Kanan Tamneira...

Details

Written by Uriam Timiti

Created: 21 October 2021

Wiki 29           Kaabong 

Warekan ana Reta Bauro nakoia I Roma. 6:12-23

I bon taetae n ai aron te aomata, ngkai kam mamara. Kam anga rabatami ngkoa ba ana toro te buakaka ma te kamara, ba kam na karaoa ae buakaka. Ma ngkai, kam na anga rabatami ba ana toro te eti, ba kam aonga n riki n raoiroi. Ngke kam toronaki n te bure, ao akea baemi nakon te raoiroi. Ao tera uana nakoim? Boni baika kam mama iai ngkai, ba bon tokia te mate.

Ao ngkai kam kainaomataki man te toronaki n te bure, ma n riki ba ana toro te Atua, ao kam kariki ua aika kairi ngkami nakon te raoiroi, aika bon tokia te maiu ae akea tokina. Ba boon te bure te mate; ma ana karea te Atua, bon te maiu ae aki toki, i nanoni Kristo ae ara Uea.  

Te Taramo 1:1-4, 6

Kaekana: A kabaia akana onimakina te Uea.

E kabaia te aomata ae aki irarang, Irouia akana buakaka,

Ae aki toua kawaia tani bure, Ae aki raonia tani kakaniko,

ma e kukurei n ana tua te Uea, Ae mamanewea ana tua ni ngaina ao ni bong. K.

E kakatonga te kai ae unikaki, i etani karanga,

Ae anga uana n taina; A aki rarai bana,

A materaoi ana makuri nako. K.

Tiaki aroia akana buakaka, tiaki aroia! Ba a katotonga te mange

Ae ubara nako n te ang. Ba E kawakini kawaia akana raoiroi te Uea,

ma e bua kawaia akana buakaka. K. 

Alleluia, alleluia.

A kamatoaki am tua, te Uea, A teimatoa n aki toki. Alleluia.  

Euangkerio 

Warekan ana Euangkerio Ruka.12: 49-53

E kangai Iesu nakoia ana reirei: “I roko ba N na uota te ai nako aon te aba, ao ai ingaingara nanou ba e na kauraki! Iai te babetito ae I riai ni babetitoaki iai, ao ai tabeaianga ra nanou ni karokoa e a koro bukina!

Tao kam taku ba I roko ni katea te raoi i aon te aba? I tuangi ngkami ba I aki, ma I uota te bobuaka. Ba ngkai, i nanon te auti ae niman kaina, ao a na bobuaka teniman ma akana uoman, ao uoman ma akana teniman; ao te nati te mane ma ana karo; te tina ma natina te aine, ao te nati te aine ma tinana; te tina ma neiere bun natina, ao neiere bun te nati ma tinani buna.”

 

Tibatiba: I tuangi ngkami ba I aki roko ni katea te raoi nako aonteaba, ma I uota te bobuaka

Ti ataia ba E roko Iesu ba e na uota te kamaiuaki man te bure are e a tia n roko i aonteaba irouia ara maoni karo. Ao te kamaiuaki aio e bon reke iroun Iesu ba uan marakina ao matena Iesu iaon te kaibangaki are na karekea te kaiokaki ma te Atua. Ma e aera ngkai e taku Iesu ba e aki roko ba E na katea te raoi i aonteaba ma e na uota te bobuaka? E riki n taekina aio Iesu ibukin ba E ataia ba E tangiria ba ti na kakoaua ba E roko Iesu ba E na urua makan te roo ao te mate are bon uotan te riaboro nako aonteaba. Baini Karawa are e kan anganira Iesu bon aki iraorao ma bain aonteaba. Ba irian aonteaba bon te buakaka, te kaibabaru, te kammara, te kairiribai; ma baini karawa bon te raoiroi, te itangitangiri, nanoanga ao te kukurei. Irian bain aonteaba bon te bure ao te mate ao irian bain Karawa bon te natinaki ao te abaaba irarikin Iesu i Karawa ae aki totoki.

