang moanna ni kabuebue te kai ao ko nang nori taian man ao mata aika uarereke n otinako man te kai ba a na kararoaia man te kabuebue. Imuina riki ngke e a tabe ni bue te kai ao a nang noraki taian man aika aekan te naeta aika bubura n otinako man te kai ae aki kantaningaaki ba ngaia e maeka inanon te kai ae bubura are e karabaa inanon te kai. Imuin aio ao ko tabe n nora uran te kai n rikirake ma e bon kona ni kinaki aron urana ae kaokoro ma te ura n ai are mai maina. Nte kabanea ao ko a kona n nora te ura n ai ae ti teuana ao ko aikoa kona nora uran te kai are e a tiba baka ba ai teuana urana ma te ai are mai maina.
Tariu ao maneu Te Tamnei ae Raoiroi boni Ngaia te Tia oniki bai ni kabane. Ti na kona n riki n ti teuana ma Iesu inanon te Tamnei ae Raoi n te aro are ai tiaki Ngaira ae noraki iroura ma ai bon Iesu ae maiu i nanora. Ngkana ti kataua te ai ba ti na urarake iai ao ngkanne ti na kona ni kaitiakaki man taian buakaka ake a raba i nanora ake a kabotauaki ba taian naeta ake a otinako man te kai. Bon aio te anga ae ti kona iai n riki raoi ba mangan ni koaua te kai ni kurebe are bon Iesu are nanona ba raoiroin Iesu ni kabane a na bane naba n reke iroura.
- Details
- Written by Uriam Timiti
Tariu ao maneu ti kauringaki nte bong aio ba tera te bai e ti na karoaia ba ti aonga n kakoaua maekan te Atuan i nanora. I taku ba e rangi n teretere raoi oin te rongorongo ba e na bon banin ni koaua te maiu iroura ngkana ti kariki ua ao ti na ti kona ni kariki ua ngkana E maeka ni koaua te Atua i nanora.
Ma ti na kanga ni kakoaua ba E maeka te Atua inanora? Eng, E bon tuangira arora Iesu n te bong aio n ana taeka ae kangai;"ngkana ko tangirai man kawakin au taeka ao E na bon tangiriko te Tema ao ao ti na roko ni maeka iroum."
Te bai ae tangimaka irou ba ti n a riai ni katauraoa mwengan te Atua i nanora n te aro are na aki ti kawarira te Uea ma E na maeka inanora. Are nanona ba ngkana ti katea mwengan te Atua inanora ao ti bon kaotia ba ti kainnanoa te Atua ba E na tiku iroura n aki totoki. Ao ngkana E maeka n taai nako te Atua inanora ao ti na kakoaua ba ti na kona ni kariki ua aika bati ao ti na karekea iroura te maiu ae kororaoi. Bon ti te ongotaeka ae na anganira te kona n riki n ti teuana ma te Atua ao te kona ni riki ba taan kakoauaa maeun ao makan te Atua ni karaoi makuri ni kamaiu aika kakannato. Ma n aiaron Bauro ao ti na riai n ataia n taai nako ba akea te bai ae ti kona ni karaoia ma bon te Atua ae na makuri inanora ao ae na na riai ni kamoamoaki man neboaki n ana Tangira ae kororaoi.
- Details
- Written by Uriam Timiti
Imuin mangautina ao E aki toki Iesu ni kakaoti nakoia Abotoro ma ana reirei ao e tabe n noraki ninikoriaia Abotoro ni kabuta te Rongorongo ae Raoiroi nakoia Iutaia ao Tientaire. Ngkai e a kaan ana tai Iesu n nakon Tamana ao E tuangia ana reirei ba E raoiroi ba E na nako ba e aonga ni kaoka te Tia Ibuobuoki ao ni katauraoa nnera irarikin Tamana i Karawa. Ba ngkana e nako Iesu ao e nang tiba kona ngkanne ni maeka ibuakora n taai nako inanon tamneira. E a roko te tai are ti na kaitibo iai ma Iesu tiaki ngkana ti noria ni kaoti ma ti na kaitibo ma Ngaia ngkana ti katauraoa nnena ni maeka inanora. Aio bon kororaoin aron ara reitaki ma Iesu are ti ataia ba ti maeka Inanona ao Ngaia inanora. Are nanona ba okin Iesu nakon Tamana bon kaukan te anga ae E na ni kona iai ni maeka ibuakora n taai nako.
E katauraoa Iesu aron te kona n tiku ibuakora inanon taian takarementu ake E a anganira mai aon ana kaibangaki ngke E kataua ba e na ewaraki ao mani kaukai rarikina ba e aonga n ranga mai iai te Rara ibukin kaitiakn ara bure ao te Ran ibukin te maiu inanon te mimitong. Inanon ikoakin Rarikina ao E kataua Iesu ba e na uki tabaninin ao kororaoin te kamaiu nakoira are bon mai Irouna ao ti a karekea iai te kona ni katotonga n arona ni kabane.
Tariu ao maneu e weterira te Atua ba ti na kona naba ni butimaei taian ikoaki inanon maiura ba ti aonga naba n anga are boni ngaira nakoia aomata nako. Ba ngkana akea te kaibangaki ao bon akea te kamaiuaki ae na reke iroura. Inanon te kaibangaki ao ti a tiba kona iai n rooti maiuia tarira ma manera. Te kaibangaki bon ti ngaia kawaira ni kona ni waerake nakon te Tama i Karawa ao ni maeka ma Ngaia inanon kororaoin te kukurei.
- Details
- Written by Taranieta
Ti kakatituaraoa te Atua n te Tabati aio n tamaroan ana rongorongo nakoira ni kaineti ma te nakoa ni kairiri aika e a tia n anganira n te wiki aio. Tiaki kona ni kairiiri ngkana tiaki nim ma Iesu.
Akea aron reken maiura ba ti ngkana ti bon nim ma Ngaia ni koaua n tainako, ba maangana, Ngaia ae Ana kainikurebe te Atua ae Tamara.
Ana bon akea ara konabai ni kairiia tarira ao manera ma ara utu nakon te kamaiuaki ngkana akea te maiu iroura.
E tuangira Iesu n te bong aio ba te maanga are e kariki uaa, ao e na bon karaoa te kaitiaki, (pruning) nakoina te Atua ba e aonga ni kairiki uaa aika a bati riki. Ma ngkana e aki kariki ua te maanga ao E na koreia ni kanakoa.
N ana ‘kaitiaki’ te Atua nakon te manga are e kariki uaa, ao ti nora iai ana kakaonimaki ao ana tangira te tia ribana, te Atua ae Tamara, nakon are e nim ni koaua ma Iesu ao e maeka inanon Iesu ao Iesu e maeka inanona. E ribanaia man nabenabeakinna te Atua, ni kaitiaki matena nako ao E maiureirei man kariki uaa aika a rangi ni maiti.
E rangi n nano ana kabotau Iesu aio, ae bon ngaia te kainikurebe ao ngaira bon mangana. Ti nora moa iai nanon Iesu n tangirira ni koaua ni kan nim ma ngaira n tainako. Ti nora naba nanona ba akea riki te bai ae E tangiria Iesu mai iroura irarikin ae E kan maeka I nanora ao ngaira inanona n tainako, ao n aki toki, ba ti na uaia ni kimareirei n tainako, ni buokia n tibaa ana tangira ma ana kamaiu ao man neboneboa te Atua, ngkana ti kariki uaa aika a bati, ao ti riki ba Ana reirei ni koaua inanon maiura
.