Kanan Tamneira...

Aikai ana taeka Iesu inanon te boki ae 'Rinanon ana taratara Iesu' nakoia ana Abotoro ao ai bon nakoira ni kabane ba tibangara n te bong aio ao buokara ni maiura.

"Te mataki n tamnei bon te mataki ae e kakaiaki riki nakon matakin te mata, ba te aomata ae mataki matana, e ataia ae e aki noraba, ma aomata ake a mataki tamneia, n angin te tai, bon aomata aika a aoraki tamneia, ao a bon aki ata matakin tamneia. Te buakaka are inanoia, e otabaninia  ao e itikaokao nako ao n buritia aomata nako nanon ngaongaon te buakaka are a maeka inanona". 

"N tabetai ao ngkana a aki kukurei  aomata n norakin te buakaka aikanne, ao a manga kairiribai ao a bon manga bure iai. A kona n iangoi katokan buakaka aikanne n kaitaraa ma te iowawa, ke n waki ni kairiribai nakoia nake a buakaka, ke a kona ni kabutanakoa kabuakakia ma kaungan ribakia irouia aomata. Aomata aikai, a manga bon mataki naba tamneia nakon te buakaka are e a rin inanoia, ibukina ba a taku ba a karaoi aia makuri ni bukiia aika a raoiroi. Ngkana e touaki te kawai aio ao n aki noraki raoi burena ao ba e uotiko nakea, ao anne ngkanne aron ana kam'ane te buakaka n onikia aomata aika a raraoi ba ana riki ba aomata aika a buakaka, n akea atakina ma namakinana irouia."

"Bon tai nanououa naba n aron wanawanan teuare e buakaka n arona ni m'am'anai. Ao n tainako, eng n tainako, ni bai ni kabane aika kam karaoi, kam taekin ke n iangoi, uringnga, uouota te Tangira ao te Raoi nako mooa."

N te rongorongo ao e bon tabeka baina te kaubai ba e na orea te teinnaine are e riki ba ana toro ba kab'aran ana tarau taman te teinaine aio irouna ae tebuina te m'akoro n tirewa. E bon roko te teinnaine aio nakon Iesu ni butia buokana ba e a rangi n korakai tamneina n aron kabonganakina ba te toro ao ni m'akuri aika aki raoiroi ibukia naati aine, ngke e a roko naba te kaub'ai. E bon kabara te tarau Iesu man ana bua ni m'ane Iuta ao e okiria ana utu neierei. Ma a baka rannimatan Iesu ibukin te kaubai arei are e ti kona n nora te kananokawaki ao te rotongitong inanon tamneina, e nora arona ngke e tiringa te aomata n unna ni koko ao E nora naba boon muin ana bure ngkana e a tei imatan te Atua ni kaekai bukinana n ana kairua ake e a bua inanona ao e a mataki nako iai. Ana Abotoro Iesu a bon koro n riba te kaubai ao a tauraoi ni manga oreia. A kuri n ewekaki n te aoraki ae e rangi n ewewe mani kamamate nakoira ni bane, te mataki n Tamnei.

Imuina ao e taku Batoromaio, "Te Uea, e koaua. I koro n riba te kaub'ai arei ao I bon iangoa naba kaikoana. Ma ngkai I a noria ba I bon riai n tataro ibukina n te tai arei ba e kainnanoa kamaiuakina n te aro ae kakaiaki, man aorakina arei."

"Tai mama, kukurei  ba koa nora aron te buakaka ni kataia ni kam'aneko, Kukurei ba n am tangira ao ngkai ko a kan tataro ibukin te aomata ae e kananoanga arei, ba bon te mataki ni kakaiaki." I kaeka ngke tia kania te temboro.

"Ana Tia kawakin tibu Tamau ngai"

Aio ana taeka Tawita"nakon Tauro ngke e nang nako ni kaitara Koriata.

Ti bane ni weteaki ba taan kawakintibu ngaira inanon maiura. Tiaki ti n mengara, ao ara kawa ma n tabo ake ti nako iai ba E muikoira Iesu ba ti na kairia aomata nakon Atinibana ae Moan te Tabu.

Ti na riai ni butimaea mamarara ma aki konabaira moa i main ae ti na kona ni karaoa raoi nanon Iesu ba tiaki ngaira aika ti na makuri ma bon Iesu i nanora.

