Kanan Tamneira...
- Details
- Written by Uriam Timiti
Ai ti teuana tabun te bong ao e roko te Kiritimati. Ti kauringaki n te bong vaio ba irian ara katauraoi nakon Kiritmati bon te kona n nora ana tituaraoi te Atua inanon mauira riki inanon kaekakin ara bubuti aika a bati. Ti riai n ataia ae ngkana ti maiu inanon ana tangira te Uea ao ti na nora aron tararuara ma kakawakinara iroun te Atua. Ti na kakoaua naba ae bon te Atua ae bon anganganira baai ni kabane ao E bon kororaoi ana tangira nakoira n taai nako.
Ma bon iai naba weteara inanon butimaean te kimareirei ma karaoiroin Kiritimati ba ti na kona ni karababa ao ni n tibabaia nakoia tarira ma manera. Ao tera ngkanne arora ni kakororaoa aron te kimareirei inanon Kiritimati? Ti na uringa are oin te kimareirei aio bon katongan Iesu te Tei are E a bungiaki nako aonaba. Te moani bai ngaknne ae ti riai n tibaia bon maeun te Atua inanora are e na karokoa te raoi nakoia raora. Te kauoua ni bai bon tibakin are e reke iroura inanon Kiritimati. Ti na riai n tauraoi n tibai kanara ao nimara ma tarira ao manera. Ti na riai riki n noriia raora ake a taonaki n te rawawata ma te kainnano ao ni karokoa kakukurein Kiritmati nakoia n ara tangira ao ara tibaakin bai aika raka. Te kabanea ni bai ae kakawaki inanon Kiritimati bon te tauraoi ni kona ni kaboa muin ana kakawakin ma ana tituaraoi te Atua nakoira ni kona ni kaburei maiura ma arora ni kabane nakon te Atua. N aiaron Anna are e kaburea natina ae Tamuera nakon te Atua, ao n aron Nei Maria are e kataui bai ni kabane ba a na karaoaki n aron ana Taeka te Atua te Tama, ao ti bon riai naba ngaira ni kona karekei ara motinnano nakon te Atua ba ti na iriria ni katoa bong ao ba E na tautaeka iaon ara iango ma ara kantaninga ao ara makuri ni kabane. Ti bia katauraoira ni butimaea kakulurein Kiritmati ao man tibaia nakoia tarira ma manera ni kabane.
- Details
- Written by Uriam Timiti
Imuin ana kaeka Nei Maria ae "Eng" nakon ana rongorongo Te Atua te Tama, ao ruon te Tamnei ae Raoiroi ao e a kawaekoa Nei Maria ni kawara ai tinana are Eritabeta. Ao tera oin te rongorongo ae ti kona ni karekea mani karakinan Nei Maria aio?
Te moan bai ae kakawaki bon noran uan te Tamnei ae Raoiroi ngkana ti kaonrakeaki Irouna are te ingainga ni kan tiba ana tangira te Uea nakoia tarira ma manera. E tangiria te Uea ba ti na kawaekoa n tai nako ni kan uota taekan te Uea nakoia tarira ma manera. Ni karaoan aio ao ti riki iai ba kanga baon te Uea nakoia aomata. Bon aio te muioko ae moan te kakawaki inanon nakoara ni kabiraki are ti a tia n anganaki n te babetito.Bon akea riki te bai ae kakawaki ae ti kona ni uotia nakoia aomata irarikin te Uea. Ti bon riai ngkanne ni kekeiaki ni maiu inanon te raoiroi ba ti aonga n tau n tai nako n riki ba baon ke tan tia uota te Uea nakoia aomata. Bon aio naba kanoan rongorongon te Kiritimati nakoira ba te rairannano ao te maiu inanon te raoiroi.