Eng E kan tuangaira ikai Iesu ba te karatia ao te natinaki are ti anganaki ma iaon te kaibangaki iroun Iesu, ti na kakoroa aron te kamaiuaki aio ngkana ti teimatoa ni katotonga maiun Iesu iaon te aba n te maiu aio. Are nanona ngkanne ba inanon maiuakinan te raoiroi n aiaron Iesu ao ti na bon aki kona ni boraoi ao ni katiteuanaki ma tarira ao manera ake a rawa n irira Iesu ma ti na bon bobuaka ma ngaia. Ma e na reke te nanoteuana ao te itangitangiri ma tarira ao manera ake a kan ririmuin Iesu iaon te aba ba aonga ni karekea te maiu ae akea tokina i Karawa.  

 

Details

Written by Uriam Timiti

Created: 19 October 2021

Wiki 29          Kauabong 

Warekan ana Reta Bauro nakoia I Roma.  5:12, 15, 17-21

E roko te bure i aon te aba iroun te aomata ae ti temanna, ao e roko naba te mate, ba muin te bure. Ai ngaia ae e rotiia aomata nako te mate ba a bane ni bure.

Bon te koaua ba e uea te mate ngkoa i aoia aomata nako i bukin te aomata ae ti temanna, ba muin ana bure te aomata ae ti temanna; ma e boni koaua riki ba a na uea i nanon te maiu aomata nako aika anganaki te akoaki ae ababaki ae te karea, ae te karaoiroaki, i bukin te aomata ae ti temanna, ae Iesu Kristo.

A bane aomata ni bakaraki ngkoa n te kabuakakaki, i bukin ana bure te aomata ae ti temanna; ao ai arona naba, a bane ni karaoiroaki n ana raoiroi te aomata ae ti temanna, ae e reke iai te maiu. A bane aomata n riki ba tani bure n ana aki ongeaba te aomata ae ti temanna; ao a bane naba n riki n raoiroi n ana ongeaba te aomata ae ti temanna. E kabatiaki te bure n te Tua; ma ike e kabatiaki iai te bure, ao e kabatiaki riki iai te akoi. N ai aron te bure are uea n te mate, ao ai aron naba te akoi, e uea n te raoiroi i bukin te maiu ae aki toki, irouni Iesu Kristo ae ara Uea. 

Te Taramo 39:7-10, 17

Kaekana: I a roko, te Uea, ni karaoa ae nanom.

Ko aki tangiri karea ma angakarea, ma Ko kauka taningau.

Ko rawa ni karea ni kabuokaki ma karea ni kabarabure,

Ai ngaia ae I kangai: Ae I a roko Ngai. K.

I tuangaki n te nira ni boki, Ba N na ira nanom.

Atuau, I tangira am tua ma nanou ni kabanea. K.

I taekina am raoiroi n te botaki ae kakanato.

I aki kainanbabu, Ko bon ataia, te Uea. K.

Ke a kabaia ma ni kimareirei, Akana ukeriko ni bane.

Ke a aki toki ni kangai: E kakanato te Uea, Akana tangira am kamaiu. K.

 

Allleuia, alleluia.

Am taeka, bon au taura n nakonako, Ao bon otani kawaiu. Alleluia.

 

Euangkerio 

Warekan ana Euangkerio Ruka. 12: 35-38

E kangai Iesu nakoia ana reirei: “Ke a bae nukami, ao ke a ura ami taura. Katotongia aomata aika taninga okin aia toka man te mare, ba a na kauka te mataroa nakoina ngkana e roko ma ni karebwerebwe. A kabaia tabonibai akanne ngkana e noriia te toka n rokona ba a kakaonimaki n tantani i maina. I kaotia ma te koaua: e na kabaea nukana, ao e na kaamarakeia ma n touatinia n tatabemania. Ngkana tao e roko n te nukanibong ke i muina riki ma e noriia n aroia anne, ao a kabaia.

 

Tibatiba: E uea ana akoi te Atua inanon ana raoiroi Iesu Kristo bat i aonga ni kamaiuaki man te bure.

