Kanan Tamneira...
- Details
- Written by Uriam Timiti
Wiki 31 Kauabong
Warekan ana Reta Bauro nakoia I Roma 12: 5-16
Ti teuana te rabata ngaira i nanoni Kristo, ao ti buobuoka te rabata ae ti teuana. Ma kakaokoro karea aika reke iroura nako, n ai aron akoara. Ngkana te taetae ni burabeti, ao e na iraki iai te onimaki. Ngkana te ibuobuoki, ao e na karaoaki n te ibuobuoki. Ngkana te reirei, ao e na wakinaki te reirei. Ngkana te anai nano, ao e na karaoaki te anai nano. Ane tibatiba, ao e na tibatiba ma te tituaraoi. Ane babaire, ao ke e marurung iai. Ane kaota te nanoanga, ao ke e kukurei iai.
Ke e tai kewe ami tangira; kam na riba te buakaka, ao nanona te raoiroi. Kam na itangitangiri n ai aroia tari, ao kawakina te karinerine i marenami.
Kam na makuri i bukin te Uea ma te nanomaka ao te marurung ae teimatoa, ao botumaka n tataro. Buobuoki kainnanoia kiritian, ao tatauraoi n akoia irua.
Karaoiroia akana bainikirini ngkami: karaoiroia, tai karekei kaia. Kimareirei ma akana kimareirei, tang ma akana tang. Kaota te akoi ae ti te arona nakoia aomata ni kabaneia. Tai kamoamoa, ma raraonia akana mangori.
Te Taramo 130
Kaekana: E rau nanou iroum, Atuau.
Te Uea, e aki kamoamoa nanou, A aki toka matau.
I aki ukera te kakanato, Ke te kamimi ae riaon arou. K.
Ma I kawakina tamneiu, n te rau ma te kainababu.
Tamneiu i nanou, ai aron te tei, Ae raure ma te mamma, ae taua tinana. K.
Iteraera, onimakina te Uea, Ngkai ao n aki toki. K.
Alleluia, alleluia.
Katituaraoa te Atua ae Tamara, iroun ara Uea ae Iesu Kristo; ao ke e maiu i nanomi ana taeka ae banin raoi. Alleluia.
Euangkerio
Warekan ana Euangkerio Ruka.14: 15-24
E kangai nakoni Iesu temanna i buakoia raona n amarake: “E kabaia ane amarake n Uean te Atua.” E taku Iesu nakoina: “E katauraoa te amarake ae ababaki temanna te aomata, ao e kaoia aomata aika bati nako iai. Ngke e a bo tain te amarake, ao e kanakoa ana tabonibai nakoia ake a kaoaki ba a na kangai nakoia: ‘Nakomai, ba a bane n tauraoi bai ngkai.’ Ma a uaia ni karautaeka ngaia ni bane. E kangai te moa n aomata: ‘I a tiba kaboa abau, ao I bae n nako n noria; I a butiko, kariaia taekau.’ Ao e kangai temanna: ‘I a tiba kaboia tengaun te kaomane, ao I nako ni kataia; taiaoka, kataua taekau.’ Ao e manga kangai temanna: ‘I a tiba mare, ma ngaia ae I aki kona n nakoati.’ Ao e oki te tabonibai ni kangoa ana toka. Ao e un teuarei, ao e taku nakoina: ‘Kawaetatako nakoni maraen te kawa ma kawaina, ao kairia mai kainnano, baibainanti, mataki ma mauku.’ Ao e kangai te tabonibai nakoina: ‘Te toka, e a tia ni iraki nanon am taeka, ao e mawa naba te tabo.’ E manga taku te toka nakon ana tabonibai: ‘Nako nori taiani kawai ma rarikin taian o, ao kairoroia aomata ni kairinia, ba e aonga n on au auti.’ Ba I bon tuangingkami, ba akea temanna i buakoia tani kaoaki ae na katonga au amarake.”