Te kauoua n rongorongo ae kakawaki bon te kawaekoa ni uota te Uea nakoia aomata ao n aki motirawa. E na riai n akea inanon maiura te tai ae ti na motirawa ibukin tataekinan te Uea nakoia aomata. Ti riai ni katotonga Nei Maria are e inganga ao e kawaekoa ni kawara Nei Eritabeta ba e na uota Iesu are inanon birotona. Ngkana ti karokoa te Uea irouia aomata ao a na bon kaonrakeaki n te kukurei ae moan te bati ba uan te Tamnei ae Raoiroi.
Inanon tain te Kiri timati ao ti a manga kauringaki ba ti na inaomata ao n tauraoi ni koaua n riki ba baon te Uea nakoia aomata. Ao ibukin aio ao ti riai ni kainaomataira man iangoan kaubain te maiu aei. Ba te oi ni bai ae kakawaki bon mataiakinan te Atua ae te Tia karikibai nakon mataiakinan te kaubai ae ana karkibai te Atua. Ti na butia te Atua ba E na buokira inanon ara katauraoi ni butimaea bungiakin Iesu te Tei n aki katabeira ma bain te maiu aei ma ti na katauraoi nanora ni koaua inanon te rairannanno. Ti riai n riki n taai nako ba aomta aika a kabiraki ibukin karokoan te Uea nakoia aomata.
- Details
- Written by Taranieta
Tannakomai ao kam na kamaiuaki.
Aio kanoan te wareboki n taian tutia ni kabane n te aonnaba, ao bon Ana wewete nakoira te Atua n tatabemanira nako man Itaia 45:22. E tuangira te Atua ba tina tannakoina ao tina kamaiuaki. Ao E kangai naba nakoira, “Bon Ngai te Atua ao akea riki”
Ti na kananoa raoi b’anaan te Atua nakoira n te bong aio.
E tuangira ba tina rairaki ma te rairannano ni koaua.
Ngkana ti tanrikaki ao tina noria n arona ae te merimeri, te mangori ma bon Ngaia te mimitong man m'aka.
Te koronririki n tainako ae ti kakaraoia bon te botaki ae e bubura ao iai te keeke iai.
E kanga aron karaoan ana botaki ni koronririki Iesu iroura. Ti a tannrikaki n te tai aio ao ti a karaoa ara kabanea n tamaroa ni botaki (birthday party) nakon Iesu.
Ian mengara ke ara botaki, ao tia a bon angania moa natira ma tibura n te tai aio ba ana karaoi taian babaire ma katauraoi ibukira, ibukin te tairiki ni korokeeke ibukin te Tia Koronririki n tairikin Ritemba 25. E kanga aron katamaroan ana kaintekateka Iesu ma ana keeke ao taian kamataku............... a na bon rangi ni kamimi ni kaota mimitongin te Atua ibuakora.
- Details
- Written by Uriam Timiti
E a uakaan te Kiritimati ba ai ti aua riki te bong. Tera arora ngkai ni kakatauraoi imain te Kiritmati? Eng, ti bon riai n nora aron kakawakin te tai aio ao ni kakoaua ba ti na bon bane n tauraoi ni koaua ni butimaea bungiakin Iesu. Bon nanon te Atua ba E kan bungiaki Natina ae Iesu inanora n aiaron are E a tia n riki nakon Nei Maria.Ti bia katotonga Nei Maria n ana kaeka n onimaki ae "Eng" nakon te Atua are kangai,"Ana toro te Uea Ngai, E na karaoaki nakoiu n aron am Taeka. Te kaeka aio are e kaota iai butimaean arona Nei Maria i matan te Atua are e bon karikaki iroun te Atua. Te kauoua ni bai are ti kona n noria n ana kaeka Nei Maria bon te ongotaeka ae aanaki n te onimaki, te nanorinano ao te tangira. Bon aio ngkanne te bai ae moan te kakawaki iroura n te tai aio ibukin ara katauraoi ae ti kainnanoia ba ti aonga ni kona ni butimaea raoi Iesu te Tei. Ngkana ti kauki nanora ni kataua ba E na karaoaki Nanon te Atua te Tama inanora inanon te onikai ma te ongotaeka ao ngkanne ti kaonrakeaki ni makan te Tamnei ae Raoiroi ao e na riki n iriko Iesu inanora. Ti noria ngkanne ba man ara kaeka ae ENG ao ti na kona ni moan namakina iai kaubain ana tangira te Atua ae te Teniman n Temanna are te Tama, Te Nati ao te Tamnei e Raoiroi. Bon iao naba arora ni kaeka ana Rongorngo te burabeti ae Itaia are kangai, "Ukera te Atua ngkai e angaraoi ba e kaan.
