Kanan Tamneira...
- Details
- Written by Taranieta
N te bong aio ao tina miiakinia taari aika Betero ao Anterea, ake a tabe ni karaun ao Iakobo ao Ioane, ngke a tabe ni bonokaraun ma tamaia, ao e a roko Iesu ni weteia ba ana iria ba e na karikiia ba taan karaunia aomata.
Tera te bai are e karika teirakeia taari aikai n te kainababu ao te ongotaeka?
Ngaira tiaki nora kanoan matan Iesu are E taraia taari aikai ngke E weteia n araia, ti bon aki onga naba banana ngke E weteia, tiaki naba nora buraburana ma teiteina ngke E tei irarikia, ao tiaki namakina te tangira are e niniia ngke E tei irarikia, ara Uea ao Atuara ae Iesu.
Ti bon ti kona n karioi ara iango ni miiakinna ba tera aia namakin ke aron nanoia n te tai arei ao n iangoi baike a riki nakoia taari aikai ma ti ataia ba a bon niniaki ni boiararan mimitongin Iesu ao e on nanoia n tangiran Iesu.
Ngaira ti aki kona n atai aikai, ma ti ti kona n atai ngkana ti kaongoaki ke e tataekinaki nakoira rongorongon Iesu, ke e kataua Iesu ba E na anganira namakinana ma norakin mimitongina, ngkana E kataui karatia aika a raka nakoira ibukin ana makuri ake E kataua ba ti na karaoi ibukina. Bai aikai a bon kamatoai ara onimaki ao ara koaua ae e manga uti ara Uea ae Iesu man te mate ao E maiu irarikira n tainako, ma namakinan te Tangira bon ngaia kamatoan raoi ara onimaki. Ti ataia ba te Atua bon te Tangira. Ngkana ti namakina te tangira inanora (ae tiaki tangiran bain aonteaba ke te kaibabaru) ao ti ataia ba e bon niniira boiararan mimitongin Iesu ao e on nanora n tangiran Iesu ba e maeka inanora.
Ti a riki ba Ana taan akawa Iesu ni koaua ngkana ti niniaki ao n kianako mai iroura boiararan mimitongina ae Ana Tangira aio inanora. N ara tai ni tataekina rongorongona nakoia aomata nako ao ana nori iroura baike a nori taari aikai iroun Iesu. A na bon namakina naba te namakin, aomata, mai iroura, n aron are a namakinna tari aikai ao ana rikirake naba inanon te Tangira anne ao tina uaia ni bane n rikirake n te onimaki iroun Iesu, ao ti na kona ni kangai, ‘I katikui bai ni kabane Iesu, kabonganai n arom are nanom’.
Ti a butia Iesu boiararan mimitongina ba e na kaonrakeira iai n tainako ba ti aonga n reitaki ni koaua ma Ngaia ao ni karaoi raoi ara makuri ibukina n katoa bongin maiura.
- Details
- Written by Taranieta
- Details
- Written by Uriam Timiti
N te tai ae a tia n nako ao ti ongora ae taeka te Uea nakoira ni kauringira ba e kaan roko Abanuean te Atua. Ao ngkai ti ataia ba e a kan te tai ma ti aki ataia ba n te aoa ra ke n te bong ra ao e bon riai ba ti bane n tatauraoi.
Irarikin bai ake ti taekin ibukin ara katauraoi n te rairannano ao e reke nanou ba N na manga reitia n te tai aio ma kawakinan marurungin rabatara. I taku ngai ba ngkana a marurung rabatara ao ti na namakina n taai nako te kona n tantani ni kakariaria te tai are na roko iai Abanuean te Atua. Iroura ngaira kiritian ao ti bon riai ni kawakina n taai nako marurungin rabatara. A bati bukinara iroun te Uea inanon ara utu, irouia ara tibu ake ti kawakinia, ao ibukin makurian ana tangira ma ana nanoanga nakoia tarira ma manera ao ti bon riai n taratara n tantani ba ti aonga n tauraoi ni kaeka kainnanoakira iroun te Uea. Ao riki ngkana ti teimatoa n tantani ao ti na rangi ni kukurei ngkana E roko te Uea ao E kuneira ba ti tabe ni makuri n ana onikurebe.
Irian te marurung n te rabata bon te tokanikai iaon te mamara ao te tanigaroti. Ba ngkana ti taningaroti ao bon iai te mamara teuana ae na taotaonira nako, ao aio bon te bure ae te aki muti ke aki karaoan te raoiroi ae ti na riai ni karaoia. Bon aio teuana ma ibuakon mamarara ae ti mamaninga ao n aki rangi n tatabe iai ba ti taku ba akea te kanganga iai. Ma ti kauringaki iroun tinara te Ekaretia n ara tataro ni kabo muin bure ba ti kainnanoa ana nanoanga te Uea iaon te aeka ni mamara ae kaineti ma te aki muti ao aki karaoan te makuri ae raoiroi ae ti na riai ni karaoia.
Ti na bubuti nakon te Atua ae Tamara ba E na kawakina marurung rabatara ao E na anganira te korakora n aki reketaati n taian kakibotu aika a karekea te mamara nakon marurungin rabatara ba ti aonga n tai nako ni kona n tantani ao ni karaoi tibangara mai Irouna, ao riki ni butimaea Abanuean te Atua ngkana e a roko.