Tibatiba: Ana kakao te Atua nakon ana baka n amarake
Tariu ao maneu akea ba ti a tiba tia n rinanon bong aika uoua aika tiba nako are ti a bane iai neboia tarira ma manera ake a tia n toknikai i Karawa ao a tauraoi ngkai ni buokira ngaira aika ti maiu i aonteaba. Te kaniwanga ae a tia n anganaki tarira ao manera aika tokanikai bon te kona n nora Matan te Atua ae moan te maka, te tabu ao te mimitong. Te kaniwanga aio bon te rinnako inanon te kabaia ao te mimitong ae aki totoki i Karawa.
N te bong are ngkoananoa bon aia tai tarira ao manera ake mena n te burikatorio ake a tabe ni kaitiakaki ba aonga ni kona n rin i Karawa. Aio kain te Ekaretia are a kakantaninga buokaia n ara tataro ba aonga ni kairikaki ao ni karokoaki i Karawa. Aikai te koraki ake e a toki ngkai aia tai ni kona ni buokia i bon irouia ao a tataninga ngkai kabarakia man te burikatorio ao karokoaia n te Abanuea ae Karawa.
E matata ngkanne ba ti teuana raoi oin ana kantaninga te Atua ibukira ni kabane ba ti na kaiokaki ma Ngaia inanon maiura aio ba ti na roko kaea mwengara ae a tia ni katauraoia Iesu ibukira. E riai ni matata raoi iroura ba e a bon tia ni bane ni kaotaki nakoira te rongorngo aio ba kanga ai aron te kakao nakon te baka n amarake are e na bo i Karawa ao ngaira ti bane ni kaoaki nako iai. N reitaki ma te kakao aio ao e matata n te ewangkerio ba E a tia ni katauraoi bai ni kabane te Uea ibukira. Ma ngke a roko ara kakao ao ti kakoaua ba iai tani kaoaki aika a na roko ao iai aika a na aki reke rokoia ba iai tabeia.
Eng tera am ingo tariu ao maneu n te kakao aio?Tera ae na riki ngkana ti kaeka te kakao nakon te baka n amarake ao ti roko ao tera ae na riki ngkana ti aki roko nakon te kakao aio ba ti tabetabe? Ngkana ti roko ao ti na bong katonga te kakukurei ae bati ae a tia ni katauraoaki ibukira.Are nanona ngkanne ba ti na katonga kororaoin te kukurei ae akea tokina i Karawa. Ngkana ti aki roko ba ti tabe ao engae ngkana ti karautaeka nakon te kakao ao te bai ae na riki nakoira ba e na bon aki kona n reke ara tai ni katonga te kukurei ae akea tokina.
Bon te reirei nakoira ikai ba ti na riai n tatauraoi ni kaeka ana kakao te Atua nakoira ba ti aonga ni kona n rin n te Abanuea ae Karawa ao ti na nako n te mate ae akea tokina ngkana ti aki kaeka ana kakao te Atua nakon ana baka n amarake.
- Details
- Written by Uriam Timiti
Wiki 31 Moanibong AIA TOA MATE
MASS I
Te Moa Ni Wareboki
Warekan ana Boki te burabeti ae Itaia. 25: 6 – 9 (vg)
I aon te maunga aei, E na katauraoa te amarake ae kanuai te Uea ae moan te maka i bukia botanaomata nako. I aon te maunga aei E na kanakoa te rabuna n nanokawaki mai aoia botanaomata nako, ao te ninira ae a rabunaki iai aba nako: E na kamauna te mate n aki toki. E na kaoi mataia aomata nako te Uea man rannimataia. E na uota nako kamamaeaia ana botanaomata n tabo nako i aonaba, ba bon ana taeka te Uea. N te bong anne, ao e na kangai te aba: “Noria, bon Atuara are ti kantaninga kamaiuara mairouna; bon te Uea ae ti onimakinna. Ti kabaia ma ni kimareirei ngkai E kamaiuira.”
Te Taramo 102: 8, 10, 13 – 18
Kaekana: E akoi ma n nanoanga te Uea.
E akoi ma n nanoanga te Uea, E iremwe n un ao e bati n tangira.
E aki tiringira n ai aron ara bure, E aki kaboira n ai aroni buakakara. K.