Tariu ao maneu ti kauringaki n te bong aio aron te mate are ti a tia ni kabuakakaki iai imuin ana bure ti temanna ao te kamaiuaki are ti a tia ni karekea ba muin ana nanoanga te Atua are ti karekea man ana raoiroi naba ti temanna. Tariu ao maneu ti kauringaki ikai ba ti riai ni baina te nano ni katituaraoi nakon te Atua ibukin ana nanoanga ma ana tangira are ti a kamaiuaki iai inanon Iesu Kristo are maraki ma ni mate iaon te kaubangaki ibukin kabaran ara bure. Tibangara ae kakawaki man ana taeka te Atua nakoira n te bong aio bon te koaua are ti kona n kairia tarira ao manera nakon te mate ke ti konan angania raora te kabaia ao te kamiuaki ba muin te makuri ae ti karaoia. Ti riai ni kawakinira ba ti na aki reke ba tani kabakaia aomata nakon te bure ao te mate ma ti na riki ba tan katotonga Iesu ni uota te raoiroi nakoia tarira ao manera are a na buokaki iai ni karekea te kamaiuaki ae aki totoki. Ti na tauraoi n ongo banan Iesu n te bong aio nakoira ba ti na mananga n uota te Rongorongo ae Raoiroi ao ni babetoia aomata nako n aran te Tama, te Nati ao te Tamnei ae Raoiroi ba aonga ni kamaiuaki man aia bure ao man roko i Karawa.

Ngkana ti mananga ni kabuta te Rongorongo ae Raoiroi ao ti riai n onimakina Tamnein te Atua ba E na anganira te ninikoria ao te marurung ni karokoa ana kamaiu te Atua nakoia aomata nako.

Tariu ao maneu ti riai n aki nanououa n aron tangirara iroun te Atua ae kaotia iroun Natina ae Iesu ao ti riai ni kauki nanora ni mananga nakon te Atua ni butia ba E na kabarai ara bure ao E na anganira te nanorinano ni koaua ni kaburei maiura ma nanora Nakoina ngkai E bon tangiri nanora ao tiaki ara karea ni kabuokaki.  

 

 

Details

Written by Uriam Timiti

Created: 20 October 2021

Wiki 29          Katenibong 

Warekan ana Reta Bauro nakoia I Roma. 6:12-18

E aki riai n uea te bure i aon rabatami ae mamate, ba kam na iri nanon ana kaibabaru. Tai kataua rabatami ba e na buoka te bure ni wakina ana buaka te buakaka; ma kam na toro iroun te Atua, n ai aroia aomata aika kautaki mai buakoia mate; ao anga rabataia nakon te Atua, ni buoka ana buaka te raoiroi. E na kai tautaeka te bure i aomi, ba kam aki mena ngkai i an te Tua, ma kam mena i an te akoi.

Ti uara ngkanne? Tao ti aorira ni bure, ngkai ti aki mena i an te Tua, ma ti mena i an te akoi? Ti bon aki. Kam bon ataia ba ngkana kam kataua te toro iroun temanna, mai ni ira nanona, ao kam riki ba ana toro teuare kam ongo irouna. Uan te toro iroun te bure, bon te mate; uan te toronaki n te ongotaeka, bon te karaoiroaki.

Kam toronaki n te bure ngkoa, ma E raba te Atua ngkai kam kabanei nanomi ni ira nanon te reirei ae kam anganaki. Kam kainaomataki man te toronaki n te bure, ao kam riki ba ana toro te raoiroi. 

Te Taramo 123

Kaekana: E reke buokara n aran te Uea.

Ngke E aki iri tangara te Uea, ke e kaotia Iteraera

Ngke E aki iri tangara te Uea, Ngke ti ewekaki,

ao a na bon ongiira ni maiu, Ba a uraurake n un. K

E na iekira te ran, E na baroira te karanga,

A na rabunira nao aika ngarengare, Ngke E aki iri tangara te Uea. K.