- Details
- Written by Uriam Timiti
Tariu ao maneu akea ba ti a roko ngkai ni moan ana ririki te Ekaretia are te Avenete. Aio bon ara tai ni katauraoa main rokon Iesu n te aro ba ti na bane ni kona ni butimaia ma te tauraoi ni koaua. E tuangira St Ioane te Babetito ba ti na bane katauraoa kawain te Uea; ti na kaboraoi taian tabukibuki ao ti kanoai taian manono. Aio bon taekan ara katauraoi inanora ba ti na riai n rairi nanora ba E aonga ni kona ni mwegaraoi Iesu ngkana E kawarira ni maeka inanora.
Inanon te tai aio ao e kateaki nakoira tamnei aika uoua n aron rokon Iesu ibuakora. Ao aikai ake a kaineti ma taai aika uoua ba moan te avenete are E na roko iai Iesu ba te tei ae uarereke ae moan te mangori are E kainnanoa ara tangira ma ara akoi. N aron rokon Iesu aio ao ti kauringaki iroun tinara te Ekaretias ba ti na riai katuaraoira ba ti na kona n toba Iesu te Tei ao E na mwengaraoi iroura. N ara katauraoi aio ao bon Nei Maria ae Tinan Iesu ae na rineira ba ti na babakoa Natina, ngkana e kakoaiua moa ba e na aki kabuanibai Natina ngkana ti tobaia. Ti riai ngkanne ni bubutia te Atua ana karatia ba ti na bon katauraoira ni koaua ba ti aonga ni kona ni butiamaea Iesu te Tei ngkana E a bungiaki ibuakora.
Te kauoua n tamnei n aron rokon Iesu are kateaki naba nakoira n te tai aio bon taekan kauaokina inanon te maka, te korakora ao te mimitong. E na aki roko n aiaron temanna ae kainnanoa ara nanoanga ma ara akoi, ma E na roko ba te tia motikitaeka. N te tai anne ao ti na tauraoi ni butimaai motikan taekara n aron muin ara kekeiaki i aonteaba.
Tariu ao maneu ti na bane ni kauka ana ririki te Ekaretia ma nanora aika tauraoi ni butimaea ao ni kina Iesu are E roko ba E na kaota nakoira aron ana tangira ma ana nanoanga te Atua ibukira. Ti na riki ba aekaia taan kawakin tibu ake boni ngaia te moani koraki ni kaota kinaakin Iesu ae bon Natin te Atua ae moan te maka man rietata. Ba ngkana ti maiu inanon kinakin Iesu ae Emmanuera, ke te Atua i buakora ao ti butimaea ana tangira ma ana nanoanga ao ngkanne ti na bon anganaki te ingainga n nano ni kaitibo ma Iesu ni manga Okina ba E na motikitaeka. Ngkana ti maiu ma Iesu, i nanona, ma Ngaia ao i bukina ao ngkanne ti na bane n tauraoi uaan ara kekeiaki are te katonga kororaoin te kukurei ma Iesu irarikin Tamana i Karawa.
- Details
- Written by Uriam Timiti
Inanon maiura aio ao ti kona n nori kanikina aika a kaota te bai ae nang roko ke e nang riki. Ngkana e roo karawa ao ti ataia ba e nang baka te karau ke e nang roko te buaka. Ti bon kaota te aro ni wanawana iroura ngkana, inanon kanikina aikai, ao ti karaoi makuri aika ti na tauraoi iai imain te bai ae nang riki. N aiaron aio ao E anganira naba te Uea taian kanikina aika ti nori ba ti aonga n ataia ba e a kaan roko Abanueana. Ti a roko n tokin ana ririki te Ekaretia ao ti kauringaki iai ba iai tokin baai ni kabane n te maiu aio.
Ao tera te bai ae na riki ngkana e a roko Abanuean te Atua? N aron iangoana irou ao aio bon te tai are E nang kaoti iai Iesu inanon te maaka ma te korakora ba E na motika taekan aonaba. N te tai aio ao e nang toki ara tai ni kona ni butia te Atua ana kamaiu ma ana nanoanga ma aio bon te tai are a nang motikaki iai taekara n aron are ti a tia iai ni maiu i aonteaba. Aio bon te tai are ti nori iai muin ara kekeiaki ni maiura i aonteaba.
E taekinaki naba ba e a kaan roko abanuean te Atua. Ti aki tuangaki ba ningai raoi te tai aio ma te bai ae ti ataia ba e a kaan. Ao ngkana e a kaan ao e kona n riki n tairiki, ke n ningabong ke nakon te wiki ae na roko. Ngkai ti aki raoi te aoa ma te bong ao tiaki e bon riai iroura ba ti na tatauraoio n taai nako? Ngkai ti a ataia ba e a kaan Abanuean te Atua ao ti riai ni bubuti te wanawana ba ti na kona n te TE TAI AIO ni karaoa ara katauraoi ae kakawaki ba ti aonga n tauraoi ni koaua. Ngkana ti tauraoi ni koaua ao ti na kaonrakeaki n te ingainga ma te kukurei ba ti nang nora te maiu ae kororaoi n aron are E tia ni baireia te Atua i bukira. N te aro aio ao ti na kakoroa raoi iai kanaoan ana babaire ni kamaiu te Atua ibukira ngke E kanakoa ana Rikitemanna ae Iesu ba E na mate ma ni kaboira n Rarana ba ti aonga kona n uti ma Ngaia nakon te mimitong i Karawa. Ngkana ti aki tauraoi ba ti maiu inanon te bure, ao ti na maka te mate ma te motikitaeka ao n taku ba te mate bon tokin baai ni kabane.
Tariu ao maneu aio te tai ae angaraoi ibukira ba ti na rairi nanora ba ti aonga n tauraoi inanon te onimaki ao te ingainga ni butimaea Abanuean te Atua ae E a kaan roko ibuakora.