N ai aron te karo ae akoia natina, ao ai aron te Uea n akoia akana makua;
ba E ata aroni karikara, E uringnga ba te tano ngaira. K.
Maiun te aomata, ai aron te uteute, e maiu n ai aroni uen te tawana:
e ukia te ang ao e mauna, n aki manga noraki ni nnena. K.
Ma e teimatoa ana tangira te Uea, nakoia akana makua;
E eti nakoia naba aia kariki natia, Ngkana a kawakina ana berita
ma n uringa irakin nanona. K.
Te Kauoua ni Wareboki
Warekan ana moa n Reta Bauro nakoia I Korinto. 15: 51 – 57 (vg)
N na kaongoingkami te kamimi teuana: ti na aki bane ni mate, ma ti na bane n onikaki. Bon te bai ae na karina, n ti teuana te rube ni mata, ngkana e tang te kaitira ni bu; ba e na tang te bu. Ao a na teirake mate, n aki manga mate, ao ngaira ti na onikaki. Ba e riai te rabata ae mkamka aei ba e na karina te aki mka; ao te rabata ae mamate aei ba e na karina te aki mamate. Ngkana e a tia ni karina te aki mka te rabata ae mkamka aei, ao ngkana e a tia ni karina te aki mamate te rabata aei, ao e na koro iai bukin te taeka are n te Koroboki, ae kangai: “E mauna te mate n ana tokanikai te Uea.” Ba enga ana tokanikai te mate? Enga ana kainewea te mate? Ana kainewa te mate, bon te bure; ao ana kainewa te bure, bon te tua. Ma ti na katituraoa te Atua, ngkai E anganira te tokanikai iroun ara Uea ae Iesu Kristo.
Alleluia, alleluia.
Boni Ngai te mangauti ma te maiu: Ane kakoauaai, ao e na bon aki mate. Alleluia.
Euangkerio
Warekan ana Euangkerio Mataio. 11: 25-30
E tataro Iesu ni kangai: “I karaoiroiko, Tamau, ae Ueani karawa ma aonaba, ngkai Ko karabai baikanne nakoia akana wanawana ma akana rabakau, ao Ko kaoti nakoia ataei. Boni ngaia anne, Tamau, ba bon anne nanom. I anganaki bai ni kabane iroun Tamau, ao akea ae ata te Nati ba ti te Tama, ao akea ae ata te Tama ba ti te Nati, ao ane E kani kaotia nakoina te Nati. Bane mai nakoiu, ngkami aika kam kua ma n rawawata i ani uotami, ao N na kabebeteingkami. Amona au amo, ao reirei irou, ba I nimamannei ma n nanorinano, ao a na reke raun nanomi, ba e kamaiu au amo, ao e bebete uotam irou.”
MASS II
Te Moa Ni Wareboki
Warekan te Boki ni Baebaeti. 3: 17-26 (vg)
E bua te raoi man tamneiu, I aki uringa te kabaia. I kangai: “E bua korakorau ma au kantaninga are mairoun te Uea.” Iaiangoani kainnanou ma rawawtau, bon nimakin te mao ma te ari. E ururingnga tamneiu n aki toki ao e nimamate i nanou. N na kangai i nanou ba e aonga n oki au kataninga: “E tuai ni bane ana akoi te Uea, e tuai tare ana nanoanga: a kabouaki ni katoa bong; E bati ni kakaonimaki.” E kangai tamneiu: “Bon te Uea tibangau, n na onimakinna.” E akoi te Uea nakoia akana onimakinna, nakon te aomata ae ukeria. E raoiroi te kainababu ni kantaninga te Uea ma ana kamaiu.
Te Taramo 102: 8, 10, 13-18
Kaekana: E akoi ma n nanaonga te Uea.
E akoi ma n nanoanga te Uea, E iremwe n un ao e bati n tangira.
E aki tiringira n ai aron ara bure, E aki kaboira n ai aroni buakakara. K.
N ai aron te karo ae akoia natina, ao ai aron te Uea n akoia akana makua;
ba E ata aroni karikara, E uringnga ba te tano ngaira. K.
