Kanan Tamneira...
- Details
- Written by Taranieta
Ti ririmuin Iesu ibukina ba ti a tia n nori ana kakai ao n kakoaua raoi ba natin te Atua ke ti ririmuina ibukin ara iango ibukin kan katibutauakira n amaraken te maiu aio?
E taku Iesu n te wareboki ngkoananoa, “Tai makuri ibukin te amarake ae kai mauna, ma kam na makuri ibukin te amarake ae e teimatoa nakon te maiu ae e aki toki. E anganingkami te amarake anne Natin te Aomata, ba boni ngaia Teuare e kanikinaeaki”.
Te Taramo naba ngkoananoa, e kauringira ba tina aki karaba te rongorongo nakoia ara kariki, are e kaotaki nakoia ara bakatibu, ba te Atua ae Tamara, e kamarakeia aomata, ni kanaia anera, e kamarakeia n tokin nanoia.
E anganira te Atua ae Tamara, natina ae rabatan Ana Tangira ae Iesu, n te Eukari ae moan te tabu, Ngaia ae kanaia anera, ba te amarake ae e teimatoa nakon te maiu ae e aki toki.
Ma e anganira naba Iesu, ara tataro nakon Tamara are I karawa ba bon ngaia aron kairan ara makuri ma maiura nakon te amarake are e anganira te Atua ae Tamara ni katoa bong, ba ena kateimatoaira nakon te maiu ae aki toki.
Tina kamataata te tataro ae moan baan te mimitong aio nakoia ara kariki.
N aron ae e kabarabara St Louis de Montfort, "Inanon te tataro ae ‘Tamara are i karawa”, ao a makoro inanona, ara makuri ni kabane, aika kabaeakira nakon te Atua ae Tamara, (ae tangirakina, neboakina ma karineana n tainako). A makoro naba inanona kairakin maiura aika a na karekea iroura, te amarake ae e teimatoa nakon maiu ae aki toki , ao a makoro naba inanona, ara bubuti ni kabane ibukin kainnanora n tamnei ao n rabata".
Tariu ao maneu, ti a reitaki ma St Louis de Montfort nakon Iesu, n tataro,….”Tamara are i karawa…...
- Details
- Written by Beneteta
N ara utu aika a kakaokoro ao bon iai kanganga aika ti kaitara ma ngaia. Ti ataia ae angin te tai e na bon aki waekoa n reke kaekaan kanganga aikai ai ngaia are e na bon bae n iai te keiaki ao te anganano ibukin karekean te kabanea n raoiroi. E na riai ni buokaki te kanganga, e na riai n reke te reke ni waekoa, e na riai n iai te bai ae a aranna Imatang n aia taetae ba te 'compromise'. Au reke ngai ba ngakana ti na tangira te bitaki ti riai n titiraki ni kangai - ba te bitaki aio e na neboaki iai te Uea ke e aki?
Te reirei ae I a tia n kunea ni maeu aio ba moan te kanganga kakukureiaia aomata. Bon moan tekanganga ae a na bane aomata n kariaia te bai ae ko karaoia e na bon bae n iai ae e na waeia. A maiti aomata aika a na reitiko n am iango ma am waaki ngke a mena irarikim ma ngke ko a bua ao a bon tiba kona n taekini aki raun nanoia ma buakakan nanoia iroum. I kataia n aki katabea nanou ma ngureia ao aia taeka n aki iraorao ba I taku ba e bane buaka au tai iai. Ma I kataia ni keiaki n ongora nakon ana reirei te Uea n au kainababu man reireinai te kona n ongo raoi ana taeka ae e tangiria ba N na karaoia. N te aro aio ao I aki kabanea au tai n nanokawakia taekinakiu irouia raou ma I tabeakina raoun nanou ma au kantaninga iroum te Uea.
N te reirei n te bong aio ao e taekinaki te aneke ni matan raou are I aki bae n tabeakina kanakoana imwain ae I kanakoa te oka are n bon matau. Bon reireiara ba ti na aki bairea temanna man motika taekana. Ti riai ni bon tabe moa ma te aneke i matara man keiaki ni kakia moa ma ai bon kangangara ke!!!! Ti riai ni bon kan biti moa arora n te aro aio ba bon aio arona ae e tangiria Atuara.
Ti na tai bairei taekaia tabeman ma ti riai n reireinira n tangiria moa ba ngaia ae e na karekea te bitaki nakoira ngkana ti karaoa aei. N tokin te kekeiaki aio ao te bitaki ae e na reke bon te bitaki inanon Iesu, boni ngaia ae ti na kunea iai te rau, te kukurei ao te raoi ma te tangira. Iesu bon ngaia te kawai nakon te bitaki nakon te raoiroi kioina ba bon ngaia te RAOIROI.
Ko raba Iesu n te bitaki ae ko a tia n anganira man reireiakira n aki tabe ma te aneke ni matan raou...kairira Tinara Nei Maria nakon natim ae ngaia te raoiroi ni koaua.
- Details
- Written by Uriam Timiti
E atai arora ni kabane te Atua
Ti na karaba te Atua ngkai boni Ngaia ae karikira ao E atai arora ni kabane. E karikira inanon te kamimi ma te kororaoi ao boni ngaira katotongana n Tamneina are ti a tia ni bane n anganaki n te Babetito. Are nanona ba bon akea te bai ae kona n raba mai matana.