E na karaoiroaki te Uea, Ae aki tewenakoira ba konani wia.

E kiba nako tamneira n ai aron te mannikiba, Man aia kaintaware tan taware. K.

E moti te kaintaware, Ao ti a kiba nako.

Buokara, bon aran te Uea, Are karika karawa ma aonaba. K. 

Alleluia, alleluia.

Ke e ota matam i aon am toro: Reireiai am tua. Alleluia. 

Euangkerio 

Warekan ana Euangkerio Ruka.12: 39-48

E kangai Iesu nakoia ana reirei: “Uringa aei: ngkana arona ba e ata ana tai te tia ira n roko mataniwin te auti, ao e na aki kataua uruan ana auti. Ao ngkami, naba, kam na tauraoi, ba E na roko Natin te aomata n te tai are kam aki iangoia.” E taku Betero: “Te Uea, Ko atonga te taetae ni kaikonaki anne i bukira ke i bukia aomata nako?” E kangai te Uea nakoina: “Ba antai te tabonibai ae kakaonimaki ma ni iangoiraoi are e na kateia te toka i aoia ana koraki ba e na angangania baunaia n te tai ae riai? E kabaia te tabonibai anne ngkana e noria ana toka n rokona ba e tabe n ana makuri. I kaotia ma te koaua: e na kateia ba mataniwin ana bai ni kabane. Ma ngkana e kangai te tabonibai anne: ‘E iremwe n roko au toka?’ ao e oroia tabonibai ake mane ma aine, ao e amarake ma ni moi ma ni manging; ao e na roko ana toka n te bong are e aki iangoia ao n te tai are e aki ataia; ao e na kabanea man nakoana, ma n anganna tibangaia akana aki kakaonimaki.

Te tabonibai ae ata nanon ana toka, ma e aki tauraoi ni ira nanona, ao e na bati oreana. Ane aki ataia, ma e riai oreana i bukin arona, ao e na karako oreana. Te aomata ae anganaki aika maiti, ao e na bae n anga baika maiti; ane muiokoaki ni bai aika bati, ao e na bae ni kaoki bai aika bati riki.”

 

Tibatiba: Babaina te tantani ba kam aonga n tauraoi ni butimaea Natin te aomata ngkana E roko

Tariu ao maneu ti weteaki ngaira ni kabane nakon te kamaiuaki ae aki totoki. Ti ataia ba inanon kororaoin ana akoi ma ana tangira te Atua ao E kanakoa Natina ae te Rikitemanna ba E na maraki mani mate iaon te kaibangaki ibukin kabaran ara bure. E anganira naba te Atua te kona ni kateimatoa te kamaiuaki ngkana ti na kaburei maiura ba E na tautaeka iai te Atua.  Ti na riai n aki ka uea te bure n rabatara n te aro are ti kataui rabatara ba a na buoka te bure ni wakina ana buaka te buakaka ni karokoa te toronaki n ana kaibabaru te rabata are iriana bon  te mate. Ma ngkana ti toro iroun te Atua, n ai aroia aomata aika kautaki mai buakoia mate; ao ti anga rabatara nakon te Atua, ni buoka ana buaka te raoiroi, ao ngkanne ti na bon kamaiuaki.

Ngkana ti kan kawakina te kamaiuaki are ti a tia ni karekea mairoun Iesu ao ti riai ni babaina n tai nako te tantani ba ti aonga ni butimaea Iesu ngkana E roko. Te tantani bon te teimatoa ni kakaraoa te raoiroi ke te teimatoa n anga rabatara nakon te Atua ba ti na buoka ana buaka te raoiroi ni buakana te buakaka. Ti riai naba n ataia ba inanon ara kekeiaki ni maiuna te raoiroi ao e tauraoi ana nanoanga ma ana tangira ao ana karatia te Atua ibukin buokara. Ma a na bane n toki bai aikai ngkana a toki maiura iaon te aba ao ti a tei imatan te Atua ba a na motikaki taekara.Ti na bane n roko n te Abanuea ae Karawa ngkana ti kakaonimaki n ongotaeka nakon te Atua ao ni kakaraoa Nanona. Te bai riki ae kakawaki bon ataakina ba ti aki ata ara tai ni mate ke te tai are na roko iai Iesu ni kawarira. Ti na bane ni kakabaiaki ngkana ngkana E roko Iesu ao ao E norira ba ti teimatoa ni kakaraoa Nanon te Atua ao ni makuri n ana onaroka ibukin karokoan te Rongorongo ae Raoiroi irouia aomata nako.