Ma e teimatoa ana tangira te Uea, nakoia akana makua;
E eti nakoia naba aia kariki natia, ngka a kawakina ana berita
ma n uringa irakin nanona. K.
Te Kauoua ni Wareboki
Warekan ana kauoua n Reta Bauro nakon Timoteo. 2: 8-13 (vg)
Uringa te Uea ae Iesu Kristo, ae natin Tawita, ba E mangauti mai buakoia mate. Bon anne te Euangkerio ae I tataekinna. I kamarakaki i bukina, ni karokoa I a kabaeaki n ai aron te tia kamarua. Ma e aki kon ni kabaeaki ana taeka te Atua. Ma ngaia ae I katau bai ni kabane i bukia akana rineaki, ba e aonga n reke naba irouia te maiu are i nanoni Kristo Iesu, ma te mimitong ae akea tokina. Aei te taeka ae koaua: Ngkana ti mate ma Ngaia, ao ti na maiu ma Ngaia. Ngkana ti teimatoa, ao ti na uea ma Ngaia. Ngkana ti kaki taekana, ao E na kaki taekara. Ngkana ti aki kakaonimaki, ao E kakaonimaki ngaia, ba E aki kona ni kakewea boni Ngaia.
Euangkerio
Warekan ana Euangkerio Ioane. 12: 23-28(vg)
E kangai Iesu nakoia ana reirei: “E a roko te tai ae E nangi neboaki iai Natin te aomata. I tuangingkami te koaua: Ngkana e aki baka koraan te uita n te tano, ao ngkana e aki mate, ao e tiku n ti ngaia. Ma ngkana e mate, ao e kariki ua aika bati. Ane tangira maiuna, a e kabua. Ane riba maiuna i aon te aba, ao e kawakinna ba te maiu ae akea tokina. Ane toro irou, ao ke e rimuiu; ike I mena iai, ao e na mena naba iai au toro. Ane toro irou, ao E na neboia Tamau. E rawawata nanou ngkai, ao tera au taeka: Tamau, kamaiuai man te aoa aei? Ma boni ngaia anne bukini kauian te tai aei irou. Tamau, neboa aram.”
E roko ngkanne mai karawa te bana ae kangai: “I a tia n neboia, ao N na neboia riki.”
MASS III
Te Moa Ni Wareboki
Warekan te Boki ae Taekani Iobi. 19: 1, 23-37
E kangai Iobi: A bia koreaki au taeka aikai, a bia makoro ni kataneaki n te koro ae te biti ma te unika, a bia tane n te ba n aki mamauna!
I ataia ngai ba e maiu te tia ira tangau, ae na teirake, ba te kabanea i aon te aba. Ngkana I a uti, ao e na kateai i rarikina ao N na nora te Atua man irikou. E n ira tangau Teuare N na noria tiaki te ianena ae N na noria ni matau.
Te Taramo 129
Kaekana:I onimakina te Uea, I kakoaua ana taeka.
I weteiko, te Uea, man tabo aika nano, te Uea, ongo banau.
Anga taningam, Nakon tangin au bubuti. K.
Ngkana Ko tau muini bure, te Uea, Ao antai ae na maiu, te Uea?
Ma Ko kakabarai bure: E reke iai karineam. K.
E kantaninga te Uea tamneiu, I onimakina ana taeka.
I karia riki te Uea, Nakon te tia tei ae karina te ngaina. K.
Ba E nanoanga te Uea, Ti Ngaia te tia kamaiu.
E na kamaiua Iteraera, Man ana bure ni kabane. K.
Te Kauoua ni Wareboki
Warekan ana moa n Reta Ioane. 3:1-2 (vg)
Nora abakin ana tangira te Tama nakoira, ngkai ti atongaki ba natin te Atua, ba bon natina ngaira. E aki ataira aonteaba, kioina ngka e aki ata te Atua. Ngkami aika kam tatangiraki, bon natin te Atua ngaira, ngkai naba, ao arora rimui, e tuai ni kaotaki. Ti ataia ba ngkana e kaotaki, ao e na boraoi arora ma arona, ba ti na noria n arona ni koaua.