Ngkana ti makuri ni korakorara ma wanawanara ao bon akea te bai ae ti na kona n tokanikai iai ao e na aki teimatoa arora ma ti na bon uota kamamaeara ma bakara ao ara bana, a na bon aki katotonga ana bana Tawaita ao a na bane ara atibu ao e na bon aki teke ara m'ake ao a na bára nanora.

E onimakina otan te Atua, mákana ao korakorana ba e na bon kakorakoraa, ngaia ae Tawaita ae uarereke man ngore i matan Koriata.

Ti na kauaea nanon ana taeka Tawita n te bong aio ma aron weteara iroun Iesu ba ti na riki ba ana taan kawakintibu Tamara ni koaua.

Ti na titirakinira man rinanoa arora ni kawakinia ana tibu Tamara ba ti kawakinia raoi ke ti bakataeia. Ti kaitaraia raian ma beea n aki maaku ke ti kakarenakoia ba a na kanaki ba ti aonga n aki kanaki ngaira.

Ti kairia nakon tawana aika a mawawa ke aika a bokaboka.

Ngkana a bara nanora ke ti a mamara, ti onimakina korakoran ma mákan te Atua ke ti onimakina oin korakorara.

E taku ana taeka Santa Teretia mai Avila, "Te riaboro e na kataia ni kabáraa nanom ba e na kamamaeko ba ko aki tau n reke iroum taian kakabaia aika a tia n reke iroum. Ane e na kauringko kabákam aika ko a tia ni karaoi n tai aika a nako. Ngkana e kauringko arom n tai akekei ao kauringnga ngaia ba tera arona nakon tai aika a na roko".

Ti a butia Iesu n te tai aio ba e na anganira te korakora n tainako n aron nanon Tawita, n ara tai n namakina koerikakin angira ma nanora ao ti na aki toki n anene n neboa Iesu, n aron te Taramo n te bong aio are e kangai ba "te Uea otau ao kamaiuau ao antai ae N na makua, Ngaia au nono ao antai ae N na makua?"

Iai arora ae ti kariaia te kamoamoa ba e na karabai ara bure ma ara kairua.

Ngkana iai kairuara ao ti kona ni waekoa  ni kakaea ae ti na bukinna. Ke tao ti aonikaia te taetae ni kaetieti ni karekea unra n te aro ba e a tannako te aba man ara kairua. Ke ti a bon manga karaoa ara kewe n kataia n rabuna ara kewe ma ara kairua. E kona ni kanganga aron b'ainakin te koaua ao kaotana ibukin te kamoamoa

.

Iai naba aron nanora n uneakina te kaubai ao te kan atongaki man neboaki ao ti karaoi arora ni maiu n te kewe ma te aonikai. Ti maninga iai are tiaki ara bai te neboaki ao te kamoamoaki ba ana bai te Atua, n ara makuri are E anganira ba ti na karaoi ibukina ke man ana kaub'ai ake e anganira ba ti na karaoi tib'atib'akia ma kabonganakia ibukin neboana ma tiaki ibukira.

Aio karakinan Iuta man "Rinanon ana taratara Iesu": Bon rongorongon Iesu ngke E matu ma ana Abotoro n te ruu teuana ao e taku Iuta ba e na matu irarikin Iesu ma aan ana iango are e taku ba e na anganaki Iesu karineana ao te nne ae e kamengaraoi ao e na reke naba irouna ngkana e wene irarikin Iesu. Ma  ngke a nang matu ao Iesu e kan wene irarikin te mataroa ao akea ana anga Iuta ao e wene irarikin Iesu irarikin te mataroa are e kamariri. "I uti ngke e a nukanibong ao I nora Iuta ba e kataia ni kanakoa Iakobo man nnena ni matu. E uti Iakobo n bubui matana ao n b'angurengure n aki kan kam'aingaki. 'Iuta, e aera I taku ba ko tuangai ba ko na matu irarikiu?' E tarai Iuta ni b'ainrang ba e noraki arona n aonikai. 'Eng au Toka, I bon ti kan anaa te rabuna ae kona aabue riki iai. I iangoa ae n kaibibita rabunara ma Iakobo ba ko aonga n aki mariri', e kaeka Iuta. 'Rabunakin mamaaram, e aki karabai,  ao rabunakiia n te kewe,  e a karika buburaia riki. Katuka Iakobo ao okira nnem. Tataro nakon Tamau ba e na buokiko n tokanikai iaon mamaaram ba n tokina ao n tebongina ao ana karika kabuanib'ain tamneim". I kaeka ma te nanokawaki ae e korakora ba I nora te bai are e na karaoia nakon tai aika a na roko. E wene irarikiu Iuta ao Ngai,  I aki matu ni kangainaa. I bon nora aron mamaaraia  aomata aika a rangi ni m'aiti ake ana bon aki kan butim'aei aia kairua ao ibukin kamoamoaia, ana rabuni aia kairua n te bure, ao te bure riki ao manga te bure riki. Aio ana kawai te bure ao te buakaka. E kam'aneia  aika a maiti, n aron Iuta, nakon nanon te buuannang are e temekiia rikaaki, nako naano ao naano, nako nanon te rootongitong. Ai kawara Iuta, a m'aiti mamaarana ao e a bon mataki ao e aki kona n nori kairuana ma mamaarana."