Tariu ma maneu e ngae ngke te rongorongo ni Kiritimati e bon kaeineti nakoira n tatabemanira, ti bia namakina naba te wewete ba ti na buokiia tarira ma manera ba a na ongo naba te wewete aio ba ti aonga n reitaki ma ngaiia n atonga ana kaeka Nei Maria nakon te Anera ae Kabiriera are e kangai, "Ana toro te Uea ngai, E n karaoaki nakoiu n aron m Taeka."
- Details
- Written by Taranieta
Mauri tariu ao maneu n Ana Tangira te Uea.
A tauraoi Ana Anera te Atua n tainako ni karokoi iroura ana buoka ma ana karatia te Atua ake ti kainnanoi ao ti na rikirake ma n teimatoa inanon te maiu ae e Tabu, irarikin ae a raonira ao n ongo ara taeka ma n nori baika ti karaoi!!. Aio are e teimatoa iai Santa Lucy te kibono, are ana toa te bong aio, are e kaburea maiuna ni kibono ae e itiaki man tabu nakon Iesu man tokanikai n ana iango anne ibukin Iesu ni mate n aki kabuakakaki rabatana ma tamneina.
Te Taramo 34:7 are kanoan te wareboki n te bong aio, e tuangira ba a katei kaemba ke a tantanii Ana Anera te Atua n bong ao ni ngaina, ni katobibia te aomata are e maka man karinea te Atua, ao E buokia n tainako.
Ah.... ai kabaiara ngaira n te natinaki ni koaua iroun te Atua ba iai raora n tainako ma ngke ti uarereke ni karokoa ngkai, ba ara Anera te Tia kawakinira, ae e raonira n arora nako ao ngkana ti neboneneboa te Atua ao n taromauria. Ti na bon kakoaua ba ara anera aika tani kawakinira bon raoraora ni koaua ke ara true friends.
Ti na reitira n te wiki aio ni butia ara Anera aika taani kawakinira ma Ana Anera ni kabane te Atua, ake a bon kakaoro tabeia ibukin karaoan nanon ana buoka te Atua ibukira ni bane, ba a na buokira ni katauraoi nanora, ni katamaroai ara auti ma ara kawa ao ara umantabu nako, ba tina tob’a raoi ara Uea ae Iesu n rokona n te Kiritimati aio. Tia butia ba ti na reitaki ma ngaia ni koaua n te kimareirei, te ota, te tangira ao te mimitong inanon ara kariaria ao n rokona ibuakora.
Iai riki ae ti na butia ara Anera ni kabane. Ti a butia ba a na kaboui nanora ao marenara ma ngaia, ti a butia ba ana karikirakeira n te maiu ae e tabu, ba ti na babakoa Iesu ma te nano ae kororaoi n te Kiritimati aio, ao ti na teimatoa, ma ngaiia, ni babakoa Iesu inanon maiura ba ti aonga n reitaki ma ara Anera te Tia kawakinira, n neboneboa te Atua n tokin ara borau i karawa.
A tantani Anera irarikin Santa Lucy ao e tokanikai. E tantani irarikira n tainako ara Anera te Tia Kawakinira ao e buokira ngkana ti weteia. Anera ni kabane aika ti kannanoi aia ibuobuoki, a tantani irarikira n tainako naba.
E raba te Atua, Tamara ae rangi n tatangira. Ko raba te Atua, Alleluia Alleluia Alleluia