Alleluia, alleluia.
A kabaia akana mate i nanon te Uea: Ke a motirawa man aia makuri, ba bon iriaia aia makuri aika raraoi. Alleluia.
Euangkerio.
Warekan ana Euangkerio Ioane. 14: 1-6 (vg)
E kangai Iesu nakoia ana reirei: Ke a tai kiriwe nanomi. Kakoaua te Atua, ao kakoauaai naba. A maiti tabo ni maeka n ana auti Tamau; ngke arona ba akea, ao N na kaman tuangingkami. N na nako ni katauraoa ami tabo, ao ngkana I a tia n nako ni katauroa ami tabo, ao N na oki ni kairingkami ba raou, ba kam aonga n mena naba ike I mena iai; ao kam ata te kawai nako ike I nako iai.”
E taku Toma nakoina: “Te Uea, ti aki ata te tabo ae Ko na nako iai, ao ti na kanga n ata kawaina?” E kangai Iesu nakoina: “Boni Ngai te kawai, te koaua ao te maiu. Akea ae nakon te Tama ngkana e aki rirou.”
Tibatiba: Te Atua aikaite koraki aika kan nora Matam
- Details
- Written by Uriam Timiti
Wiki 30 Katenibong
Warekan ana Reta Bauro nakoia I Ebeto. 2: 19-22
Ai tiaki ianena ke irua ngkami ngkai, ma boni kain aia kawa akana raoiroi, ao boni mwengan te Atua, ba kam kateaki i aoia Abotoro ma burabeti aika aana; ao boni Iesu atibun te maninganinga, ao e bane ni matoa te kateitei irouna, n riki ba te uma ae tabu i nanon te Uea. Ao ngkami, kam karinaki naba i nanona iroun te Tamnei, ba mwengan te Atua.
Te Taramo 18: 2-5
Kaekana: E buta aonaba n aia taeka.
E katanoata mimitongin te Atua karawa, e kaota muini baina tinanikuni karawa.
E karakinna te ngaina nakon te ngaina, e kaota taekana te bong nakon te bong. K
Tiaki te taeka, ao tiaki te taetae, ao akea te bana ae oti,
ma a roko banaia i tabon aonaba, a roko aia taeka n tian aon te aba. K
Alleluia Alleluia.
Ti neboiko, te Atua, ti kakoauako ba te Uea, a kamoamoako am koraki n Abotoro aika mimitong. Alleluia.
Holy Gospel of Jesus Christ according to Saint Luke 13,22-30.
Jesus passed through towns and villages, teaching as he went and making his way to Jerusalem.
Someone asked him, "Lord, will only a few people be saved?" He answered them,
Strive to enter through the narrow gate, for many, I tell you, will attempt to enter but will not be strong enough.
After the master of the house has arisen and locked the door, then will you stand outside knocking and saying, 'Lord, open the door for us.' He will say to you in reply, 'I do not know where you are from.'
And you will say, 'We ate and drank in your company and you taught in our streets.'
Then he will say to you, 'I do not know where (you) are from. Depart from me, all you evildoers!'
And there will be wailing and grinding of teeth when you see Abraham, Isaac, and Jacob and all the prophets in the kingdom of God and you yourselves cast out.
And people will come from the east and the west and from the north and the south and will recline at table in the kingdom of God.
For behold, some are last who will be first, and some are first who will be last."