E taku  Taeka n Rabakau m'akoro 3, ibukin kawain te Wanawana: 'Tai kaki te kakaonimaki ma te koaua, ke a riki ba m'aen roroam ao ke a m'akoro i kabin nanom, ao kona akoaki mani katekeraoaki iroun te Atua ao irouia aomata'.

N aron ana taeka Iesu nakoira n te bong aio n ana rongorongo aio ti a tataro nakon te Atua ae Tamara, buokara  ao ti na tokanikai n aki temekaki nako moone n ara kewe ao ara kamoamoa.

A tekateka uoman m'auku ni bubuti kanaia ma aia tianti mairouia aomata.

E baebaeti are temanna, "I onrake n te kimareirei ti n ataakina ba I maiu."  E rirarikia Iesu  ao E nanoangaia ao E tuanga Iuta ba e na kabanea kanoan aia baeki ni m'ane nakoia. E kuba man titiraki Iuta ao e kangai, "Ni kabane?" E taku Iesu, "Eng ni kabane." 

E onrake n te kimareirei te mauku are temanna ao e karab'a Iesu n Ana baintangira ae e bon rangi ni maiti are e a bon aki kona moana ao e kaotia are e na tib'aia ma raona ni m'auku akeke tabeman.

E taraa nanona Iesu ao E nora te Tangira inanona ae e kororaoi ae Ana Tangira te Atua ao E taku, " E onrake nanom  n te Tangira ao te nanoanga, te Tangira ae e roko mairoun te Atua." E kaeka te m'auku, "Te Atua? Eng, e korakora au tangira nakoina ao I kakatituaraoia  ibukin maiu, ba e ngae ngkai I m'auku ao I raarikin, ma te Atua, E kakaona nanou n te kimareirei. I  onrake n tainako n te kimareirei ti ibukina ba I maiu." 

"Raraou, am Tangira  ao am onimaki a bon kamaiuko." E teirake te mauku ao e a tatakarua ni kukurei ba e a kamaiuaki. 

E taetae ngkanne raona ni mauku arei, "Ao ngai?"

E kaeka Iesu, "Raraou, n am iango, te Atua E na m'aninga taekam?"

Ao e teirake naba te m'auku arei ni kibakibarake ao ni kimareirei ba e a kamaiuaki naba.

Kawain te kamaiuaki bon te mangori, te nanoanga ao te tangira ma onimakinan te Atua ae e m'aka man korakora.

Aio ana rongorongo Iesu ae moan te kakawaki nakoira  n te bong aio ae ti na karaua n taraira iai rinanoia m'auku aikai. 

E kauringira naba Iesu n te rongorongo aio ba E nori nanora n aiaron te xray ao tiaki kona ni m'am'naia, e ngae ngke ti m'am'naia raora, ao e anganira kamaiura ngkana E nori nanora ba a bon koaua raoi, a bon tangira raoi ao a bon nanoanga raoi.

E kaotia naba Iesu ba e aki kona te Atua ni m'aninga taekaia aika a kamangoria n tainako ao a toro naba tib'aia Irouna man Atinibanna ae Moan te Tabu ao e M'aka..