Ti na riai ni maaka n tai nako te Atua ao n ataia ba E norira n taai nako ao n tabo nako. Bon ti teuana Nanona ibukira ba E tangiria ba ti na maiu ma Ngaia ao i Bukina ao ni karekea te kabaia n aki totoki i rarikina i Karawa. E bon rawa ao e uruaki Nanon te Atua ngkana ti tannnako mairouna ao ti maeka n te bure. Ba E ataia ba te bure boni ngaia ae na anganira te mate n aki totoki.
Tariu ao maneu ti na bubutia te Atua ba E na kakawakinira inanon ara kekeiaki ao ni matennanoa n taai nako kamaeuan tamneira ao tamneia natira, kain ara utu ao ai aomata ake ti muiokoaki ibukia. Ngaira aika ti katei utu ti bia keiaki ni kakoroa raoi muiokoara ibukia natira ni kakamarakeia n te amarake ae mairoun te Atua. Ti na bon kaitara bukinara iroun te Atua ngkana ti aki karaoi tabera ibukia natira. Ti bia aki kataua ba a na ukeuke nako natira ni kakaea kanan tamneia ngkai ti aki kona ni katoka kainnanoia man te mwenga.
- Details
- Written by Uriam Timiti
Tariu ao maneu ti na titirakinira n te bong aio ba te raoi te bai ae moan te kakawaki inanon maiura. Tera te bai ae ti kataia n uaiakinna ba e na reke iroura ba ti aonga ni karekea te kukurei ae kororaoi? I taku ba e rangi ni kakawaki aron kaekan te titiraki aio iroura ba ngaia ae na baireia ba ti na maiu ke ti na mate.
Tera raoi te kaubai ae ti riai ni kaikoa ni maiura aio? Eng I taku ba e na riai n titebo ara kaeka iai ba bon karekean te kabaia ni maeka ma te Atua i Karawa n aki totoki. Ti na kaikoi kaubai aika bain Karawa ni karaoan nanon te Atua inanon te raoiroi ao te Tangira nakoia tarira ma manera. Ti na aki kataua tangiran kaubain aonteaba ae bon bai aika a kai mauna mani mmka ba a na kabua mairoura te Maiu ae aki totoki. Ti riai n aki kataua ba mataiakinan kaubain te maiu aei a na katinebuira n aki kona ni mwemwerake nako Karawa are ngaia nnera ae E a kamn baireia te Atua ibukira.
Tariu ao maneu teuana te bai ae na kairira nakon te kabuanibai bon aron kabonganan matara are ngaia kanga ara winto ni kataratara te aonaba. Bon matara aika a na kairira nakon te bure ni kaibabaru ao ni kamatai. Ti riai ngkanne n teimatoa n riki ba botaomatan ana Berita n Akoi te Atua aika ti kakantaninga te tai are ti na katonga iai kororaoin te kukurei ma te Tama. N aiaron are taekinna Tawita n ana taramo are kangai, "E kawakina ana berita ma ana botaoamata te Atua ao E na katokai ara baunuea ngkana ti kawakin ana tua", ao ngaira ni kabane ti na bane n roko n te kinmareirei ae akea tokina ngkana ti kaikoi kaubain Karawa n te maiu aio. Ti na bubutia te Atua te wanawana ba ti na ata ae te oi ni kaubai ni koaua ao ti na teimatoa ni kabanei nanora n iangoa rekena. Ti bia kaeka te berebitero inanon te Tutia koraki ngkana e kangai, "kawaerakei Nanomi" ma te nano ae koaua ni kangai; "Ti kawaerakei nakon te Uea".
- Details
- Written by Uriam Timiti
Ngkana ti kan kaitibo ni koaua ma te Atua ao ti riai n ukeria inanora. Ti kauringaki n te bong aio ba ngkana ti karaoi makuri aika raraoi ao ti na riai ni kairi ara makuri akanne ma nanora. Are nanona ba e na riai n ti teuana ara makuri ma ara iango ao nanora. Ngkana ti karaoi makuri ibukin te kan taraaki ao tiaki i bukina ba ti kan kakukureia te Atua ao a na bon matebuaka ara makuri.
Kinakin ni koaua te Atua ni maiura e na bon reke ngkana ti ukeria inanora ibukina ba bon te Tamnei te Atua. Ai uana naba ma arora ae boni ngaira ba tiaki raoi ngaira ae ti noria n rabatara ma bon ngaira raoi are n te nano are akea ae kona riki n noria ba bon ti te Atua. Ngkana arona ba ti rikirake ni katotonga te Atua ao ti riai ni kataua tamneira ba e na tautaekani rabatara ao tiaki te rabata ae na tautaeka. Ba ana kairi te rabata bon bure, te kairiribai, te mataai ao a bati riki. Ana kairi te rabata ae te kaikoi kaubain te aonaba e na bon tukira man te kona ni kunea te Atua inanora.
Tariu ao maneu ti na butia te Atua ana karatia ba ti na kona n rabakau n ukera te Atua inanora ao n ingainga ni kan kaitbo ma Ngaia i nanora inanon te kukurei ae kororaoi. Ti na kabatia riki te maiu ni benetenia ao n aki mamatam ba ti aonga ni kainaomataaki man ana tautaeka te rabata ma aonteba ao ni kona riki ni kina te Atua ae maiu inanora n tatabemanira are na kairira inanon te bong koraki. Ao ngkana ti kairiaki iroun te Tamnei ao ti na karekea te kanuanga ae moan te kakawaki ae te maiu ni kabaia ma te Atua n aki toki i Karawa.