Tibatiba: A na bane te koraki mai maeao, mainiku, meang ao maiaki n amarake n te taibora i Abanuean te Atua
N te ewangkerio n te bong ao ti ongora aron Iesu n nakonako ao n reirei n taian tabo ma kawa imain rinna i Ierutarem. E kaeka temanna ni kangai, “ te Uea a na kamaiuaki ti ttabeman n tain te motikitaeka?” E kaeka Iesu ni kaotia ba “N te tai arei ao a na kataia n rin aomata aika moan te bati n te kawai ae moan te irariki ao bon iai ae a na aki kona n rin ba a na akea korakoraia ao e na manga karina ni kainaki te mataroa. A na kataia ni bubuti ake a mena i tinaniku ba e na kaukai te mataroa nakoia a na kaotiia nakon te Uea ba a bon tia ni momoi ao n amamarake ma Ngaia ma E na kaekaia Iesu ni kangai;”I bon aki kinai ngkami ba kan roko ma ia! Kitanai ngkami aika kam buakaka ao tan bure”. Ao a na bane tewenakoaki i Kenna are nnen n tang ma te kangengee wi ao a na nora Aberaam, Iraaka ao Iakoba ao burabeti n tekateka n te Abanuea Ao a na noria naba aomata aika a roko mai maeao, mainuki, meang ao maiaki n tekateka n taibora n te Abanuea ae Karawa.
N te moani wareboki ao ti tuangaki ba ai tiaki irua ngaira ba ti a tia ni karekea te aro n natinaki iroun Iesu are e mate ibukira ao te kona n riki ba mwengan te Atua iroun te Tamnei ae Raoiroi are ti anganaki n te Bentekota.
Ngkai ti tei iaon bouan te maninganinga ae matoa man tabu ao ngkai a tia ni karikaki nanora ba mwengan Tamnein te Atua ao nanona ngkanne ba ti a tia ni bane ni karikaki ba kain te kawa ae tabu ae Abanuea te Atua i Karawa.
Ngaia ae ngkai ti a bane ni kaongoaki rongorongon te kamaiuaki ao nanona ngkanne ba ti riai n aki nanououa n aron koraoin ana tangira te Atua ibukira ao ti riai ni bane ni waki nako ba ti na kaea te baka n amarake ae katauraoia Tamara ae te Atua i Karawa. Ti riai ni bane n tauraoi ni rinnako ba tan tokanikai imuin ara kekeiaki tamaroa ao tan katonga te kukurei ae kororaoi inanon te mimitong ae akea tokina i Karawa. Ti na riki ba kain te mwati mai maeao, mainiku, meang ao maiaki ni waki nakon te Abanuea ba ti rarikiriki n amarake ma Tamara ae te Atua i Katawa.
- Details
- Written by Uriam Timiti
Wiki 30 Kabong. Abotoro Timon ao Iuta
Warekan ana Reta Bauro nakoia I Roma. 8: 31-39
Ngkana E iri tangara te Atua, ao antai ae na kauntabaira? E aki kamaiua oin Natina te Atua, ma E kaburea i bukira, ngaira ni bane; ao tiaki E a tauraoi ngkanne n anganira naba bai ni kabane ma Natina? Antai ae na kona ni bukinia akana E rineia te Atua? Bon te Atua ae karaoiroia, ao antai ae na kabuakakaia? Tao Iesu Kristo? E bon aki, ba E mate i bukira ao E mangauti, ao E tei i angatain te Atua ba ara tia raoi.
Bon akea ngkanne te bai ae kona ni karaureira ma ana tangira Kristo: te rawawata ma te tabeaianga, te bainikirinaki, te baki, ke te aki rabunaki, te kabuanibai ke te kabang. Ba e kangai te Koroboki: “Ti tiringaki ni katoa bong i buki, ao ti warekaki ba tibu aika nang kamateaki.” Ma ti boni konai aoni bai ni kabane akanne ni makan Teuare tangirira.
Ti bon ataia ba tiaki te mate ke te maiu, te anera ke te mataniwi, te bai ae ngkai ke te bai ae na roko, te korakora, te bai i eta ke i nano, ao bon tiaki te bai teuana ae karikaki, ae na kona ni karaureira ma ana tangira te Atua, are kaotaki i nanoni Kristo Iesu ae ara Uea.
Te Taramo 108: 21-22, 26-27, 30-31
Kaekana: Kamaiuai, te Uea, n am akoi.
Te Uea, ira tangau, i bukin aram, Kamaiuai, ba ko akoi ma ni ibuobuoki
Ba I kainnano ma n akea buokau, e ewaraki nanou n te maraki. K
Buokai, te Uea ao Atuau, Kamaiuai n ai aron am akoi.