Details

Written by Uriam Timiti

Created: 18 October 2021

Wiki 29          Moanibong

Warekan ana Reta Bauro nakon Timeteo.  4:10-17

E a tia ni kitanai Tema i bukin tangiran aonteaba aei, ao e nako Tetaronike; e nako Karatia Kiretike, ao e nako Tarematia Tito. Ai ti Ruka ae mena irou. Kaira Mareko ba raom n nakomai, ba e bati buokau irouna i bukin nakoau. I a tia n kanakoa Tukiko nako Ebeto. Ngkana ko nakomai, ao uota te rabuna are I katikua i Teroa irouni Karebo, uoti naba taiani boki, n aki manuokin ake kunniman. E bati ni kamarakai Arekantera ae te tia kaburo burati: E na kaboa muin ana makuri te Uea, Kawakiniko mairouna naba ngkoe: e bati ni kauntabai ara kaotioti.

N au moa n tai ni kaeka bukinau, ao bon akea ae buokai; a bane ni kitanai. Ke a tai bukinaki iai. Ma E buokai te Uea, ao E kakorakoraai, ba e aonga ni kaotiotaki te taeka irou, ao a na bane n ongo bekan. 

Te Taramo 144:10-13, 17-18 

Kaekana: A na kaota mimitongin Ueam.

A na neboiko am makuri, te Uea, a na karaoiroiko am aomata.

Ke a taekina mimitongin Ueam, ke a kaota korakoram. K.

Ke a kaongoia aomata ninikoriam, ma mimitongin Ueam.

Akea tokin am tautaeka, e teimatoa makam i nanon roro nako. K.

E eti te Uea n arona nako, E akoi n ana makuri nako.

E kaani ma akana weteia, Ngkana a wewete ma te koaua. K. 

Alleluia, alleluia.

I rinei ngkami mai aonteaba ba kam na nako ma ni kariki ua aika teimatoa. Alleluia. 

Euangkerio 

Warekan ana Euangkerio Ruka. 10: 1-9

E rineia riki ana aomata te Uea, ake itingauni ma uoman. Ao E kanakoia ni kakauoman, ba a na rimoana nakoni kawa ma tabo nako ike E kan nako iai. Ao E kangai nakoia: “E boni karuonako te tai, ma a karako tani makuri. Ma ngaia ae kam na butia Uean te tai ba E na kanakoia tani makuri nakon ana tai. Kam na nako, ba ae I kanakongkami n ai aroia tibu ataei nako buakoia kameanti. Tai ua bua ni mane, tai ua tianaki, tai ua kauniwae, ao tai kamaura temanna i nanon te kawai. Ngkana kam rin n te auti teuana, ao kam na kangai moa: ‘Te raoi nakon te auti aei.’ Ngkana iai natin te raoi i nanona, ao e na tiku i aona ami raoi; ma ngkana tao akea, ao e na okringkami. Kam na maeka n te auti arei, ao amarake ma ni moi ni baika a anganingkami, ba e riai n anganaki te tia makuri boon ana amkuri. Tai kitana te auti teuana nakon te auti teuana. N te kawa nako ike kam rini iai ngkana kam akoaki iai, ao kam na kang baika uotaki nakoimi. Kamaiuia aoraki, ao kangai nakoia aomata: ‘E a kaan ma ngkami uean te Atua!’

 

Tibatiba: E kakorakoraai, ba e aonga ni kaotiotaki te Taeka irou, ao a na bane n ongo bekan