A aonga n ataia ba bon am makuri, ao bon oin am kakaraoi. K
E oni wiu n neboan te Uea, I kamoamoaa I buakoia aomata,
Ba E tei irarikin ane kainnano, ni kamaiua mairouia tani kabuakaka. K
Alleluia, alleluia.
E weteira te Atua n te Euangkerio, ba ana botanaomata are E karekea ara Uea ae Iesu Kristo. Alleluia.
Euangkerio
Warekan ana Euangkerio Ruka. 6:12-16
E nako Iesu nakon te maunga ba E na tataro; ao E tataro nakon te Atua n ua te ngaina. Ngke e
a ngaina, ao E weteia ana reirei, ao E rineia tengauni ma uoman, ao E arania ba Abotoro. Ba
Timon are E aranna ba Betero, Anterea ae tarina, Iakobo, Ioane, Biribo, Batoromaio, Mataio,
Toma, Iakobo ae natin Arebaio, Timon ae aranaki ba Terote, Iuta ae natini Iakobo, ao Iuta
Itikariota ae na riki ba te tia kamane.
Tibatiba: E mate Iesu i bukira ao E mangauti, ao E tei i angatain te Atua ba ara tia raoi
- Details
- Written by Uriam Timiti
Wiki 30: Kauabong
Warekan ana Reta Bauro nakoia I Roma. 8: 18-25
I taku ngai ba akea warekani marakiu n te tai aei ngkana e kabotauaki ma te mimitong ae na kaotaki i nanora. Ba a bane baika karikaki ni ingainga ni kariaria kaotaia natin te Atua. Ba a mena i an te baire ae aki kororaoi, n ana moti Teuare bairei aroia, ao tiaki n oin nanoia. Ma bon aia kantaninga ba a na kainaomataki naba man te toronaki ma te aki kororaoi, ao a na roko ni inaomataia ma mimitongia natin te Atua. Ti bon ataia ba a bane baika karikaki ni ngirangira n ariri, ni karokoa te bong aei. Ma tiaki ti anne, ba ngaira naba, aika ti anganaki moan uan te Tamnei, ti ngirangira naba i nanora ni kariaria kamaiuan rabatana. E reke kamaiura ngkai ti onimaki ba ti na kamaiuaki. Ngkana ti nora te bai ae ti onimakinna, ao ti aki onimakinna; ti na kanga n onimakina te bai ae ti bon noria? Ma ngkana ti onimakina te bai ae ti aki noria, ao ti kariaria ma te nanomaka.
Te Taramo 125
Kaekana: Ti a kabaia n ana makuri te Uea.
Ngke E kaokiia taenikai ake kain Tion te Uea, ao ti taku ba ti mi:
A oni wira n te ngarengare, a oni wira n te anene. K
A kangai bekan: “Ana kamimi te Uea i bukia!”
Te kamimi mairoun te Uea i bukira, Bon te kabaia nakoira. K
Te Uea, kaokiia ara koraki n taenikai, N ai aron te karanga n te rereua.
Akana a ununiki n te nanokawaki, Ao a na tai n te kukurei. K
A nako: a nako ma te tang, Ma uotaia te koraa.
A oki: a oki ma te anene, ma uotaia aia babati ni uita. K
Alleluia, alleluia.
Butimaea ma te nanoraoi Te taeka ae unikaki i nanomi, Ba e kona ni kamaiu tamneimi. Alleluia.
Warekan ana Euangkerio Ruka.3: 18-21
E kangai Iesu: “Ai aron tera Uean te Atua? N na kabotaua ma tera? Ai aroni uan te makeke, are e anaia temanna te aomata n unikia i abana; e ikawai rake, ao e riki ba te kai, ao a katania mannikiba ni Mangana.”
E taku naba: “N na kabotaua Uean te Atua ma tera? Ai aron te bai ni kariki buurawa, are e anaia temanna te aine ni kaboa ma tenikuo te baire ni burawa, ni karokoa e a bane n riki.”
Tibatiba: Butimaea ma te nanoraoi Te taeka ae unikaki i nanomi, Ba e na kona ni kamaiu tamneimi